North Korea in army ho kiging sadem a koi ta 

Seoul, Lhaphul 25 : North Korea lamkai Kim Jong II in state army ho gal kon dingin in kiging sadem in aum sah tai. Hiche hi Lhakao a South Korea warship twi lah a alhum chu North Korea angoh ahi tai. Kim thupeh chu national television a official khat in asim phongin ahi tin South Korea Economic Daily thuso chun aseiye.

Lhakao 26 nia Cheonan warship chu North Korea torpedo in akapset ahi tia investigators hon phondohna anei to lhonna North Korea in kigin na hi anei ahi. Kim in aseina a North Korea in gal ahin bol leh lethuhna kinei ding ahi ati. Alangkhatna South Korea president Lee Myung-bak in North Korea toh sumkolveina akhah in chuleh hiche thu hi UN Security Council koma pohlut ding aphatsah in ahi.

Hongkong simlai 1 insong dan apat kichom lha
Hongkong, Lhaphul 25 : Hongkong khopi a simlai khat aloi-agol, jilkung ho leh anaopa masanga school assembly umpet in insong dan 7 chunga kon in akichom lha in apet pet in athi in aih tin police in aseiye. Amapa chu amin Wong Ling-fung ahin kum 17 a upa ahi. Thilsoh hi janhi a chu Tung Chung Catholic School a anasoh ahi. Wong chu school assembly kibol na mun laitah a ahung kichom lhah chun simlai ho kichatna lentah apeh jeh in ajam cheh jeng un ahi. Paramedics hon apet pet in athi tai tin aphongdoh un ahi. Amapa schoolbag akon lekha kisun kimu in aseina a jilkung ho toh kihet themlouna aum jeh a akipa thei lou phat a ama le ama kithat ahi. Chuleh kum 2 masangachu Wong hi alunggel anaboi ahin hijeh a chu kum khat school anakai lou ahi. Tukum sunga Hongkong muna simlai ama le ama kithat hi Wong panna in mi 8 alhing tai tin Education Bureau in aseiye.


1975 kum chun Israel in S Africa koma nuclear manchah anajoh kigo e 
London, Lhaphul 25 : Lekhabu thah khat akon kimu doh chu ahileh achesa 1975 kum chun Israel in S Africa henga nuclear gal manchah ajoh kigo e akiti. South African documents aguh a kikoi akon kimudoh chu ahileh leh hiche pet a Israel defence minister Shimon Peres in hitobang galmanchah chu jat thum a peh ding ana ngaito e ati. Hiche hi S Africa a mikang sorkar in temna ananei jeh ahi tinGuardian thuso chun aseiye. Hinla Israel in hitobang thusoh chu adih ahipoi ati.

Lekhabu in aseibe na jat thum kiti hochu conventional, chemical chuleh nuclear galmanchah seina ahi ati. Hiche pet a gam teni palai peres leh PW Botha in inoptona tampi ananei lhon in chuleh hiche hochu “agauh a koi jingí dingin jong ana kinopto lhone ati. Nikho 31 lhakao, 1975 a kinoptona chu South Africa military chief of Staff Gen RF Armstrong in soi abol na a missiles ho chu nuclear manchah buto ding jong akiseiye. Kihouna a chun S Africa in Jericho missiles choh ding anom in hinla aman chung chang jeh in ana kicho thei tapoi.

Afghanistan a US sepai umho Iraq a sanga tamjo ta
Washington, Lhaphul 25 : Achesa 2003 kuma Saddam Hussain chunga US sepai hon gal asat uva kipat tuhin Iraq a sangin Afghanistan gama US sepai um atamjo tai tin Pentagon thuphon chun aseiyin ahi. Kal masa chun Afghanistan a US sepai mi 94,000 aum in chuleh Iraq a 92,000 aume. Hichehi Obama vaihomna in Afghanistan a mipi vaihomna kitup tah aumding deisah na jeh ahi akiti e.

Alangkhatna United States in Iraq a sepai akoi hi ahung lhung ding lhajing teng leh mi 50,000 bou akoi ding akum kit teng abon a alahdoh ding ahitai. Tu ban leh Afghanistan a hi sepai 100,000 koi ding lunggel aume. Hiche hi President Barack Obama in ollha a sepai 30,000 koibe dinga ana phondoh ban jom a kibol ahi. Lhalam 11, 2001 a United State kibulu jouva pat Allies tichu Nato gam hon sepai 47,000 ahin koibe un ahi.

Pak army in Gen Kayani natoh suhsao be ding nom
Islamabad, Lhaphul 25 : Pakistan sorkar in Gen Ashfaq Parvez Kayani phat suhsao be ding ham tia agel lai tah in army commanders hon jong atohmun phat suhsao be ding anom um ahi.Tupetna Pakistan in galguh bol thingnoi miho chunga operation abol hi machalna ichan ham gei aum masangse a Gen Kayani hin atoh mun ada lhah lou din army commanders hon kinoptona ananei un ahi. Kayani hi adol tah a chu Phallha 28 tengle hin retire ding ahitai.

Hinla pakistan people‘s party makaina sorkar hin aphat ahin suhsaobe maithei ahi. Prime Minister Yousaf Raza Gilani in vang aphat ahung lhun teng sorkar in thulhuhna kinei ding ahi ati. Hinla defence minister Chaudhry Ahmed Mukhtar in aphat isusaobe lou ding ahi tia anasei chu Gilani in aseilou ding khat asei ahitin Mukhtar chunga alungnop lou na aphongin ahi.

Korean gam teni kikah boina aumlou nadia US in panla
Wahington, Lhaphul 25 : President Barack Obama in US military thupeh aneina a South Korea toh kitho khoma North korea akona kino khumna aum kit a ahileh kiging jinga aumna diuvin hetsahna aneiye tin White House thulhut chun aseiye. Alangkhatna North Korea in naval warship alhumsah na chunga United States in South Korean President Lee Myung-bak kithopina thie channa kithopi ding ahi tin WhiteHouse spokesman Robert Gibbs in aseiye. Aman aseibe na a hiche chung changa hi North Korea in ngaidam akithum a chuleh alunggel akhel dingin jong temna aneiyin ahi. Obama leh Lee hi ahung lhung ding Lhadou teng Canada a G20 kikhopna aum teng kimuto lhon ding ahi.

Kal masa chun international investigators hon “Cheonan” warship twi lah a alhum jeh in mi 46 anathi na chunga Northkorea themmo nasatah in achan un ahi. 1950-53 Korean gal aum jouva pat tuchunga Naval warship kikap keh hi akhohse penahi. Tupet in UnitedStates in South Korea gama sepai 28, 000 akoi in ahi. Korea gam teni hi lhangphong a gal akisat jing lou vangin aguh a gal um jing jeng ahi. Gam teni kikah a alang langa sepai um hi 1 million alhinge akiti e.