Eimite apaodoh jousen newspaper ho khoh sah ding ahideh a eiho paova thuso ineihou khoh sah cheh ding itiuvin, isei themsoh keijun hinlah tunichanin ei Thadou-kuki paova kiso papers ho ahinglhum aumpon, ahingsot domho jong akhangtou aumpoi. Hiche hin papers ikhoh sah ikhohsah loudan'u kicheh tah a ahilchet ahitai. Eiho sanga hatah alhomjo Paite-kuki Paova kiso paper hojong iphah jou lou uhi aban seibeding umlou ahi. Tumasang phat sot thim tah eipaova daily paper ana umtapon hinlah bollou khoh ahi tia alungthim leh anei agou hin podoh ngap cha koima cha aumpoi.
Masang jep chun lhaseh thuso ei Thadou paova kiso tamtah ana umin amaho jong chu Malaria nat jeh a mitamtah tah athigam ji bangin aban banin ahung thigam in tuhin 2/3 ham khat thi mo hingmo tobang in aumtai.
Newspaper ngailu ho lah a angol tho loi khat kanahin, news lampang mong mong a pan kahin lah kal hi kum 10 aval tan, Thadou paova kiso Thuso ho boina hi ahe gil loi kahi tei ding katah san'e. Newspaper khat simdoh theija hinbol doh mai mai hi ichanna hahsa hitam tihi seijou ahipoi. Simtheija ahung kiso doh tengleh ahoilou nalai, akiseikhel lai, akibol khel lai holdoh ding mi ikichu tho kit uvin, lunghan nading kihol thuloi, idimset kit uvin, hethem leuhen ngailutna dimset na panpi nathei theija nahung pan joh ding ahibouve. Paper khohsah ding itiu hi kimoh sei sei ahipon, inam sunga natoh lentah neithei ahijeh a isociety ngailut najalla iseiyu ahi.
Eipaova paper ahung beihel phat in mitampia daily paper khat bol dingin eitem uve, ahin keima kanompoi, ajeh chu kagimna anatam valtan, lamlhung joulouva lamkah a kamoh thisah teiding chu kakihet ahi. Daily paper kiti hi akipat doh mai mai jong bailam ahipon, subscriber ho a kihing ahin, eiho society sung'a subscriber lhomcha hiding, patronised (eitosot ding) eibolding umkit louding, subscriber alhom nakah a paisa regular tah a pe nom lhomcheh kit ding, abang komleh subscriber hon ahinpeh kham kham hawker pan hin kiman chaikit, hiche ho jouse chunga, hitobang nasothei louding hitobang hobou naso thei ding ahi tia unwanted suggestion (forceful suggestion) hungkit jing nalai ding, hitiho jouse kanato khah lou umlou ahijeh in kanadet thei lou ahitai. Hiche hojeh a eiho Thadou speaking ho lah a newspaper hingsot thei lou, ahingsot dom hojong khang tou theilou ahi.
Tunin vangphat umtah in GOSEM news aumdoh tai, hinlah khopi lah dunga khosa eimi tamtah in subscribe abol pouve. Sangai Express English isim leh abulhing joi itiuve. Hengíe dih nante. The Sangai Express apilhingsa toh itekah uleh ipiba iseibe diu hitam? Kilungtoh tah a pan ilah uleh Sangai Express jong phah
lelna ding aumpoi.
Nam ngailu jousen eipaova paper ho ingailut ding ahi. Nam ngailu chu Pathen ngailu ahi. Paper in ichan geija
inam sunga natoh thilbol doh aneithei ham tiho ihetsoh keiju hinalou ham? Mipaova thuso paper ho bulhing lheh nante, vannoi gamtinía thusoho kimu nante, hinlah eiho nam sunga seilouva khoh ho, thuguh ho, kijah matlouva khoh ho, kiseipeh to louva khoh ho aumteng leh mi paova paper ho kimang chathei lou ahi. Hiche hi ihet soh keiju hinalou ham? Kiseisao jep leh kichapang hilna toh kiloudoh thei ahi. Masang jep chun Manmasi" kiti lhaseh thuso khat ana umin, inam sepai ho kidemto nom jeh in group khatna konna group khat demna ana kiso khah jeh in by-force in anakikhah tai. Khonung peh in hiche a kidemto teni chu ahung kihou toh lhoníin umbrella khat noijah ahung umkhom kit in, hinlah Manmasi thuso chu athipai tai, iti vangset um hitam?
Tu nai cha in ginchat phah lou hel in Gosem news chungah thu khat ahung kija pan kit'e. Gosem news in ipi asuh khel a seikhel chu kahepoi, 'Hilai muna Gosem news nahop thei lou ding ahi' kiti thu cheng ana um thu kana jan nom mo kasa lheh'e. Newspaper in suhkhel seikhel anei jong leh newspaper ma ma mangcha a isuh dih diu dol ahi. ìGosem news hilai area nahop theilou diî kiti lai tah chu adih thei lou lai tah chu ahitai. Aseipa/aseihon jong dih isah lou diu kaging chai.
Gosem news hi ipi ikilo leh apilhing theijin eimiten iphat chompi thei diuvem ti akigel khoh lai tah a hitobang thu hoijep lou hohi kiseida thei leh dei aum'e. GOSEM bol ho toh keima personal a kiheto jong kahi pouve. Amaho dinga imacha jong kahipoi, eimi lah a freelance journalist cum social worker khatna eihet jingu bou ahi. Ahin Gosem news keu ahipoi, eimi paper um jouse support kanabol jingpeh ahi. Ajeh chu ama ho tilou inam sunga kihou matna dang umlou ahi. Nampi dinga goulu khatna kagel joh ahi.
Eimipaper jousea kum 10 val tobang kajochanin article kanajih in, kalung thim leh katha le ka jung kajo khamin nam na katong'e. Hinlah tunichan in koiman siki eipepoi, paisa mu nadinga kabol ahilou jeh ahi. Paisa mu sanga kaphat mantam, katha kajung, kalung thim tampi itcha lou helía man beihelía inam ding gel khoh najoh a kapeh doh ahi.
Sopite ho, paper a thu kiseikhel aumleh paper ma ma a suh dih ding ahi. Open letter to Editor Column kikoi lo na khu hiche ho ding gelna jal ahi. News improvement umthei na dinga suggestion penom hon peh thei ahi. Inam sung dinga thilpha igeldoh jouse isotheiju ahi.
Thuso a paochang kiman dan nalung alhai lou jongleh ahoi jep nahet leh nasei thei ahi. News ahijeh a kah lah leh nang ma deilou thil khat jong hung kiso thei ahi. Khat in khat gotna thu jong hung kiso thei ahi. Hiche ho hi Editor pu lunggel hung kiso ahipon, midang in ahin peh kiso ji ahi. News hi editorial team aum vanga ama ho dei dei amoh soso theiju ahipon, mipi dei dei joh kiso ji ahi. Hiche hohi mipin hetthemlou khoh ahi.
Sopite ho, paper 2/3 neite jong ihipouve, lung han nathei aumkhah jong leh kihou toh u hitin, tupet na inei sun u eipao va daily hinkho lhinglouva moh thisah ding gel pou hite.
