Amasan nangle natoh khompi ho jana salam kahin pe-e. India hihen Manipur sung'a hetthei nikho manding to kisai'a Galhangsan hole India Zalen galsat phabep thusim nahintah lang nachung uvahin thusim'a eiho Kukite dia mohman dinga pamai thil tamtah kamudoh in ahi.
Eiho Kukite masang India ahiloule Manipur ho amahon agam'u neisa chunga thanei na kilah mang ding deilouna jeh in mipi adeh in lamkai hon anam ngailut najal uvin jum tamtah le tosetna anatoh un ahi. Lamkai
hon vai abol uvin khutiuvin tin aseithopon, Kapan'e kanung hinjui uvin tin amajoh akipat masat e. India gam
masanglai chun lamkai hochu kihou masa uva munkhat seh seh a Andolon anabol u ahipoi. Calcutta, Madras,
Bombay, Poona adang dang mun chom cheh a apona hon ajothei chan in amaho cheh community ahiloule society sung uva gunchu le lainatnan apangun chute jouchun agam-agama lamkaiho khat in ading khomun chule namkhat le tup kibang ahijeh uchun anamachal uvin ahi.
Lang khat'a namngailut jeh'a warrant achunga kilha khumía British Sepoy hon amu ule amat diu mihole akhailih diu Lamkaiho chun hempan'a ama le anam miho venbit nadin thingnoimi aphut un tomngai tah in apang thou thou un ahi. Lamkaiho chapang cha hia anatohga mulou laiya thisan ahiloule British hon akhailih u tampi aumin ahi. Thal kachoije kathu cheding ahitin akisuh neo naole Lamkai ding deinan anam mi khat jong ana sugenthei pouve. Martyr Bhagat Singh ahin Shivram Rajguru, Sukhdev Thapar chule adang dang ahiuvin chapang cha munchom chom apat hijong leu Lamkai le thanei nom manin na atong pouvin ahi. Agam min in na atong uvin anam min in athiuvin ahi. Khailih a aumdiu jeng jong ule kipah le mailheiselía athina diumun (Kikhailih namun) chu ajon un anam miteu ngailut najalía athidiu chu akiletsah pijoh uvin ahi.
Eiho tua ichennao State jenga jong hin Lamkai nasatah tah anaum in ahi. Gam neocha ahivang uvin Lamkaiho hihen amipi teu hileh Burmate le Britishte khut'a agam thanei nao amanding chu deilounan thagum le bolthei chan panin ana tinguvin ahi. Lamkai jin Lamkai kahe tilouvin aneo in kei aneojo kahe tilouvin apanthei nacheh uva pangin thina jong kicha louvin anam mite min in akipedoh cheh uvin ahi. Nikho khat le ni masangjep jong chun "Patriot Day" ti kiminvo chu State Governmentís department jousen jana apeuvin nikho chu nit in anaum in ahi. Bir Tikendrajit hihen Paona hihen Sir Churachand Singh hijong leu amahon amiteule agam'u minin panthei nacheh a apangun tun igam uvah amaho nikho suhmil theilouvin aumin ahi.
Eiho Kuki Manipur kimvel le North-East chule Burma gam'a anathaneite jong igam'uva thaneina kilah mangding deiloujeh chun apangthei chan pagin gamhuhnan Lamkai keu hilouvin mitamtah anakithilon ahi.
Ahin lhahsam na jeh le buldet loujong himaithei intin igam'uva itha neinao midang hon igam'u agam uvin
akailut un midang noiya iumlo tauve.
Hiche keuchu hilouvin tujeng in jong masang lai guchu ithoh leljing un ahi. Tun Kipa umtah khat chu KUKI
INPI, COPTAM, HAC chule philanthropic organization itiuvin natoh pan nading inakigon uvin tunjong
akigongte ihinailai uve. Ipi hile aphut in kiphut ute akhohpon munchom chom a ilunggel'u kibang loucheh
chu koikom hijongle seicheh leuhen nuisat iumbep diu ahi. Hitiho sang chun lungtup khat jui'a ipanthei nacheh a panphat hitalou ham! Phat ichan chebe ding hijongle Kukite chu Manipur le akimvel'a chengte hithou thou jeng ding ahi.
Igamíu mi vaipoh nanoiya um ahitah jeng vangin bolthei chan in eina bol uvin tun Sadar Hills thule MDC thuapat imachal jing uvin Lamkaiho pottho najal le khohe ho kihet themto najalin National Consultative Programme tin Kuki Inpi Manipur makainan Assam, Manipur, Mizoram, Nagaland, Tripura chule gamchom Burma akon thalheng lamkaiho lunggel kijah mat tonale avelía khatía dinkhom ding thulhuh ana umin ahi. Pathen lungset chang utin ginchat phah taloubeh chun isopiu Tripura lengvai anapote thalhengin Maharaj Pradyot ahungin kinneipan apangin ahi. Eiho Kuki chate hi mimangthai thei ihilou nau chung Pathenin suhmil in aneipoi tihi hetjing ding khat chu ahi.
Yours Sincerely,
Thanglienna Haokip
Gamphajol, Churachandpur
