Tarao jat mite thusimhi Cheitharol Kumbaba (Manipur Lengte thusim) kum 1263-1467 AD laipeh anakisun a jong chun akimui, atiuvin ahi.Tupet hin Chandel gamsung ah Tarao kho 5 tobang aumin, khomin hochu Leisokching, Bukthrol, Khuringmul, Ratenphai leh Heikakpokpi ahin, chuban ah Atung Atang khojong Ukhrul district ah aum'e atiuvin ahi.
UNESCO thulhut in Tarao pao amathah a ahintahlah hi vannoi midia thujou kisei ahi, ajehchu Manipur gamsung a mihem sang val in hiche pao hi amanjing nahlai ahin, chuleh gamsung'a paoleham lah a
simthei tah khat hijing ahi atiuvin ahi.
Hiche kiloikhomna hohin hiche thutoh kisai a mopohna neihon thu adihlou hi asuhdih uva, Manipur gamsung'a Tarao pao bou hilouva, Aimol, Purum, Andro leh Phayeng paoho jong amangthah dan a atahlah uhi akhel diuvin ngehna anei un ahi. Centre for Tribal and Endangered Languages, CIIL, Mysore, a lamkai Dr. Th. Chandramani chun aseina ah CIIL hin hitobang a amangthah mong hilou ahivang a kisunlut khel paoho aman pailou nadingleh achungthu suhtup leh jihdoh dinghi kiboipi jing ahi atin ahi.
Aman aseina ah, census commissioner of India injong amisim 10,000 sanga lhomjo hohi paochom tho tia ajihlut lou ahidan asei-in, Indian constitution hin pao phabep bouhi pao len leh hetthei a akoi ahin, hiche pao 22 hohi Eight Schedule noiya kigol lhaho Sanskrit, Assamese, Bengali, Bodo, Dogri, Gujarati, Hindi,
Kashmiri, Kanada, Konkani, Maithili, Konkani, Malayalam, Manipuri, Marathi, Nepali, Oriya, Punjabi, Tamil, Telugu, Santali, Sindi leh Urdu ahiuve atin ahi.
Dr. Chandramani in aseibe na ah, minorities commission report leh official language resolution(3) kum 1968 akibol ahin, National policy on education 1986 jong ahin, pao len ahi hicheng bou hetpehna anapeh ahin, hiche pao 22 bouhi gamsung a apao hettheilom a asimgel ahi ati. Census record dungjui in gamsung ah pao 1,576 tobanghi phatedom'a kisemtup aumin, nu-kampao a kimang pao 1,796 aumin ahi tinjong aseiyin ahi. Hiche jouse lah ahin pao 69 apat 72 kikahlah tobanghi themjil in ah kihilnan akimangin, hinlah pao 146 tobanghin Radio program aume jong ati. Hitobangho lah a khat chu Kukichin pao holah a paite pao, Imphal station AIR a pat nisehleh minute 20 kipeho hi ahi tinjong aseiye.
UNESCO report in adihlou aphondoh poh natna neitah'a aseina ah, paokhat mangthah kitihi leiset mihemte ding'a thil hetdan, mudan leh lung geldan khat manghel tina ahin, tua pao milhom chan atho hohi aman masang'a mansah kigot sang'a choisang ding, semhat dingjoh ahi atin ahi. Thignlhang mite thusim ngaitah
tah holeh kihilna thei tampi hohi tunia sutdoh'a apao ventup najoh a manding ahidan asei in ahi.
COPTAM makaina noiya kijotna umdi
Imphal, Lhajing 8 (NNN): Tunileh Committee on Protection of Tribal Areas, Manipur (COPTAM) makaina noiya Manipur hills district a kijotna um ding ahi.
COPTAM hon angeh uchu hill district a gamgi ho sorkar in akhel lou diu chuleh hill district a phaicham hon census a kon'a lahlut ding agot uchu abol lou diuva ana ngeh u ahi. COPTAM hon aseina ah achesa Lhamul 27 nikho a chief minister kom'a memorandum anakipe in tuchan'in donbutna imacha akimupoi ati.Tuni kijot khom nading'a mipiho na kithopi diuvin COPTAM hon temna anei uvin ahi.
DRDA natong 1 athisa kimu
Imphal, Lhajing 8 : Moreh munía posting DRDA, Public Information Officer khat janhi jingkah chun Moreh police station hopsunga Moreh ADC office complex mun ah athisa in akimudoh in ahi. Ama pa hi amin Wairakpam Priyokanta alias Boby (39), s/o (L) W. Achou, Heirangoithong bazaar a cheng ahi. A Inkote a kon thulhut kimu dung juiyin amapa hin tu naicha achu Public Information Officer, DRDA a ding'a kaisangna (promotion) anamu ahi, chuleh Moreh a post dinga kum khat masanga chu che ahitan Luxmi Hotel, Moreh mun'a pansa ji ahi atiuve.
Thilsoh dang khat ah tuni jingkah lam in PHED department a Executive Engineer khat Hapta bazaar mun ah motorcycle (pulsar, MN/06(S)/9728) hattah a hunglhei khat in atatlih in ahi. Athipa chu amin Manawar Ali (50), Lilong tu tua Hapta a ainkote toh chengkhom ahi.
Manipur sorkar thilgon chunga ATSUM in lunlhai louna phongdoh
Imphal, Lhajing nisim 8: All Manipur Tribal Students' Union Manipur (ATSUM) ho Assistant Secretary, Robert Leivon in tuni chun Manipur Govt. in tribal mite lungdei ho hetthemna aneitapon chuleh bolding a kitepna aneiho, lekha tui a kijih hihenlang kamcheng a aphondoh ho hijongle, khatcha ajuitapon tin demnathu aphong in ahi.
Meetei Civil Societies (MCS) ho propaganda leh kiphinna aneiho jeh hin, ATSUM in thinglhangmi Manipur
a chengho jousen, lungkimlouna aneiy uvin alunghang gam taove ati. Hiche ho jeh ahin, achesa lhakhat sung tobanga pat chun thinglhang gamkai district ho ah boina asang tai atin ahi. Aman aseina ajong chun, Meetei Civil Societies (MCS) ho lunggel phatlou leh thilgon hoilou jeh in Churachandpur (Kangvai), Chandel (Moreh), Senapati(Mao) chuleh Tamenglong (Noney) ahin, thinglhang miho noisetah a thil kibol hon alungthimu asuhnat hi adamdoh na dinga hi phat tampi lutding ahi ati. Chuleh, Govt. in tribalCivil Societies holeh organistions ho chunga gangtah leh hoise tah in action leh counter-action, alauvin alangkhat a Meetei Civil Societies (MCS) ho langnei sihnei tah a avet thim uhi mijouse muthei ahi ati.
Hichetoh kilhona thuso kipe in asei chu ahileh, tuni chan geiya ATSUM kiphinna thupi le thu khoh tah khat Manipur Govt. in nahsah louva akoi chu ahileh, 'The Manipur Reservation of Vacancies in Post and Services
(for ST and SC) Bill 2006' ahi. Ajeh chu hiche Bill sunga hin akitohlou leh deiumlou thu umho lahdoh ding leh semphat ding phabep aumin ahi, ati. ATSUM in hiche '2006 Bill' sunga um adeilou leh dih asahlou ho jouse khat khat in adeilouna jeh toh akhelding danho abonin Govt. kom'a semphat ding in anapelut tai ati. Ahinlah datmo umtah in ì2007 Billî Govt in ahin pohdoh achun, koitobang Govt official hiche dan juilou ho aum khahleh amaho kihuhdoh nathei ding thu Clause 18 le 18A sunga athah beh in ahin pansa kit uve ati.
Hiche thuso chun aseibe na ah, hitobanga ginmo umleh lunglhei lou natah daan kisem chu vangset umtah in
Assembly in ana phatsah in, ahivangin hiche kalse kum thum lang ahitan tuni chan geiyin hiche Bill hi juilouvin aumjing nalaiye ati. Hiche hin avetsah chu ahileh, Govt. hin ichan geiya Manipur a um thinglhangmi ho nasahmo a akoi hitam ti kichentah in akimudoh'e ati. Hiche a hetding khat chu ahileh, Manipur Education Institute chu Central Institution a akikhel doh chun mijouse akipah thanom un, hinlah hiche institution ahin tribal ho reservation percentage 31 percent apat in 7.5 percent in akhesuh in ahi.
Aban aseina achun, hiche thil kikhel hin natohmun tamtah tribal miho chanding General, OBC le SC quota hoa aluttan ahi ati. Hijeh achu, ATSUM in hiche thil dihlou kibolhi state Government angoh in amahon gangtah
a asuhdih diuvin angeh in ahi. Hiche thil umchan kinoise naleh kisuhnem nahi, gangtah a Govt. in asuhdih louva ahileh khonungleh thil tamtah hung sohding ahi tin thuso chun aseiyin ahi.
