Eimite lah a INA pension mu masapen chu Pu Jamkhojang Haokip ahin amahin 1972 kuma ana mupat ahitai. Hichea kipan na INA pension hungkibol pan bou ahi. Ahin INA hungkibol pan lai tichu 1973 — 76 khanglai chun koimachan INA thuchu imachan anagel pon apply anabol tehse hon jong ama hitheina dung juija ngense thei thei ana kingenseuva anabol u bou ahin, koimachan nampi thutoh kimat in anagel phapon ahi. Chusanga chu INA amuthei dinga lomlou hon jong aboluve tia eiho le eiho kidemto na anadimset joh ahi. Ki-engset tonom mite ihijeh u jong hintin ingoljeh u jong hinte.
Amuthei dinga lomlou khat le ni pension mu aumtah jongleh kipapi ding ahimaije, aneh louding beh
aneh a hichu thildih lou ahileh Pathen le ama kikah a koidoh thei ahi. Nangleh kei kisah boina ding thu
hideh lou ahi. Ihinkho pumpia thudih thutah a bon kilhing deh louva hiche laipentah a thudih thutah sei khoh ten jong ngaibehseh lou ahi. INA pension muho engset pih jeh a kiseithu bou anahin ipi thudih thutah khohsahna jeh jong anahipoi. Hitichun pension muthei kahi ti eimi tehsehon apply anaboluvin kum 10 lhingset govt lama konna kholchilna aum nungin mi 500 tabangin anabol nalah a achaina keijin mi 162 vel bep lhendoh in ahung um e. Hichehi eimi hobou ahi. Khonungpeh a apply bol jong tampi umthou ahin hinlah koimachan anamu tapoi.
Eimiten ipijeh pentah a ahet khah lou hel u Japante chu kilungtoh tah a ana panpi theiju ahidem ti hi koitabang khat in gel leh lung dong maithei ahi. Ajehchu kah lah a athanom miphabep khat thu ahipon eimi haosa tampin kihoutoh na ana neiju va Japan official hotoh munphabep a annkong sokhomna ana
neiuva Japante chu support boldinga ana kigellha jeng ahiuve. Hichehi adihtah a seidin political ideology thutah umjeh ana hibehseh lou maithei ahivanga gal len khat na a chu British ten eimi ho eina suhgenthei behseh jeh uva lungdamna ana umlou ahi. Gallen khat na laija anagenthei mitamtah gal len
nina laichun anadam jing nalaijun British te chunga phuba lah ding chu anagel jingu ahi. Japante hung kondoh chu kijen asah lheh jengu anahi. Hijehchun khat le ni thu hilouva eimiten Japan gal a India kon na Britishte nodoh nadinga nam level a pan inah lah u ahi tichu kinel nabei ahi.
Eimite galkap Sepaija anapang anatampoi Japan gal chun eimite mitampi gal kap sepaijin inalut
pouve. Japan sepai mong monga army number neija analut mong chu ana tamlou ahinai. Ahin gallai ahijeh chun sepai mong monga mi thahbeh tampi recruit bolding chu ahitheilouna tampi um ahijeh a gal sepai mong monga analut tamlou ding mong ahin, hijongleh hichelaitah a ngaichat khohpen chu gal sepai ho support bolding mitampi ngai ahi. Hiche angaicha khoh laitah a chu eimite mitamtah in pan analah uva genthei hesoh tampi anato u ahitai. Tunia mitamtah in eimi INA pension muho jong gal kap a bon jaokhalou u atiuhi langkhatna seidin adihnai hinlah gal lai leh gal kap hoseh seh khun gal ajo ahipon akithopi hojeh jong ahin ahi.
Hichea akhohtah khat vangchu sepai mong monga analut lou hochu tununga apanlah dan houhi
record kisuhtah umtheilou ding ahitan gaal behchu Japanten anajo hileh phajep ding ahin chulai khanga eimi haosa hotoh anakihou khom Japan sepai official ho jongchu aboncha tabanga gaal a thiden gam ahitauvin tununga Japan govt koma thupitah eiho panlah danho galhut theijong hitalou maithei ahi.
Eimi INA Pensioner ho boina
Mitamtah in INA pension anamuthei chu anakibol pat laichun eimi khangthah lekhathem hon gelphah in ana neipouvin, tehse lekha helou thinglhang a chengho dinga office a lhaile a thilbol chu ahahsatna tam ahin, asuh-asah jong ahetlou u ahin, alonaje ahetlou tahbeh u ahi. Hijeh a chu phailah dunga cheng eimi lekha themkhat simdoh ho imacha aning akah hebehseh louho pouvin tehse INA pension del hochu anaboipiu ahin, sumle pai tampi pi anasuh lutsah uva (ana neh mangpih uva) apet pet na ahidoh theina dinga anabol u ahin, apet tah a dinga anahi thei vanga khonunga kholgilna le vetchilna avel a ahung umphat in akiboldan kibol tampi mudoh ahitan jachat umtah in tehse ho chu govt in INA ahiuve ti a kon in1999 kum lamchun suspense ahinbol gamtan ahi.
Hicheahi tehse hochu dih lou ahipouvin, amuthei dinga lomlou mikhat le ni pension mu um jongleh hiche ho tilou adang jouse chu INA pension muthei ma ma ahiuvin, amutheilou nadiu imacha aumpon adihlouna jong aumpon hijongleh anakibol dan akisuh lou jeh a hichan chu hung gei kha joh ahi. Ihetma bang uvin government a thil kibol jouse hi akiboldan adih angaijin atahbeh hitahih jongleh akiboldan adih chetna akibol khahleh adih chule atahbeh kitichu hijeng ahitai. Tua eiho a chu tehse INA muho chu atahbeh ahiuvin ahin akibol dan adihchetna anakibol loujeh ahitai. Anakibol til bulla chu apet petna ahithei ding deina jeh a semthu - mehbeh jouthu a lekha kisemthu ana hileh akilom e.
INA pension muding chu INA sepaija apan tei teiding tithu ahidehpon, Japan sepaija apan teiding tijong ahidehpon, koihileh chulaija independence movement toh kisaija pan anala a genthei hesoh anathoh hochu pension mutheija lom ahi tithu ahin hichu political pension akitin ahivanga eimite boina chu iseima banguva akiboldan anakisuh bebsehlou (dihlou) phabeppi ana jaojeh a khonunga complaint neokhat aumleh vetchilna avela ahung umkit phatna boilo ahitai. Hiche boinahi tehse themkhat ho boina ahipon inam pumpi dinga jachat umtah ajou jouva kichem mite tabanga umdoh ihitauve. Second World War a IN A a pan kanalau ve tia kiletsah pi tah a ium nauchu jumna lentah hung hidoh theijin aumtai.
Tunin thalchoi thingnoi hon political movement base abol nauhi hiche First World War leh Second world War a eimiten pan inalah houhi pansatna a aneiju ahin, pansatna thei mong jong ahin, hijongleh tehse INA pension sangho problem koimachan ikhohsah lou uhi lungdon umtah ahi. Hichehi akicheh nakhat aumdoh a INA pension ho suspend kibol hi revoke ahilou beh leh eimite chu ajou jouva kichem mite tia history a umdoh ding ihitauve. Achutileh ajotengleh political dinmuna neisanga jachatna tah khat hungsoh doh kha leh hoilang ivet diu hitam? Chutengleh gal-len nina a pan kanalah u kana gentheiju tia inasei seihouchu jachat umtah jouthu seile bep ihung hidiu ahitai. Abangloijin kichihsah tah a INA hiloubeh tampi aumjeh a hiti ahi itiuvin ingol khon khon kit uve. Amuthei dinga lom ahi tia govt in anavet chila amusah u ahitan amaho tilouva amuthei dinga lom tamtah injong imulou u ahinalaijin hitia kichihsah tah a ngol thethu a thusei sanga nampi jachat na leh mai mohna khat soh thei ahi ti ihet diu tehse themkhat thua ilah loudiu dol ahi. Ahivangin hiche eimi INA pensioner ho thuhi eimi lamkai ho ahin politician ho ahin koi koi ihiuvin donlouvin ikoidoh tauve. Hijongleh hichehin nungleh inam pumpia jousei mite (jalen gaal satna jaoloubeh kajaove tiho) ahiuve tia history a hung umthei ahi. Eiho hi ipi iseinah vanga khonung ding gelpha behseh ki umloulai ahijeh in boina atamin ahi. Hijehchun tukhangthah lekhathem abol thei aseithei hon pan halah jep ngai ahi chutilouva tehse phabep khat boina bep a igel uleh bolkhel hiding ahi.
Kichaita
