Imphal, Lhaphul 26(NNN): Manipur gamsunga 3rd Amendment noia Manipur District Council member ding kilhenna ajahda tampi umjongle, kilhenna dan khatna chu Vanghomni chun a chelha tan ah. Council member kilhenna hi Sadar Hills, Chandel leh Churachandpur district gamkai hojousea chai tobang ana hitan ahi.

Manipur sorkar’in imacha boina umlouva achelhah ding deina jehin security jong kitup tahin ana bol tajongle, Vanghomnia kilhenna kinhi boina tamtah toh chai ana hinah nah in ahi ti thulhut akimun ahi.
Hiche councilelection hi aum ding deilou jeha All Naga Students’ Association Manipur (ANSAM) chuleh United Naga Council (UNC) hon kiphinna achepi tei tei vanguvin, kilhenna adan khatna hi chayin ana umtan ahi. Sardar Hills leh Churachandpur district teni ahin boina tambeh louvin kilhenna kin ana chelhan ahi. Hiche district teni hi thinglhangmi Kuki te chenna leh atamna pen ahi. Sadar Hills leh Churachandpur district teni ahin voter 80% tobang in vote lhahna ana neiuvin ahi.

Chandel district gamkai sunga jong polling phatechan ana chelhan ahi. Hinlah kilhenna dia vote pe mihi churachandpur leh Sadar Hills to tedingin alhomin ahi. Chandel district pumpi kigomin voting hi 40% bou ahi. Chandel district sunga adeha Naga thinglhangmi tamna dom domhoa chun vote pe mi alhom lhehíe ti thulhut
akimun ahi. Chandel district sunga Thamla Khullen chuleh Nathan kho teni ahin polling imacha ana chelha theipon ahi. Hiche khoteni akona Khosung Numeilom ho chuleh Khosung Milham ho ana kithouvin, polling station jouse achun voting imacha ana chelhah sah pouve ti thulhut jong akimun ahi. Sorkarin security forces phatecha a hiche khokai teni a aumsah vangin, khatcha chan vote ape pouve tin thulhut akimu bei. Khosung Numeilom ho chuleh Khosung Milham hon ANSAM chuleh UNC in 3rd amendment , M(HA)DC, Act 2008 hon kilhenna juilou ding tia ana kilol nauchu kilotaha anit uh ahi tin thuso mite hengah jong seiphong na ana bol pai uvin
ahi.

Chandel district gamkai sung ahin, MDC kilhenna thua boina imacha ana um pon ahi. Hinla vote lhah mihi alhom lhehinahi. Chandel district mun tamtah ahin jong hiche kilhenna kin hi akho sung miten kotkha kiphinna a ana lamtou ahi. A district sung ahin kiphinna chom chom jong Vanghomni nisim 26 nichun ana um in ahi. Adehin Japhou bazaar le adonvella hojouse bandh jehin koimachan vote ana pepouve tin thulhut jong chun aseiye. Hinlah security force ho hattah jehin polling phasahbep ahin voting vang ana chelhan ahi. Tuchun MDC kilhenna kinhi thinglhang mite, adeh a Naga langhon nasataha athet uh ahi. ANSAM leh UCM lamkai na noiya amaho hin athah behía jankim Lhaphul nisim 25 nia patsa chu kiphinna apat kit uvah ahi tai. Chujongle MDC kilhenna aumlouna dinga economic bolckade jong hi National Highway NH-53 leh NH- 39 teni a hi chelha peh ahi. Hinlah hiche kilhenna kin hi aum tei tei nadinga Manipur sorkaríin louchal taha pan ahinlah ahi.