Education hi society in angaichat dungjuija heitoh ding ahibouve. Society sunga lungput ienihou vetsahna numei sanga pasal lekhasim ikhohsahjoh uhi education hin asuhdih gotding ahi. Thudoh neithei phabepchu - education hin simlai chapangho ngaichat asuhbulhitjou hinam? Vetsahnan Houleh culture toh kisaija nikho thupi hohi suti kilhanam, Suti alhalouleh chapang hochu school akaipoi tia engbolna amutheiju ahi, chapang lhahsamna neihochu avetsui hinam?
Alhasam hohi chapang dang hotoh kibang chetna education akipeh theilouleh chapang lhasamho rights chu kipalkeh ahi. Education hi society leh nam mite ngaichat dungjuijin akiheitoh theidem? Education hin nam lhomho paoleh chondan jilna ding tohgon anei hinam? Sorkar hin nam lhomhon Hindi (national language) hoitah a ajilna diuva dan asemloujeh uhin namlhom simlai hohin asanglang ahinphah teng uleh hahsatna tampi atohjiuvin ahi. Education hin HIV thuleh akiven dingdan ahil hinam? School kai simlai ho rights - chapang akum lhinglouva naham tohsah louding chuleh jineisah louding tihohi kivenbitpeh a hinam? Chapang hi kum 12 geija school kaitei teiding ahi ti dan aummin, alang khatna chapang kum 14 apat natonga goithei ahitai akitikitjeh in chapang kum 1214 kikah ho chung ahin economic exploitation aum nom'e.
Education kitihi khel hahsatah ahi. Akikhel aumleh mipin ahet themna dingin kum sottah asulutne. India leh leiset chunga economic akhantou danhi khonungleh lekha thepseh hilouva natohthep (skill) neihohi nasatah a hung kingaicha ding ahi. Natoh thepna nei semdohna dinga hi tua education hi alhingjou nadem? Education hi angai banga iumsahpeh diuham ahilouleh akhelphat hitalou ham? Industry, mipi leh nampi ngaichat subulhit dinghi education bou ahi. Society leh inchen khosah kikhelsah theihi education ahipenjeh hin education hi phat kikhel dungjuija heitoh jingding ahi. Igamsung uva education hi pumkhel angaitahjeh hin sorkar vaihomma pang alen alal hohin lunglutna neitah a pan alahnaban uva sumlut ding jonghi apohdoh diu angaije.
Education semphatna dinga bolthei themkhat hochu - Primary education hi suhtupía chapang jouse simsah ding chuleh sumlut jouse hi sorkarín apohdoh ding. Private school hohi kikumsah louding. Secondary education vanghi private school a jong simthei hiding, chuleh India gam pumpi a manthei dinga secondary
education hi suhtup ding. Higher education hi educators, citizenís bodies leh industry ho vet tupna a autonomous institutes khutnoija umding. Akisim ding syllabus hi amahohin simlaiho dinga industry a natoh munathei dinga asemdiu ahi. University hinchai khatchu kichuhna neokhat agahneileh na atohpai jengthei ding tina ahi. Secondary leh higher education a jilkung jouse hin phatche dungjuija ahetnao suhkhangna dinga seminar jaojing diu ahi. Seminar jaoleh ahetnao suhkhang dinghi athanop theina diuva jilkung hohi kitilkhouna sumjong sansah angaije. Tu a kum kichaiteng subject khatna nidan thum exam kibolsah hi aphatchomna aumpon, pannabei graduates asemdohbep ahi. Exam kibol danhi pumkhel angaije. Aphatseh a natohleh class roomía them kivet najoh hi bolding ahi.
Khangthah hon khonunga chihna thepna luttah a natohje ahinhet theina diuvin education bouhi ahi akithopithei. Ihetsaho avella pohdohkit mai maihin lolhinna hinmujou tapou vinte. Ahinlah hetna anei uva konna thilthah pohdoh theina ahilouleh natohna langa boina khat suhlhap theina aneilou uleh lolhinna mujou pouvinte. Hijehchun simlai hohin hetna leh natohje thepna (skill) hi achinphatho mai-mai uleh amaho khangteng natoh jengjong ahin kimu joulou diu ahi. Vangset umtahchu chinpha a lekha simhi Manipur a school jousen achepi nahlaijun ahi.
