Kum 13 ahinphah tengleh kanuhin kalungel eihet thempeh poi tin aloiho joh asongin phat atamjon khulaija umding athanom'e. Kum 20 ahinphah tengle vang loipha kaholle lehi koimadang ahipon kanu ma-ma ahibouve tihi ahin kihetdoh jitai. Nute leh chanute kivop danhi abangleh akitoh honlouham tia gelthei ahijin ahivanga hatah a kingailu ahihon bouve.
Chanuhin ji ahinei tengleh anutoh akum kikhetval jeh ham, anuhin achanu a O-valjeh ham ahilouleh nutehin achanuhi jinei ahitah vanga achapangbol jeh ahidem akikah hon'ah kinahna atamme. Ahinlah, boina ahung umteng leh nuleh achanuhi apangkhomin ipi boina hijongleh akimaitopi lhone. Chanuhin anu a kon'a nupi hijeh hi kijil ahin, cha ahin neijou teng lejong anu lungsetleh hepina achang jingin ahi. Hichi ahi nuleh chanu kivopna "special" ahinachu.
Nuleh Chanute kikah a lungthim kiseipeh tolou jeh a kihet them louna aum dinghi dei umloutah ahi. Chanu tehin anu komía alungel jouse - alekhasimna hihen, loilegol hihen, akingaipi ho hijongleh thengpetna asei jingin aphai. Alungel hi anu kom'a ahilchen ding chuleh anun hitijoh leh phadiham tia ahinsei hochu nelkal louva kipahtah a akisan dingin aphai. Nute jonghi chate toh lungput akibah theina dinga hi phat akikhel dungjuiya amahojong akikheldiu dei aum'e. Achanu techu tahsana neitah a chamlhatna apeh din aphai. Hiti henlang hileh, nuleh chanu ki- kah a kihet themlouna neocha cha hochu kitolmangin tin akingailut nahon pilhing chehding ahi.
Nuleh chanu tehi akihet themto hon'a adingcheh hon akigel thei honding angaije. Nute chun achanu chu ahinkho a achen khompi ding ji adeitah akilhena thei dinga chamlhatna apeh ding angaije. Nuhin achanu dinga lampi dihchu akopeh ding ahinai, hijongleh achanu khanchan aning akah geija achintup gotleh kiboi theilhon ahi. Chanu hin chamlhatna adei banga kanu jonghin chamlhatna hinkho aman nom'e tihi ahetpeh angaije.
Numeichu nungah ahunghi tengleh kanu hinahi hitobang ahin, alungput dan kakhelsah sanga keijoh kanu lungput dantoh kitoh a ka-um ngaijinte tia akigel lhah dingin aphai. Nute hin achanu teuvin athilbol uchu asetna leh aphatna ahetlai seuva ahinkhouva abolnom hochu abolsah jengdiu ahi. Nute mopohna chu achanu teuhi chamlhatna neitah a ahinkho uva akimaito pidiu boina hohi iti apal galkai diuham tihi ahildiu, adangse vangchu Chanute khut'a angaplhah diu ahi.
Nuleh chanu kikah a loilegol banga kivopthei hokhu iti hoija hoi hitam. Hitia kivopthei hohin kihet themto louna aneilhom jiuve. Ani lhonin lunguh ho geijin akiseipeh lhonin chuleh numei anutoh hitia hung kivop hohin lung ngamna leh lungtup sangtah aneithei jiuve. Aphatlouna khat vangchu chanu tehin anuhi loilepai dingin bou adeipon, anu panmun alodingin jong adeithan ahi. Adeh a numei chu ahung kikhan lhitna anun anatokhah saho ahinto ding teng lehin loilegol sangin ahil dingleh akithopi theiding anu angaichan ahi. Hijehchun, nutehin achanu chu loibanga akivopina banía acha hina a jong akivopi angaije.
Technology ahung kikhel phat hin, khangthah hon amanchahje ahevah un nulepa te vanghin amanvah thei pouvin apumhetlou jong atam'e. Hijeh hin, nute leh chanu kikah jong agamladeu deuve. Ahinlah, insung tamtah a chun hichi kikhen gamlatna hi aum poi. Kinelna leh kinahna um inte chuleh chanu ten anute thusei angai louna jong umminte, ahin hichi hohi thilneo chabou ahi. Nuleh chanu kikah a kingai lutna apunna dinghin akihoumat jinghon angaije. Thilbai vang ahipoi, hijongleh nutechun kaboi valíle ahilouleh kachanu kamudai tia akihoupi louleh, kihoumatna lampichu akhatan ahitai. Aninan, phat aha mankhom lhon angaije. Nuten achanu chu phat aman khompi a aloi banga akivopi leh achanun avetda ding tichu thil hahsa ahi. Athumnan, nachanu dingin imacha jahda hih in. Ajehchu, thil kijahda kitihi bolnom umdehset ahi. Alinan, thil jousehi kihabolna beija muthei aumpoi tihi chanu hetsah angaije. Alungel chu min ajapeh ding adeileh, aman jong milungel ajapeh ngaiya ahi.
