Nikhat sopi Meilhei kaloi khat toh kaki hou limlim lhonin ahi leh achai na lama chun gam le go thu kahin seidoh lhontan, aman asei ka pohnat tahkhat chu 'Na chen nao kho ho
atamjo keiho khomin ngen ahin, keiho khomin ngen ahi na ajeh lentah umtei ding ahin, hiche ho jeh a hi kachumo na diu aumpoi' tin ahinsei doh in ahi. Ajeh chu Kangchup leh Leimakhong boina thu kasei lhona kona ahin seidoh ahin, kenjong thu tamtah a nel talouvin, thu dangdang kasei pi tan ahi. Thu ijat ka houlim lhon vangin khomin ho thu asei chun ka lungsung atongkhan lungdang ka lungin aum thei tapon ahi.
Atahbeh in phate cha igah vet leh i khomin houhi mi paova kimang atamjo ahi. Adeh in i khopi domdom
houhi ahi dehset kit in ahi. Vetsah nan Sadar Hills a dinga ikhopiu Kangpokpi hi ipi tina hija hoilai ja kona chu
Kangpokpi hung kisah doh ham? Eiho pao hi mong nam? lunggil tah a gel angaiye. Eipao ahi loujeh in phat
masa lai chun Kanggui tin ahin khel un, hinlah Kangpokpi a kona Kanggui hisah ding lungna changtah a
pona ana umlou jeh un akheldoh joupouvin ahi.Iki letsah pi lheh vang uva mi ham le pao va minpu khopi a cheng ihiuve. Ilo a eima pao ngeija kheldoh thei ham mo pohna nei lamkai hon lunggil tah a gel phat ahitai. Chu
leh district khat inei sun u, Churachandpur jong Meilhei leng Churachan lengpa min ahin, hiche jong hi deilou
najeh in LAMKA tin ana khelun hinlah chunga isei banguva pohnat na dihtah nei ana umloujeh in eihon
Lamka tin iseinao vin hinlah Govt. record a lamka akimukha pon Churachandpur chu Churachandpur ahi
jing jengin ahi. Chuleh mipao mi ham a khomin inei u adang phabep ho chu: Keithelmanbi, Sapormeina,
Chingkhong, Leimakhong, Chingdai Khullen, Khamenlok, Ujung makhong, Tengnoupal, Urangpat, Khoripok chuleh adang tamtah kahet lou jong umtei inte.
Haosa pu khat koma hiche thuhi kasei leh 'Boi keiho hi kapu kapaova pat na ana kisah ah ahi tan, thiljouse hiche mina hi uma ahin, khel ding hi thil hahsa tah ahi' atin ahi. Henge thil hahsa ding mong ahi. Ajeh chu Motbung chu Laphoibung tia khel ding hileh akhela pangding sap le lengho chun achoptoh amat atho diu chu ahin, hinlah agam neite min pua khomin chu ikheldoh diu chu nom louhel diu ahi. Hinlah tuptah tah a tup a khonunga nam khankho ding mu hon vang aboldoh lel diu imacha aum pon ahi.
Vetsah nan Ukhrul gama Kuki te kholui min jouse Thangkhul khomin in akheldoh soh taove. Chuleh India sunga khopi len Bombay-Mumbay, Madras-Chennai, Culcutta-Kolkata tin akhel doh un ahi. Hiche ho jouse akikhel thei leh khel thei nading danpi um ahi jeh ahin, eiho a chu ipin atuh chom deh ding ham. Ithanei nao ikhou jengjong Meilhei te ham le pao va min isah uva lungmong sela ichen u hi lungmon na tahtah um thei ding
hinam? lunggil tah in gel in lang gelneo hihbeh in. Tuni a imacha louva nagel chun khonung teng thu lentah lhoh sat na hunghi thei ahi.
Chu ho goh hilou vin, Lhang (Area) min jong mi gam min iman hou jong kheldoh doh a eima lhang min ngeiya registral boldoh ngaitou hite. Vetsah nan; Kangchup Area, Chingdai Area, Khamenlok Area, Kangla Area leh adangdang, hiche ho jouse jonghi phate cha lhang lamkai hon geltoh chetna eipao va min ngei khat sah ding ngaitou hite. Kaki pah e.
