Lolhinna hi tosoiya muthei ahipoi. Kisongtah a ihung kihabol tenglebou aki lolhing bepme. Leisetna mihemte chenna hi kumsang tampi ahita’n,alhung keija hin mihem hohi aumthim pouvin imalam jousen amachal jingun ahi. Mabanna kalson nomna, thilthah boldoh nomna chuleh aumsa cheng aphalama kikheldoh sahding anopjeh uvahi umthim theilouvu ahi. Na hatoh jong angainai, ahin mihem hon hijatpi lolhinna anei naova athupi penchu kisonna aneijeh u ahi. Mihemte thusimhi ivetleh kisonna neiho bouhi alolhing uve. Scientist minthang Galileo chun leiset hi pehpo’n alum joh ahibouve atichun mihon mingolpa anatiuvin, ahin athil mudoh chu adih mongnai
tia kisonna aneijeh in ana lolhing in ahi.

Kisonna neihochu alosam ngaipoi. Amitab Bachan hi nikhat thua hung minthang ahipoi. Akipat tilchun alolhinlouna tampivei ana um in, director tampi’n jong anadei pouve. Hijongleh, aboltheina chunga kisonna aneijeh in hichan geihi apha theije. Imalam jousen kihabolna angainai, ahin kisonna ineiteng lebou kihabolna chu hung umtheibep ahi. Thilbol nomna leh Mikhel nomna lungthim hi ineiteng le bou kisonna hi ahin kivop theijin ahi. Ihinkhou adunglang isuhsao theilou vangun availang behvang isulen theijuve. Kisonna neiloujeh a lolhing joulou mi tampi imukhahdiu ahi. Simlai mi tampichu ahetnao asan vangin exam alolhingji pouve. Hetna anei houchu akisonpi theiloujeh uva lolhinglou ahiuve. Hinkhohi aphatna langbou havetdin aphai. Mi tamtah ginchat dannin kisongtah a thilbol thei hokhu anu oisunga patna ahin penpiu ahi atiuve. Hinlah, kisonna hi ipenpiu ahipon amavang ikihabolleh neithei ahijeh hin ilung thim uva insah banga isahdoh gotdiu ahi. Phat lutmai theijinte, hijongleh ikipat uleh nikhatleh isahchaidiu ahi. Na itoh naova michunga kingailouding, isuhkhel hochu kihilna a neija akit tenga lolhinding ngaitoding aphai. Ima bollouva itou thimbeh tengleh eidin thilpha asohdoh theipoi.

Ateh, akhang ibonchaova lamkai theingen ihiuve. Lamkaija panna dinghin kisonna nei angaije. Lamkai khatchu natohje themlou maithei, lekha themlou maithei, ameljong hoilou maithei ahi. Hijongleh, lamkai lolhing jousehin kisonna anei sohkei uve. Athil boltheina hoa kisonna neilou hochu ama kilamkaisah jongleh mipin chomkah louvin adalha jitai. Kisonna neina dinghin losapna inei hohi lungnatah a pohnat louding angaije. Mihin thil aboltam channa asuhkhel chuleh alosamna tamma ahi. Suhkhelleh losapnaho chenghi kihilna a ineitho louleh kisonna inei khamkham jong eilah mangpeh thei ahinalaije. Lamkai dihtah chun losapna jouse chunga mopohna akilah in, alosapna jehchu akholdoh in kitil khounan aneijin atohding maban ajopme. Lamkai hi mikichase holeh milungneo hoa ding ahipon, kisonna neihoa dingbou ahi.

Hijehchun, lolhinna dinga ibol masatpen diuchu ikisonnao hi isuhchah diu ahi. Atohna lam jousea lolhing hokhu kisonna nei ahiuve. Bill Gates khu veleuhen ama chungkeo hilouva a company leh athilsemho chunga kisonna neitah ahi. Kisonna neilou hileh America a mihaosapen ahidoh nadem? Akitetpi umlou ahipon, athilsem deimo a-jong umda ahipoi. Ahin, hichi hojeh hin Bill Gates alung lhadehpoi. Kisonna kiti hi eile ei kimoh gelsang ding tina ahipo’n, mi’n iti namu dinga nadeijem, hibanga chu nangle nangjong nakimu ding tinajoh ahi. Kisonna nanei danchu ñ na career, nadam theina, loile gol naneidan chuleh na inchen danna mudohthei ahi.

Kisonna ineilou teng boldinga dei um phabep hochu - Mi lolhin naho thangse hih in. Chisang chun min iti abolleh lolhing theija ham? Amaho bolbanga nabolleh nang jong nalolhin ding ahi. Na lhahsamna hochu geldoh inlang ahin kisuhboisah hih in. Hichi sangchun nalhah samna hochu iti semphat diham ngaito jon. Koimacha achamkim aki umpoi. Nathepna hochu semhoibe ding gon. Min thilthah iti apohdoh uva, midang bol sanga phajepma iti abol uham dongle chun nahetna khangtou teijinte. Nang sanga themmo hochu nahetna hillin. Chutileh, midang sanga kahetna asangjoi tichu mudoh in natin naki sonna chu khanbe ding ahi.

Kisonna toh kison valna jonghi lhekhen ding aphai. Itohdoh ho chunga kisonding ahinai, hijongleh kison valla mijouse chu kei sanga nemjo ahi tia geldeh loudin aphai. Thil jouse akithem theipoi, thepna inei chasun sunho chu mi ihil leh lungchamkimna akinei jin, ikisonna jong apilhing theije. Hijehchun, midang sanga nemjon kigel hih in chuleh midang hojong amaho sanga nemjon kimusah hih in.