Mitin hin ama insung cheh kisem phatle vannoi leiset’a hin setna umda theiyinte ti gel angaiye. Hitobang doiya chu insung semphat ding dan sei angaiye.
Insung semphat thei ahina lampi ho veu hite :
(1) Numei le pasal kicheng teni hi kingailuto a kicheng ahilhon’e.
Chujongle amani thisan’a kona peng achate lhon chu midang sangin angailu lhonin akhohsah jep thei lhon’e. (2) Hiche jeh chun numei le pasal teni chu miduhdah lou ahilhon lounah le khohsahna thei lampi aume. (3) Chapang apentil til le hin chonna phalou detsa aneipoi. Hijeh chun avelía miho phatna mun’a chenpi a semdoh theina lampi aume. (4) Chapang hin umchan le paodan ho atho a khangdoh ahijeh chun miphadom lah a khandohsahna lampi aum theiye. (5) Chapang hi aneolaiya phatecha houthu a akikhoukhah le alet teng ama cham’a thilpha a hinkho mantheina lampi sempeh theina aum’e akiti.
Insung hinkho, chapang hinkho semphatna dinga hin nu le pa hinkho ahoiten angaiye. Chapang hon
midang lungput, hindan le chondan ho athodoh uva hung khangdoh jiuva ahi. Hijeh a chu chapang ho thodoh thei lungput, hinkho le chondan aneilhon angaiye. Phatlhem’a chate muding mai maiya hinkho man jong chu chapang hon aphatlhempi theiyu ahi.
Insung semphatna dinga hin minu mipa’n hatah a lunggel le tohgon phatah aneilhon angaiye. Thilpha agellhon jouse chu chate vetdoh theiya athodoh lhon angaiye. Lam jouse a kitup chet’a ahinlhon le achate atamjo chu asemphat tei lhon ding ahi.Insung jouse aphat le khosung hinkho aphan, nam hinkho aphan ahi. Kholhang hinkho semhoina ding chun insung hinkho semhoi angaiye.
6.5. Mimal Hinkho le Kholhang Hinkho Khen theilou.
Kholhang hi mimal hon asemdoh u ahi. Mimal jouse kiladoh le kholhang chu um taponte. Kholhang hinkho aset le aphat jong chu mimal ho hinkho a kingam ahi. Hijeh chun mimal hinkho semhoi masat angaiye. Mimal jouse phaleu kholhang hinkho chu aphasa ahi.
Kholhang hinkho semphatna dinga hin lamkai pha jong angaiye. Lamkai pha le lolhing thei ho hi kholhang hinkho semphatna dia phachomtah tah aum jiuve. Kholhang hinkho semphatna ding hin namdang hindan phajo vetdoh angaikom jong aum jie. Hiti chun kholhang hinkho thu a namlen hina dingin tohding tamtah aum’e.
Contd......
