'Koima apenna kho vilding jahda louding ahi ati bannah FNR hin sorkar lamkai hotoh level chom chomma kihou chamna apatna theidin NSCN/GPRN (NSCN-IM) hin Th. Muivah in 'Goodwill Mission' achepihi velvetna aneidiuvin temna aneije.
Hetthei khatchu Th. Muivah hin 'Goodwill Mission' ati a Naga te chennalah hoa hi kholjinlea Naga NGO holeh Naga mipiho akimupiji ahi. FNR hin kumni masanga chu Naga galguhbol NSCN-IM, NNC leh NSCN-K ho kikah a kitha kimatchu ana suhtang ahi. FNR kiphudoh a patnin Naga galguh bolho kikah in kihet themto louna aum tapoi.
Forum for Naga Reconciliation hin Pathenni a thu sodinga apehnaova chun FNR hi Nagate political leh
historical rights to kitoh a Naga political group leh Naga galguhbol ho kikah a chamna aumtheina dinga
2008 kumma chu ana kiphutdoh ahi. Akiphudoh a patnin FNR hin kibung khenna, kitha kimat chuleh
kidouna ho suhbeija mijousen kinemtah a ajuithei lampi semding kiti ahi.
Naga Reconciliation process hi stage tampi kichai ahitan tuahi Naga Reconciliation process avatnalai
hojong hoitah a akichathei nadinga FNR hi amale ama akithah semphat kitding angaije, tin aseije. 'Chiangmai, Thailand gamma Lhadou nisim 18 apat 25 chan akihou naova chun FNR hin achesa lha 28 sunghi akivetleh tupetchahi 'Kisemthahna dinga thulhuhna' asemphatcha ahi, hichun aseichu FNR hi Naga Shisha Hoho in Bulte 2008 kumma anabol Naga Peace Convention nin anaphudoh ahi. FNR hi kiloikhomna leh political group koiman eipeh u ahipon amavang Pathen hung kikumna jalla kiboldoh ahi', tin FNR hin aseije.
Naga Reconciliation kichelhahpi sunga hin "lungel themlouna leh hetlouva changval hihen kiloi khomna hijongleh kathusei nao leh kakhanchan uva milung kasuh natnao um maithei jinte, hijeh chun kasuh lhasethou jouse chunga kathem mouve eingai dammun tin ngaidam kahin thummuve', kakisemthah utoh lhonnin FNR hin
Naga Reconciliation a dingahi sihnei-langneina umlou hella Nagate lunglam leh a rights u vengbit dingin kakitep uve, tinjong aseibeuve.
Khatle khat kijato naleh kihet themtona aumteng lebou kihouchamna dihtah chu umtheiding ahibouve. Hijehchun, mi themkhat leh lungel themkhat bou lahkhomma kihoucham ding tichu kibol talouding ahi. Naga te thusimhi kinah le kidouna a dimset ahijeh hin Naga te boinahi jendamma aumkit theija chuleh Naga tehi akipumkhat kit theina diuvin FNR hin Naga political group ho kommah kisihna, ngaidamna leh khatle khat
kisanto nomna lungput aneina diuvin atemmun ahi. FNR jonghin kihou chamna lampihi anom ahipoi hijongleh, Nagate kipumkhatna ding ngaichatna leh mipi Pathen henga ataonao hojeh hin Naga political group holeh
FNR hohin Naga Reconciliation akimu theina tei dingahi lampi jouse kikholla ahi. Tunia hi kihouchamna dinga kisihna, ngaidamna leh kijatona hi idei ideilou thu hilouvin angaichamong mong ahitai, tin FNR chun aseije.
Kho 26 jen Bishnupur district a lahlutdi tohgon nathua kihouna um
Lamka, Lhadou. 28: Churachandpur District ah Census 2011a dinga kho 26 Bishnupur district a lahlut
sah ding thu aum nachung a Churachandpur District Students' Union (CDSU) lamkai nan tuni jinglam nidan 11 chun YPA hall Hiangtam lamka mun a Public Meeting aum in ahi. Hiche kin ahin Students' Leaders, Church Leader, Public Leaders, holeh MDC hon maban a panlah ding thu seikhom nale gelkhom na anei jun ahi.
Hichea kihouna dung juiya chu India mihemjat state sunga kisim chu thilse ahipon ahin Churachandpur gam/lei kehna ding ahi levang phalou helding ahi dan atahlang uvin ahi. Churachandpur district hopsung a Sagang,
Dampi leh kho khenkhat chu Manipur phaicham district sunga lutsah ding tohgon aum jeh a CDSU makaina noiya meeting um danin akiseiyin ahi. Hiche kihouna thulhah dungjuiya chu Churachandpur, Sadar Hills le
Chandel a tribal ho hetloua gamsung keh nading tohgon hi kicheh tah a dinmun aum masangsea census 2011lahkhom nadinghi haisah phot ahiding injong thulhuhna aum in ahi.
Chuleh CDSU makaina noiya steering committee phudoh ding chubanna khosung haosahon Cen sus mopoho akithopi lou ding chukitle MDC, MLA, leh MP hon pan nasatah a alah diuva jong thulhuna aumin ahi.
HSLC Old Course Admit Card kihomding
Lamka, Lhadou. 28: HSLC Old Course Compartmental Examination 2010 July nisim 5 apat a Churachandpur Govt H/S muna umding ahitoh kilhonna Board hon nisim 1.7.2010 nikho leh Admit Card ahin peh doh diuahi. Churachanpur District sunga Exam ding hon Churachandpur govt H/S muna Admit Card kihom dingchu Headmaster hon Collage mun ah alah thei u ahi.
Subroto Golseh kichaita Lamka, Lhadou. 28: District Level Inter-school Under 14 and 17 Years Subroto
Mukherjee Tournament 2010 Peace Ground Tuibuong muna ana um chu tuni nilha lang nidan 2:00pm
chun phat khum kha na amang un ahi. Hiche kin ahin Pu. Paokholal Haokip MDC Henglep Constituency Jin-gun in apang in chule Pu.Ch. Shantikumar singh, Deputy Director (sports) YAS,Govt of Manipur kinnei
pan apang in ahi. Nilhah lang nidan 2:30pm in kick off under-14 chu St. Mary H/S leh CTHS ho akichem uvin, 3:30 in under-17 kick off chu Pherzawl H/S le Thangkhai H/S ho akichem uvin ahi.
Imphal Khopi sunga Newspaper kiso kit ta
Imphal, Lhadou 28: Galguh bolhon All Manipur Working Journalists' Union (AMWJU) spokesman A Mobi thadinga agih nau thucheng aman'u alah doh phat uvin angaima bangchan Newspaper hon aphondoh kitdiu ahitai. Achesa lhadou 26 nikhoa chu Kangleipak Communist Party (KCP) Lanheiba group hon A Mobi Editor Sanaleibak chu gihna ananeiu ahi. Hicheto lhonna chu phaichama thuso lakhom le thus mihon ni 2
sung kiphinna Keishampat muna ana neiu ahi. Gah hetding khatchu KCP Lanheiba loiyin KCP khatma ho thuso chu naso loudiu ahi tia thuso miho gihna ana bolsau ahi.
BBA LLB (Hons.) simnomho henga hetsahna
Imphal, Jun 28 : ICFAI University, Tripura noi-a academic session 2020-11 a dia 5-Years Integrated
BBA LLB (Hons.) simna ding thua Addl. Director of University & Higher Education, Govt. of Manipur
in hetsahna ahin pen ahi. Tua kisei BBA LLB (Hons.) hi seat 10 bouva dia application kihong ahin, chuleh koitobang Class XII chai-a, aggregate-a 50% muhon apply thei ahi.
Candidate alunglut chengse chun mark-sheet (attested copy) leh document dang ngaichat ding sese kichoi-a June 30, 2010 masanga Director of University & Higher Education, Manipur-a apply thei ahi.
Hiche chungchanga achen achai henom chan chun Director of University & Higher Education, Manipur muna dohchen thei ahi tin Addl. Director hetsahna chun asei e.
Oil Tanker 3 kimandoh
Lamka, Lhadou. 28: Food and Civil Supply Minister Y.Irabot in Churachanpur District sung'a Oil Tanker aum e ti ahet phat in Jani nikho chun Churachandpur ahungpha in Churachanpur Police hotoh kitho khom in Oil Tanker kisel ho ahol uvin ahi. Hichetoh kilhonchun Muolvaiphei mun ah Oil Tanker MZ-O1E-6373
Petrol 12000 Litres toh aman khom uvin chuleh tuni jinglam nidan 11 chun Oil Tanker MNO1-6656 aman kit uvin ahi.
Tuni jingkah chun MNO1-7627 Police Station mun jot in ahung lhai suh in Police Duty hon akham uleh kikham lou in alhaisuh pai jin chuphat chun Churachanpur Police hon Nambol Police ho thu ape uvin Nambol
mun ah Nambol Police hon ana man uvin tuni ma machun Churachandpur Police hon Oil Tanker chu aga la uvin tuhin Police Station mun a Oil Tanker 3 kiman ho chu aum in ahi. Minister Pu. Y.Irobot in Oil Tanker kiman ho Driver holeh Handyman ho abon uvin Imphal lang ah apo suh in ahi.
Manipur a thao hah nalai
Imphal, Lhadou 28: Blockade kilahdohna nisom ahitah vangin Manipur mitehin lhani masanga nitin thil ngaichat neng chetna anei houchu amujou hihlaijun ahi. Amanhah penleh amuhah penhi thao ahi. An honna gas leh gari thao hahsathi mipeten agenthei pipennun ahi. ANSAM hon Manipur Hill Areas Act 2008 noija ADC election adeiloujeh uva blockade aboljeh uhin taxi leh mipo gari hohin bahara atunni sangin alataove. LPG cylinder khathin dangka 1,500 amannin chuleh petrol litre khatnin dangka 90 amanne.
Thaokhuh neihon hapta tampihi thao akimu joupoi tin athaokhuh u akhah taove. Datmo umtah khatchu nupihon lampi panga thao ajohguh houkhu hoija alah u ahidem. Nitin ngaichat thil hohi Transporters and
Drivers Council hohin akiphin naohi angah tokah un nengjou ponte. Thilpo garinei hohin eiki sugenthei jin chuleh tax tampi eikilahpeh e tia NH-39 a hi chenomlouvu ahi. Garinei hohin Centre leh Nagaland sorkar hin Nagaland sungah galguh bolho leh NGO hohin koima suboi pontin taxjong latapou vinte tia jihtho in kitepna eipeuhen tia angeh u ahi. Hetding khatchu, Imphal leh Guwahati jotmatna dingahi NH-53 hi NH-39 sanga
tunni a saojo ahi.
Regional
Mizoram mipin tax semphat ding deiju
Aizawl, Lhadou 28 (NNN): Sempatni chun Mizoram Taxation and Revenue minister JH Rothuama chun mi tamtah hin house tax leh land tax apehloujeh hin revenue department hi nasatah in atongkha e, 'tua Land
Revenue hi kisemphahih jongleh tax hi hoitah in kidong kimleh revenue hi dangka crore 3 apat crore 10 geija mubethei ahi, tin aseije. Minister pahin Aizawl khopi a I&PR Auditorium'a People's Right to Information and Development Implementing Society of Mizoram (PRISM) hon agonnu "state level consultation on tax reforms' aga jaona a asei ahi.
Minister pa jonghin state revenue hi hoitah a achelhah theina dinga mipihon kituptah a tax apehdiuvin temna aneije. PRISM president, Vanlalruata ahoulimnaíh tax semphat ding adeina thu aseijin, sum dinmun semhoina
dinga aphapen chu tax semphat ding ahi. Tax hi kisem phaleh Mizoram economy hi hung dihdoh intin chuleh, khantouna dinghin tax semphat angaije. Sorkar seh hilouva mipi jonghin tax semphat dinghi ipomdiu ahi tin
aseiben ahi Revenue Department na official, Lalfela Sailo, ASO II, in revenue department ho hahsatna aseina a chun Mizoram Revenue Department hin land record hoitah in aneipon, tax akipe dingjat suhtoh nathei
aneipoi, tin aseije. LH Rosanga, Deputy Commissioner of Taxes hin revenue department hin tax tanglouva adonjingna dinga pan alahdiu akinepna aphonge. Mipi ahung kikhom hochun Land Revenue & Settlement Department chuleh Taxation Department hin tax adon jinglou jeh un themmo achannuve.
