Phungthu hasei a seihi Nampi dia Damna ahi tileng mijouse alungu hang inte. Hijongleh hitobang thuhi lunggel thei kahitai tihon phatea igel uva inam sung’ u isem phat u angaitan ahi.Masanga ipu-ipateu khanglai in mijaa le migin inachang uvin hinlah tuhin hitobang chanvou chu hoilang igei uhitam? Dinmun vetset umtah iphah nau ajeh alunggel thei jouse kidong leh IKITO LOUJEH U ahiati diuchu thonlou ahi. Ikito lounau jong ikhol khol leh ‘Phung le Chang’ seijeh itiuve hilah hiche phung leh chang thu sei hin ichangei a setna/phatna aso am khol angai’e.
Namsung aboi in lungdon aumtai akiti leh phungle chang iminset sah un Thingnoimi akit jongle chutima, kilamkaina akiti jongle hitichun phung leh chang hin minset akipoh poh jengtan ahi. Hijehchun hitobang dinmun a phungthu seiding hi ahah lheh-e. Hijongleh thuchih in ‘Gaal a najolou ding chu kigoul voppin ati’ Hiche thuchih akon lahdoh thei thil thupi tah aum in ahi. Adih e phung leh chang thu kisei hi ichan gei ham khat in eikhen tauve chuti ahitahle hiche kikhenna chun thilse jengseh aboldoh dia lunggel inei nahlai diuham? Thilse umna a jong chu thilpha jong aum ji ihet lou uhitam? Hijehchun phungleh chang thu hi itiham khat in heijo lehen aph-atna tamtah mitmu a aumding tahsan lel poute. Phungthu seilouding kitihi lekha them ahilou leh ahoulim jousen aseijing chu ahi. Ahileh kum hijat phungthu seilouna dia pan ilah nau lolhing a hinam? Alolhingpoi, ajehchu Kuki Nampi hi Thisan khat mong mong chuleh Gui leh Bah kituptah a hin chingte ihiuvin phungthu seilou ding kiti chu ahitheilou-Hui lenglai mankigo pa tobang ihi bepseu diu ahi.
Tulai a mitampi kapalna chu mibolman man bol hi ahije. Kukiten phungthu sutta poute itui hi Nam chavai-Namduh dah louho thusei (Propaganda) khat epom u ahije. Vetsahna’n NAGA kahi tiho Tangkhul, Kabui, Mao add(etc) hokhun agui u abah u asut diuva ahileh akimatnau imacha mudoh theiya umlou ahiuve. Hiche jeh a chu ìUnity is Strength’ kiti thuchih khu a ngol pom u ahitai. Alangkhatía Nagate le Kukite dinmun hi akikal del in ahi. Nagate’n Gui leh Bah akikhol chan uva kikhentel diu ahin Kukite vang chute ponte phung le chang thu isut uva ipu-ipa teu igelkhoh chan uva Namsungía kingailutna pungtul tul ding ahije. Ajeh chu eiho ibonchauva thisan khat ihiuve. Namsung’a kitha-kimat, kilangkhin-kibung khen kiti hohi thisan khat ihinau ihet doh loulai jeh u ahijoi. Hijeh a chu khangthah tehi phatecha hetsah joh phajo ahitai.
Khangthah ten Insung-Phungsung thu ahin khohsah uva phungkhat leh phungkhat kikah kisam kainaho ahin hetthem teng uleh achamlou in Kuki Nampi khangtou tante.
Christian Bible injong
‘Nang naki ngailut bangin naheng nakom ngailun’ ati.
Hiche Bible changhi hoitah in gel tadi uhite. Mihem nang tobang khat nangailut ding kiti chu Nang nana kingailut kikhohsah masat tina ahitai. Nang machang kingailutna umlou a mingailut ding kiti chu jouthu ahi. Hibang’a chu Kuki Nampi kangailui-Kaponai nati thei nading’a chu na Insung-naphung sung nangailut nasemhoi masat ngai ahi. Na-insung ahilouleh Naphung nadopsang masangsea a chu Nampi nadopsang nading lampi beihel ahibouve.
Kukite ihinau Nu leh Pa Jabolna neokhat chajong neilou, Teh le khang ngailutna halkhat jong neilou mitía mulou Pathen kahouve/Katahsan'e ti itam uve. Hitichun Pathen Pathen tite ihiuvin Nu lr Pa ihepha pouve.Lakh Lakh tite ihiuvin Dangka cheng khat chengni holte ihipouve. Hitobang chun Gam leh Nam kangailui tite ehiuvin insung phungsung ngailutna dihtah aumpoi. Miphung setso nadia phung ngailu te ihiuvin ngailutna dihtah neite ihipouve!
Ipu ipa teuvin "Milungtong (mingol) hon 1,2,3,4,5 tia simding khu 1,3,5" tin asim uve "tikhu ihe uve. Ajehchu mingol hon nung leh ma ding helou a hing ahiuve. 2,4 hochu dalha uhitn 1,3,5Ö tin simleuhen dih lou ahi. Chunga ipu ipa teu thuchih (thucham) hi Kuki society hina toh kitoh chet kit ahije. Amitakip in ithusei nachan uvah Nang leh Kei in Nampi a dia pan ilah diudan asei sei jeng'e. Hichu ajo a thu kisei mingolpa lekhasim tabang chu ahi. Lunggel them tah tah hojeng injong mihem nang leh kei in Insung isem doh a, Insung phabep injong khopi lentah asemdoh hi ihethei hih lai uve. Tahsa lam leh kivaihomna dol'a seidingjong mihem
nangleh kei in Insung isemdoh a Insung tampin phungsung asemdoh a phung tampin Nampi dia na atoh dan
gel uhite. Gandhiji in 'Mijousen a Inkol (compound) cheh kisuh theng leuhen leiset chung ipidia nen nalai ding
hamî anati e. Hitia chu Eima- Insung chuleh Iphungsung ahung damteng Nampi achama damding ahitai.
Masangchun aphung phunga kiloikhomna ana umdan ahin hinlah avesuiding Nampi level a kiloikhomna kitup
ana umloujeh in phatna lam sangin setna lam ana nojotan, hijeh chun phung kiloikhom na ahung kikhah tai. Hinlah tuhin aning-aning a phungía kiloi khomna hi aumda pon ahoimo lheh e. Hijeh chun phatna ding ahileh
Any Kuki Tribe sunga phung umjousen kiloikhomna semhen lang Kuki Inpi hamkhat in vetsuina neileh dei
um kasai. Chuleh phung Insung kiloikhomna hin adeh in Zillai te themjilna lam leh Phungthu sutna (mikisemna) lama hagel khohle kadei e.
Phung kiloikhomna hohin phatmona lam amino thei ahijeh in aphatna hidi ham tia lunggel phabep:
*Nampi level a kiloikhomna hoa Phung Upa ho Jana Sangpen kipeleh Phungkhat le Phungkhat kikah a kingailutna/Kijana um inte.
*Kichen-kijon, kipa-Golnop nijongleh aphung phunga phunglamkai khatbeh alhah jou cheh hi thupinatah in kila leh dei aume.
*Phung Inpi'n Kuki Nampi dia panmun lentah aneidan geldoh jinghen
*Phung Inpi (Phungkhat) khat in Phung Inpi khat (Phung dang) jana lentah pehding geljing hen.
*Phung kiloi khomna hi Block, district, level in umda hen, khat bou chu hijenghen
*Phungmin setso kitihohi dan khoutah in kigam hen
*Phung lamkai hon Minsimna (Census) bol'u hen. Ajeh chu Kuki Nampi doudal Chin Mizo Zomi lah um
Kuki Chanu Chapa atamval tai. Amahon ahinao ahin kithah hetdoh kitdiu chu iti lainat umding hitam?
*Phung chu mitam hen lhom jongle Tribe Recognition kitiho bollouding 'Any Kuki Tribe' a aumjeng pha ahi.
Thulem : Upa khat in Thalpi le achsng kipoh in Gamleng in achetai. Agamlen na munkhat achun Humpi khat agasudoh tai. Humpi chu analung hang in Upa pa chu ahin ngih tai. Chu in Upa pan a thalpi ala doh in aban in athalpi chang ahin ladoh e. A thalpi chang chu chang nga (5) kikan kop ahije. Hichepet a Upa pa lungel chu chang Nga(5) kikan kop hin kikap jengle doulel/Na sajonte atin thalpi chang kikanlom chu a thalpi to asuton akap jengtai. Hinlah vangset umtah in Thalpi chang jong ana leng ham ham in, Humpi thasang in Humpin amajoh athat tai.
Hiche a Gamlengpa lunggel jonghi gelthei khat ahinai hinlah chusanga nasa jo di chu Thalpi chang khat khat chun kapleh atha joh ding ahije. Kuki Nampi dia ilunggel uhi Gamlengpa lunggel bepkheh tileng kaseival louding ahi. ìUnity is Strengthî kiti thuchih jong aumnai hinlah ìDiversity Savesî kiti jong aumda poi. Thuchih anigel in mangcha them uhite. Kuki chaten phung engailu behseh un (ahivanga angailut je helou) Iphung ngailut dan uhi amanchah jidan themtaote. Seikhel aumjongleh kiseipeh to uhitin adih aumleh amanchah je kijilpan taote.
