campaign um ding ahi. Kum 48 a upa Gillard in aseina a kal 3 masanga Kevin Rudd veihom na alah peh a Australia gama numei prime minister masapen hijong leng keiman mipi ho lhendoh hi ding kanom e ati.
Centre-left Labour Party lamkai nu hin Conservative Liberal lamkai Tony Abbott hi Australia lamkai mopo dinga akitetpi ding ahi. Gillard in aseina a tuchung Australia election um nading ahin mipi ten lunggel ni bou seh anei angaiye hichu-mahcal ding ham ahilou leh nung chal ding ham tibou gel angaiye ati. Aman aseibe na a machal ding kiti chu tahsa damtheina khohsah ding, themjilna semhoi ding, gamsung huhtup ding chuleh agam a pemlut ho jabol bolding tina ahi tin prime minister in aseiye. Hinla Tony Abbott in vang tahsa damtheina le themjilna lama funding lhom sah ding angaito in ahi.
Northwest Pakistan a thingnoi mi hon milham 16 that
Parachinar, Lhamul 17 : Assault rifles choi thingnoi mihon milham touna gari ho ana lamtin un thal a akap jeh un alhom pen in mi 16 athi in ahi. Hiche thilso namun hi Pakistan northwest mun Char Khel kho muna anaum doh ahi. Hiche kibuluna ahin milham tampi jong akitongkha e. Milham ho hin northwestern city Peshwar ajot
u ahi akiti e. Hiche mun hi Kurran gamkai ahin achesa kum 3 sungin kitha, kimat chuleh buluna aum jing jengin ahi.
Tribal miho chenna Swat Valley leh northwest muna hi Pakistan army hon operation abol jing u ahi. Major operation akichai nungin jong hiche mun ahin galguh bol ho aum jing nalai un ahi. Army ho hin adeh a Pakistan Taliban hohi suhthip ding atiu ahi ajeh chu amaho hi Afghanistan a Taliban ho sangin alam dang un ahi. US in jong army operation abolna chung Pakistan pachatna apen ahi. Ajeh chu Afghansitan a gal kibol chu Pakistan a jong akisuh thip lou leh phachom lou ding ahi akiti.
Cuba dinga thuguh apeh jing jeh a official khat ahinkho a songkul tang ding
Washington, Lhamul 17 : State Department official anahi khat kum 30 tobang Cuba dinga thuguh ana pehson jing jeh in ahinkho a songkul tang ding ahitai. Ajinu jong chutobang ma chun pan analah jeh in kum 6 leh akeh songkul lut ding ahitai. Amapa chu Kendall Myers kum 73 mi ahi. Kathem mo e tin ngaidam akithum in chuleh ajinu Gwendolyn Steingraber Myers, 72, in jong kathem mo e tin kiphonna aneiyin ahi. Ajipa Kendall Myers in anatoh sunga alodoh $ 1.7 million jong sorkar anung peh kit lhon ding ahi.
Amani nupa hi achesa Lhadou 2009 kuma chu ana kiman lhon ahitai. Amani hin FBI agent khat koma kiphonna anei lhon phat a ana mat u ahi. Amani hin Fidel Castro leh Cuban revolution chu nasatah in kithopina ananei lhon in ahi.
Myers teni nupa hin thuguh seidoh thei nadin koima het louna din "Code" amangcha lhon in ahi. Kendall Myers chu Agent 202 tin akihe in chuleh Gwendolyn Myers chu Agent 123 leh Agent E-634 tin akihe lhon in ahi. Amani hi thuguh ho chu shortwave radio amangcha lhon in ana seidoh ji lhon in ahi. Chuleh gam tampi vetsahna in Trinidad and Tobago, Jamaica, Mexico, Brazil, Eucador leh Argentina chuleh adang danga jong Cuba agents ho ana kimupi ji lhon ahi.
