~ L. Seikholen
THU - MAKAI
Eimite hi ikipumkhat theilou jeh-u ham, ipi jeh ham hin ikhangtou mo lheh-uve. Masanga kichat neiloute, nam hat a geltheite chu tukhangin lampi jouse a minoinung, minung phalel ihinau tamtah aum tai. Hiche jeh chunipilam pi a pan lah a na ititoh a machal got ding ham tihi lamchom chom’a khol’a tohdoh ngaiya ahitai. Masang a mi sanga masa chu tukhanga misang a inukhah cheh cheh nau kholdoh a, seidoh a machalna thei tohdoh angai tai. Mikhat chu adammo teng adammo na akihetdoh kahsea adammona akijendam theilou hel banga hi eimite mitmona, khantou mona hohi anatna laitah, aveisetna laitah akihetlou le khantou hahsa ding ahi.
Inatnao akihetdoh a akiseidoh a kona khantouna ding le machal nading ngaicha lai ho kiseidoh a kitongdoh thei ding ahi. Hiche lakhabu hin eimite damlouna phabep kodoh masah a chuche ho dinmun’a kona chu iti machal ding ham ti seidoh gotna ahi.

KUKITE NAM LHASAM AHINAU VETNA
Tekah in Kukite hi mihem jat in kitam lheh jongle Country tum neilou, State tum’a chengkhom loute ihinau hi nam nem ihinau ahijenge. Namneo ihina hou hi akisei le kimoh seiya ahipon, kalbi chot a kaltou theina ding lampi vetna ahi. Hijeh chun lam chom chom a inemnau veu hite.

1.1. Politics Thua :
Kuki kiti nam min hi amanga akihol le koi koi kihop sah a hitam ti akichen tapoi. Ahivangin manlou thei ahipoi. Akichen jeplou loi khat aumjeh in hiche bua jong hin abang komle kihoplet sah jep intin, abang komle kihopneo sah inte. Tu tadi a hi achuti ding mongin koi tadiu hite.

Politics thua hin Kukite Thusim Chomcha seiyu hite.


1.1.1. Akhonung ding anagel Masaloute
Kum somthum masang gei chun Kukite hin neh holna thei ahipou le gamthah thah a ana chao le le jengun ahi. Achingbei kelngoi bangin neh holna thei lam lam a ana chao le le jenguve. Hiche lai chun tukhanga jat tiníinama nam min a state ahin neicheh ding le aneigot jing diu anahepha pouve. Anageldoh pha pouve. Hijeh chun namdang abilía achen khom jep vangun Kukite chu anacheng thang jeng jung jenguve.

Tukhang hin politics thua ahung khahdoh dom’ule mi state sung ho a chom chom a cheng ahiu ahin kihetdoh bep’uve. Amaho hi jan noiya kho mulou banga che le le a atonacheh a geh a miho tobang ahiuve. Kho ahung vah phat a akivet’ule mi khochom chom’a gehthang jeng jung mihonkhat tobang ahiuve. Politics thua ahung khahdoh deh deh phat’un akivetíu le mi state a themcha cha cheng bep ahitauve. Ahung khangdoh kigobep tobang ahijeh un alamkai hon jong ima anahe behseh pouve.


1.1.2. Politics Thua Tupet a Kukite Dinmun Vetna.
Kukite hin tupet hin politics thua midang dinmun phahjouna ding aneipouve. State tum neilouva midang state hoa umthang ahijeh un thanei theilou dinmun in aum’un ahi. Kukite hi state chom chom a acheng thangun state khatcha a jong sonthei dom’in aum hihlaiyuve. Atam umna pen’u Manipur le Tripura a jong thabei tah in aum jingun ahi.

Atamna pen’u Manipur a jong hin thahat tah a sorkar tuhna aneijou hihlaiyuve. M.L.A. 8/9 ahiloule 10 ho bep bou aneijou jiuve. Hiche pum jong hin thahat tah ahijou pouve. Amaho changa vai ahin hom thei diu hi gelphah ahihihlaiye. Nagaland a amaho tam domna Medzephema constituency a term ni anakai khabep uve. Tening/ Peren constituency a term khat ham bep anakaidoh khauve. Tu lam hin alhasuh cheh cheh un M.L.A. jong atetlel cheh cheh tauve. Akitohmo cheh cheh un ima ahijou tapouve.

Assam N.C. Hills le Karbi Anglong a midang to achenghal jeng jungun ahi. Karbi Anglong a hi akho a sim dingin kho 100 val tobang aum vangun simkham lou atam’un ahi. Hijeh chun district adel’u jong akilom mo nachan aumin, chujongle amoh lolhin loi jeng theipouve. M.L.A. akaidoh u jong akihe behseh pon ahi. Myanmar a jong thahat tah in aumjou pouve. Politics thua akihedoh jou pouve.Hiti hin eimite hi mun tamtah a midang lah a akithecheh behseh un midangin state ahin tumnei cheh cheh phat in midang lah a milhomjo ahinau ahung kilang cheh cheh jengin ahi. Akiha thecheh u hi athalhomnau ahijong akiha hetdoh cheh cheh jeng tai Chengkhom’u hen mun khatía abil’in umleu thahatdom diu ahin, ching jong chingdom’unte. English Thuchih khatin ‘United we stand, divided we fall’, kiti to kitoh a seidin mun chom chom a ichen cheh u hi ilhuhnau, ihatmo nau, thabeiya iumnau ahi. Tupet a eimite thabei dan, alhusa tobang ahidaníu hi ahung chenkhom’uva tha ahin nei dom tengu le bou ahin hetdoh diu ahi.


1.2. Jatjem (culture) Thua Kukite Nemdan Vetna :
Tupet a jatjem thu a Kukite dinmun hi ivetle Kuki hitalou ibang deh deh-uve. Christian einahi sah-uva missionry hon anabol dan’u hi ivetleh Kuki ihinau jatjem einapeisah sohdeh chet’uve. Aumdan chu themkhat seiyu hite.Ahibepseuva seidin missionary hon jatjem phabep eina pailhah sah-uve. Tekah in hou bom samsao, somge adang dang inapai tauve. Christian hung hichasun in hiche ho le adang dang apailhah diuva aum to lhonin adang aseibe ham oleh Christian hi to lhonía adang ho chu pai dia ihin geldoh beu ham akichen jep lou aume.

Christian ihung hiuva jatjem'a um thil phabep ipai phat un Kuki Christiante lungput ah jatjem (culture) hi Christian hina toh kitohlou a hetna jeh ham oleh missionary hon chutia chu anasei jeh u hamin nam lam holeh nam lakai ho geiyin ahinpai pai tauve. Hichea kon a chun khangthah dom dom hon aban baníin jatjem (culture) ahin pailha hoi hoi tauve. Hiche jouva Kukiten ajat jem’u ananei hou chu sim thei ahitan ahi. Hiche ho chu pao, pu min pi min lahdan, le min kisah dan le adang dang phabep bou atuhden tauvin ahi. Nam von ho boitong songkhol, Delkop, tupah, delchen le adang dang jong anapai gam tauve. Hiti chun ivet leh Christian einahisah uvah missionary ho bolkhel jeh ham ahilouleh lam chom khatía khantouna jeh ham khat chun malai Kuki ho tobang hi talouvin Kuki kehkhat tithei ihitauve. Jatjem hi nam khat nam hisah a thil jouse ahop ahi.

Christian hi nunga nam ngailut louna leh jatjem hetlouna akimu nakhat chu ahileh mi loikhat in achate min jong Sarah, Esther, Ruth, Samuel, Benjamin, Stephen kiti pou jong asah-u hi ahi. Mi loi khat in min ho hi jatjem (culture) ahilam jong ahepouve. Tuthah hin jatjem hi ipi sseina hija ipi ho hi jatjem in ahop ham ti kithah hilkit angaiye.