Lamka, Lhaphul. 26: Tuni (Vahchanni) jingkah lam nidan 7:00 apat in Nilhah lang nidan 3:30 sungchan Churachanpur gamkai sungía Autonomous District Council, Member of District Council kilhen na Vote lhah na chu aum in hinla hiche Election ahin Mipin a Vote alungdei bang uvin akhethei tapouvin ahi. Thulhut kimu dungjuiyin 15-Hiangtam Lamka District Council Constituency Polling Station 15/1,15/2, Chiengkawnpang mun ahin nidan kimkhat sung tobang INC nungjui hole Independent nungjui ho kah a boina asoh etin akimui.


Polling Officer hoa kona thulhut kimu dungjui chun INC nungjuihon avel vella vote alhah jeh uva konna boina hung kipan ahi tin asei uve. Hinla hiche boina suhlhap ahijou nungchun mipin adei bangtah in akilhah pan tauve tinjong thujah akineiye.

Alangkhat ah 15-Hiangtam Lamka Polling Station 4/A, 4/B Vimala Raina H/s Polling Station mun injong Vote lhadingho akino to uve tin thulhut akimui. Hicheva mipiho kinoto laitah chun asunga tou 15/3A agent hochu PollingOfficer pan Ballot paper ahoppeh uvin vote alhah sah uve ti thulhut akimun ahi. Vimala Raina School Gate mun injong INC Volunteer hon Independent panpi a vote lhakigo mihochu alut sah kit tapou vin ahi. Hivachun kelkot a um INC volunteer holeh Numei ho akinoto kit uvin ahi. D.Phailen Don bosco Polling Station mun injong boina ana umkit in ahi. Hiva thilsoh chu ahile V.Aithang kiti PWD Khalasi Lailam veng muna Polling Agent pachun ama khel’a asopipa chapa Mr.Lienmang S/o Henkholal chu athakhelsah le Lienmang chun guhthimma Ballot Paper alah a INC a dinga alhah pih chu mipihon amudoh phat uva boina hung kipan ahi. Chomkhat jouva boina suhlhap ahito lhonna akichai chan chelha kit danin thulhut akimui.

15-Mandop Leikai mun ajong boina aumlou vang in thengsel in vote lhah navang aumpoi tin aki jakit in ahi. Hivahin Pasal 2 le 3 vote lhah namun ah ading un mipi Vote lha dinga hungho Ballot Papper alahpeh uvin ama hon adeisah Candidate ho atapeh un ballot Paper hinchoi ho chu ballot BOX a akoisah jivin ahi tin thulhut akimui. 14-Tuibuong Constituency muna Vang Polling station dangho bang in boina aum poi. 13-Kholmun Constituency Polling Station avang mipi hetthei dinga husan akijah louvangin Polling Station mun 4 ah boina aum in ahi akiti. Hiche Polling Station ho chu 13/1,Teising, 13/2, Vaison, 13/3, Bethel, 13/4, Kholmun ho ahi.

Hilai munna hi ama vote kisan lhathei louva kisei thujah jong akineiye. Chulleh Tollen mun a MDC Election thu a jan nungía Gollhang lheile hon Nupi Baby Lhingkhokim leh Nemchong ana vo uvin Thingkeh a akijep nanung lhon mitmu thei in akilang in ahi tinjong thulhut akimun ahi.

Alangkhat ah 3-Henglep District Council Constituency a Polling Station mun 5 a mipi hon polling Material Ballot Papper le Ballot Box ho janni nilhah lam nidan 6:30 chun ahal lhao vin ahi. Hiche kihal lhah toh kilhon a Police hon case abol uvin 3-Henlep Polling station mun 5 ho a Re-poll umdin phondoh na aum tai. Thah bol dinga kisei munho chu ahile; 3/2 Phaibong, 3/3 Songkong, 3/4Khanpi, 3/7 Songphu, 3/5Naphou Polling station ho ahiuve. Hilai Re-Poll Polling station mun ahin Vote 1342 um ahi. Chule 2- Leimata Constituency a Pokpa kabui Polling station muna jong Re-Poll umdi ahi tin thulhut chun asei e.

Melhetlou boina hinsosah mihon jong Leimata Autonomous District Council, Churachandpur district a Returning Office-2 jong apuimang paiuvin ahi. Boina thupi seigun ding umlouvin Churachandpur, Sadar Hills chuleh Moreh ( Chandel District) a chai ana hitan ahi.

MDC Election Result hi 2nd Phase akichai teng thakhat a Result kiphong doh ding ahi.