New Delhi: Jingkah nidan 11:00 a kipat ding tia prog a kitat ahijeng vang in Alemchang lou leh boina neocha cha jeh in aphat kigong bangtah in akipanthei tapon ahi. Nilhah lam nidan 12:40 vel in mipi hungkhom hon hall sung alodim tan ahi. Jingun dia kigong Pu CS Thanga, atahsa tah in ahunglha thei tapon, ahin lah KSO Delhi kithopi nadin dangka 10,000 ahin thot in ahi. Pu Philip T Zou, Jin-Jaum leh Pu Kuonthang Touthang, Kinneipa vang ahunglha hon in Anikho adia kigong phat mangding dang hon jong aphat toh amun tah aluo cheh thei uvin ahi.


Phat mangding ho jong akimsoh tobang ahitah jeh in, Vaihom ding teni Gl. Letminlen Haokip leh Ng. Luoise Touthang in phat pat nadin mipi ahin hetsah hon in, Hiche toh lhon chun THE LAST RESORT Band hon stage chung ah Music thuong jeju leh zaila choh thet in a oiyun, Laa ni asah jouvun, Phat hondoh naleh ejakai Pathen henga pehdoh na in Pu Thang'a Singson in amang in ahi.


Gl. L. Letkhomang Haokip, President KSO Delhi Branch in Welcome speech toh Presidential Message mipi hung kikhom ho ape in, chuleh phat kiman sunga nomtah leh kipah tah a koi jousen aman thei nadia kithokhom cheh din tiemna anei in ahi. Chule, Jin-Gun ho liemna na le Jaana ape in, Kipa thilpeh pehna jong Jin-gun ho heng'ah anei ngal in ahi.


Freshers' (Maithah ho) ho nikho ahitoh lhon in, Maithah phabep khat in stage chung ahin luo uvin, Amin utoh, Inlam'a aumnau, Tule tua Delhia muna asim u course, Delhi a aumnau akisei lhah utoh lhon in, Rev. Dino L Touthang, Pastor KWSD in Pathen thuhing in atilkhou un, amaho jouse Vangthumpeh nan Pathen heng'ah taona amang in ahi.


Pu Philip T Zou, Jin- Jaum (Guest of Honour) le a Innsung mite ahung lhun utoh lhon, in mipi jouse'n amaho liemna leh Jaa na'n adingdoh cheh uvin, KSOD akon kipa thilpeh pehna aum in, Pu Philip in jong atouna mun aluo ngal in ahi.

Thug Front ho akon zaila ngeitah Gospel Rape ngailhah ahitoh lhon in, Ng. Honeikim Haokip akon Speech on Behalf of Freshers' ngailhahna aum in, aman nikho khat mong mong maithah ho liemna kin loupitah akigonpeh jeh uleh Nule pa tamtah in ama ho jouse ngailut tah a liemna phat akiman peh jeh uva kipathu asei in maban a akinepnau jong aseidoh in ahi.
   

Gl. Thangpu Guite in jong Senior Students' ho thakhel in houlimna phat amang in maithah ho ahin, simlai ho jouse ahin, tilkhouna anei in, Student kiti hin Manchah nasapen tah anei u ahi ti asei in ahi. Boina hahsat na hoa RTI eti manchah ding ham? tiho jong simlai ho ahil in ahi. Nu Hoinu Haokip in jong Nute ho thakhel in simlai maithah ho liemna leh tilkhouna phat amang in, Self Discipline kiti hi phatah a ejui cheh diu chutileh Lolhinna lam jon a ma esot thei bepdiu ahi atin ahi. Chuleh kihambol kiti jong hi lolhinna dia manchah phatah khat ahi tin jong asei in ahi.
Gl. Kakai Haokip in laa ngeitah TAHCHAPA, KUKI CHAPA a oiyin, mipi hung kikhom ho lungthim leh tahsa asuthou lheh in ahi. Munirka Area Cultural Team hon Pakai Hatchungnung Pathen tila in laam hoitah mipi ho avetsah un, chuche keu hilou vin, akivon dan uvin jong pule pa chondan hoitah avetsah e tin jong mipi ho akon kamcheng akija'n ahi.

Anikhoa dia Jin-Jaum a hungpang Pu Philip Thanglenmang Zou in houlimna phat amang in, Eiho jouse hi sopi khat, Innsung khat ehiuvin, hitobang a phat mantam tah a keijong kasopi ho'n KSO Delhi Freshers meet a Guest of Honour a neihin tiem jeh uvin jong kakipah e tin Pu Philip in asei in ahi. Pu Philip in Eiho jouse hi Kuki ehiuvin, Kapu Jong Kuki min'a Subedar ana pension ahi, Kuki kiti hi neocha ahipo'n Nam Lentah ehiuve jong atin ahi. Simlai ho lekha sim nalam a pan lah ding dan leh chepi ding lampi tamtah in ahil in, Lolhinna kiti chu akoi jouse'n edel cheh diu ahi tin simlai ho chouna (Challenge) abol in ahi. Simlai khat nahi a ahileh Lolhinna Jaolouva Inlam kile loudin pan lajing un jong ati.


Election Commissioner Pu Thangboi Hangshing, tule tua KSO Delhi Advisory Board Member jong hi, in election dingtoh kisei mipi ho hilchahna phat aman chai in, Gl. John in zaila a oipai kit in ahi. Traditional Display in anung ahin joppai ngal in, Kuki sung'a jatpon loupitah tah o toh nungah gollhang hiche jatpon a kisem hon stage chung ahin jemhoi lheh uvin, music toh thon mipi ang'a chun lam ahin jot un ahi.

KSO Delhi executives hon kumsung'a themvetna a lolhinna neiho kipa thilpeh pehna phat amang uvin, lolhinna nei jatchom chom cl-X apat Phd. chan mi 30 val jen ho heng'ah thilpeh apeuvin ahi. KSO Delhi Advisory Board ho leh 2008-09 KSOD Executives ho jong kipa thilpeh hoitah tah apedoh un ahi.

Pu Kuonthang Touthang, Kinneipa (Functional President) in houlimna phat amang in aman jong simlai maithah ho nikho ahitoh lhon in maithah ho ding leh simlai ho jouse adin tilkhou na thu ngeitah asei in, society adia manthei khat suodoh ding ti ahasei in ahi. Ahin amasa pen a Lekha esim uhi eima ding phatchomna ahin, Ehung lolhin teng uleh Insung phatchomna ahi in, Insung'a dia manthei khat chu Society adia jong manthei ahi tina ahin, Hijeh a chu eima innsung keu hilouva society jong ekhohsah diu ahi ati. Simlai nahileh insung kineppi thei nahi angai in, Mi upa nahileh Nanao teho kineppi thei nahi ngai ahi in, Mipa nahileh naji nachate kineppi thei nahi angai yin, Mi Naopa jong na ute teho kineppi le kiletsah pi thei nahi angai yin ahi ati.

Eiho society ahin Thudih seingam akium tapon, houbung lhacha honjong thudih aseidoh ngam tapouvin hijeh in egamsung uva hin thudi alengthei tapo'n ahi ati. Elungthim uva ekoi jingdiu khat chu, Foundation ejat semjong leuhen, Pathen thua Foundation ekisem lou uleh emaban uchu ahuom keusa tobang ahi tin jong Pu K Touthang in asei in ahi.

Mr le Ms Freshers' kilhenna dia Top 5 ho stage chung'ah vaihom tenin ahin koudoh uvin, mipi masang achun Judge mi 6 ho'n thudoh chom chom ahin nei un, abon uva phat aman chai utoh lhon in Nu Lamkholhing Haokip, Tuni chan'a Osuo kikhellou eiho Kuki chate laha zaila them a kihe in "Aw Jaan Kipana Jaan" tila toh "Hinkho epi ham?"  te ni in mipi ho lungthim ahin suthou in, Mipi kithim houlhihna chu 'Lamkholhing vang a O angei cheh cheh e, masang sang in bon angeijo go e' atiuvin ahi. Alangkhat ah Pathen thilpeh loupitah khat vag chang ahi.

Gl Thangboi in Bengal Pahhoi tila ahin sapai ngal in, khangdong nungah gollhang ejat hamkhat in Pu Rainy Helal angaisang nau laa ahi in, Gl Thangboi jong alim amel chu nungah gollhang ejat hamkhat din ngaisang ani mohhi khah ding chu mitamtah ginchat ahi. Alangkhat ah thulhut kimu chu hiche kin ahin, Rainy Helal jong ahung lha e ti ahin, nilhah lam chun Vaihom te ho heng'ah aman jong laa sahna ding phat ahin thum in, ahin phat chelhah ding dan jouse gontupsa ahiphat in phat ani changjou tapon ahi tin jong ginchat umtah akon thulhut akimui.

Judges ho akon Mr le  Ms Freshers' Lhendoh nading points ho suhtup ahitoh lhon in Mr le Miss Freshers' din Gl Helkhomang Singson le Ng. Kimboi Mate  lhendoh ahi hontoh lhon in kipa thilpeh pehna le Ms Freshers' Lukhuh khuhpeh na Mrs Philip T zou in anei in ahi. Gl. Helkhomang in Top 5 a thudoh kidong adonbut chu ahileh;
Thudoh- Gollhang chapang nahi nalai in, nalekha simtoh kilhon a hi etobang lunggel neithei dinga nakigelem?
 Donbutna- Master chan kachai a eimi society sunga lekha sim lampang'a lunga enei hou chu abona eseidoh/ephondoh cheh uva ahileh society kitup intin, pha jong phading ahi kati ahin, hijeh a chu simlai ho hin hil'a tilkkhou ding chuleh amasapen a pathen elungthim akoiding tihi society a dinga kalungtup thupi pen ahi.

Thudoh -  Tulai in gender issue hi akiha sei in eiho society a seidinga numei hi etobang in bol leu hen numei hi adinmun chuleh aki susang thei ding ham tihi kadoh nom ahi.
Donbutna - Numei hon priviledge ekipeh diu ahin, ahin tulai in numei le pasal akibah dan thu ehe tauvin ahi.
Thudoh II - Ahileh Kimboi Delhi a hin, numei ho hi officer hiding gel hilou vin,officer jiding hi inge tiding agel jeh uva hung u ahi tin min aseiyin, nang in eti nagel em?
Donbutna - Keivang chuti ding gela hunga kahi pon, keijoh mi kinepna dinga hungjoh kahi.

Pu L Misao toh lim akila bom uvin, Gandhi Vihar Band holeh Adang dang tamtah in zaila ahin sa kit uvin, Vaihom teni akon hetsah na thuphon aum in, Ng. Helam Baite in Sapla ngeitah ahin oi tan, achainapen a phat mang ahivang in pamlam a um ho jousen jong Hall sung ahin dellut ngal un, hall sung chu athonglha jeng tai.

Phat jouse manchai ahitoh lhon in, Phat khumkha na taona Pu Tongmin Misao, KWSD Chairman in amang in phat chai ahitai.

Pamlam ah ankuong suokhomna aum in, mipi ho chu tahsa le Lungthim in ava cheh un, kipah tah in Hall sung'a Lim kikab a buoi loi, inlam jonloi aum in Nilhah nidan 07:30 alhin toh lhon in, Hall kot kha ahitai.


Election Result:
1.  PRESIDENT                                                              - LAMTINTHANG HAOKIP, DU
2.  VICE PRESIDENT                                                    - BOINU SITLHOU, JNU
3.  GENERAL SECRETARY                                          - THANGMINLEN KIPGEN, JNU
4.  JOINT SECRETARY (NORTH)                                - THANGMINLAL MATE, DU
5.  JOINT SECRETARY (SOUTH)                                 - DOUMINLEN ZOU, JNU
6.  FINANCE SECRETARY                                           - RUTHNEO KHONGSAI, JNU
7.  EDUCATION SECRETARY                                      - THETHEM KIPGEN, JNU
8.  ASSISTANT EDUCATION SECRETARY                - DICKY TOUTHANG, DU
9.  CULTURAL SECRETARY                                         - JANGKHOLEN HAOKIP, MUNIRKA
10. ASSISTANT CULTURAL SECRETARY                  - CATHERINE TOUTHANG, JNU
11. GAMES & SPORTS SECRETARY                           - KAMMINTHANG (IRON), DU
12. ASSISTANT GAMES & SPORTS SECRETARY     - SOLOMON HAOKIP, DU
13. PRINCIPAL INFORMATION SECRETARY           - NGAMLEN HAOKIP (PUPATIMES)
14. ASSISTANT INFORMATION SECRETARY          - ZALENMOI GANGTE  

A vote mujat uleh akiteppi dang ho navet nomleh: Hilai hi click bol o

Anikho kimanchahna lim ho



Lim jouse navet nomleh hiche link ahin chenlang naga vethei hinte.