Hinkho ipi ham, het themna dinga lampi baipen chu loile gol chuleh insung miten eihil chah naho ingaileh ahipen-e. Ihinkho lhungkeija hin thilthah itokhah louho iti ikimaitopi dingham tihi tantih neilouvin ikijil jingun ahi. Abang komleh eima suhkhel chuleh tohphatna a kon in simmun ikihil uvin, abangkom maleh midang hon eihilchah jiuve.
Hinkho het themna dinghin mijousen lampi chomcheh ideiju aum-e. Lampi tampi lah hin loile gol chuleh insung miten eihil chahnaohi ingaileh aphapene. Ajehchu, kihilna jousehi adihngen ahi. Naphat chompi ding ahetchenjeh uva min nahil ahi. Midanghon ahinkho uva anatokhah sauva konía ahetdoh u thilpha eihil hochu ijuileh lamlhang kilhokha louhel ding ahi. Inule pan lekhasim nathaset leh lekha nathep louding ahi atichu anahet khahsahon ahijeh a ngailutna neitah a eihil ahin, asei ingaichu eidinga manna himhim umlou ahi.

Eihil ding mi atam chan na eidinga boina ineiho asuhlhap nom'a ahi. Kihilna jatchom chomho ingaija konchun iboina sulham dinga hoichichu phapen dingham kilhen abaitai. Ineo laija tehse hon eihil nachu bu haneh in nenlang lekha jong hasim in sim in eitiuve. Inu le pa chun bu vaval lechun imutsoh in natin lekha nasim joulouding ahi atikitne. Hoichi penchu eidinga phapen dingham kilhen abaitai. Bu iva valleh tahbah a chu nilhah teng ki-imut sohpaija lekha kisim joulou ahi. Hijehchun, nilhah a lekha isim nomleh bu aphabep seuva nehding machu ngaija ahi. Min eihilna hohi lahkhomle le a eidinga aphapen ding bolna a neiding ahi. Hinkhohi thanopna thei dimset ahin, loikhat chun ahunglhung ding phat hohi akichan, adangse vangchun thanomtah in phat angah in ahi. Loile gol chuleh insungmi thilpha eihilthei kineileh hinkho a hin hahsatna kitoh lhomdom inte.

Hinkho ipi ham tihi loile gol chuleh insung miten eihilna a kon'a ihetkeu hilouvin eiman isatah a itokhah a kon injong akihe theije. En itokhah a kon na ihet hohi akicheh in chuleh akisot chin theije. Ahinlah, en itokhah hohi lhomchabou ahin hinkho aning akah kihilnan akinei theipoi. Ihinkho phat chomcha sunga thil jouse itokhah theilou jeh hin midanghon atokhah ho aseicheng uhi nakhang vangpeng'a doa kihilna a man dingin aphai. Abang komleh eile eihi phatah a ikimuchen theilou phat aumjin ahi. Loile gol chuleh insung mite hin hoitah a eihetgil ahijeh in iboina hohi ipi hija itilam pang'a lhaplhah dingham tihi eivettoh pehtheijun ahi. Vetsahnan, chapang chu nungah gollhang ahunghi dikon lehin alung kichi-ah laitah ahijeh hin lekhasim nomlouna leh school kainom louna langa kisep jong atamjin ahi. Hiteng lehin nulepa ten hinkho alahthem diudanhi ahildiu angaije. Hijeh hin, ipilang hijongleh boina inei tengleh loile gol chuleh insung mite hilnahi ngaipou pouvin aphai.

Mi loikhat vangchun hinkho ipi ham ti hetdohna dinghin mi thusei ngai sangin eiman itokhah hojoh hi athaneijoi atiuve. Ajehchu, thil kibangchet khat tohkhaho jongchun mi ahilteng uleh jatchom cheh in ahil jiuvin, hoichi penchu kilhen dingham ahethah jitai. Vetsahnan, mikhat chu huikong toukhalou ahijeh in huikonga toudinghi akichalheh e. Aloipa machun huikong touhi kichat aumnaho ngen aseijileh akichat nachu asang deo deotai. Ahinlah, ama atouni chun kichat aumlou danleh anopdanchu ahin hedoh bep in ahi. Hinkhohi pahcha tobanga pahlet ahin, ikum atam channin hinkho ipiham tihi akihahet cheh cheh in ahi.

Hinkho a kon'a ihetdoh phabephi abaijin, adangvang ahahsan ahi. Min eihilna ingai them ma ahileh amaho suhkhel hochu avella sukhel louvin akipeldoh theijin ahi. Loile gol chuleh insung mite thuhil ingaileh thil lentah suhkhelthei hochu akipeldoh theije. Thuchih khat in vadunga twikhun atingtan theiho peldohje athepjeh a twitolang geija longlhung theija ahi ati e.

Alang khat ah, thilhi isatah a itokhah teng lebou aphaase akihechen thei bepme itikit jongleh adih thouvin ahi. Thilkhat ibol phatna ibol phatga imu ahilouleh ibolsetga imu tengle hin akiching sot theije. Leiset chunga mi akibang koima aumpon, apengkop ho jengjong kibanglou ahijeh hin loile gol chuleh insung mite dinga thilpha khat jongchu ei dinga phabehseh lou ana himaithei ahi.

Achainan, hinkho ipi ham ti hetthemna dinga hin hoichi langpen kijui jongleh asetna aumdehpoi. Hinkho umdingdan hi midanghon eihil naho a konna ikijil leh apha pen-e akiti vanghin eiman isatah a ito hohi pan nabei ahi tina ahidehpoi. Eiman itokhah ho chung chon'a jong loile gol chuleh insung miten eihil nahohi kichingtup theileh aphapen hidingdan ahi. Nahinkho hi nanga ahin, kei dingin hichi hi phapen inte nati dungjuija nahinding ahimaije.