~ Nenei Khongsai

India gamma hung kipandoh Yoga hi damtheina dingleh leiset chunga ihinlou hetthem theina dinga
tahsa jatchom chomma henem naleh lungel thuhje kichuhna ahi. Yoga hung kipat nahi kum 5,000 ahitai.
19th century a chun Yoga hi sapte gammah anakipolut nin, ahin sapten damtheina dinga Yoga ahin habolnao vanghi 1950 jouva patbou ahi. Yoga a hin exercise boldan tampi aumme. Yoga hin tahsa leh lungel alhaplhah jeh hin lungel suhhatna a manthei ahi. Yoga bolhon agel pennu thudoh ni aumme - Ipi nasei naham’? chuleh ‘Iti nahet hamî? Hichi thudoh tenihi Greek miching Socrates jongchun ana mangcha e.

Yoga hi science dihtah ahin, aman atup pipen chu tahsa leh lungel longdella khan bulhitsah ding, chuleh ilungthim control bolding danhi ahi. Yoga hin leiset chunga lungthim lamang theiho nung sunna chapang lungthim ngehset banga ilung gellu umsah ding agoi. Yoga hin lung monna leh kipana eipe theijin, na natohna hihen nitin nakiman chahna hijongleh nakithopi theijin, nomtah a imut theina, tha kidodohna, damtheina leh hinkho sotna eipe theijin ahi. Gancha banga kidah umtah lungput inei tehohi asudih ji e. Yoga hoitah a bolho chun a lungel control abol theijin, lhepna atoteng jongleh anang jouvin, lungel suboithei hojong anoimang theije.

Ahin, Yoga lolhingtah a boldohnom hochun leiset nopsahna jouse adalhah a ji geija aneilou ding angaije.
Lungthim hi themtah a control bol angaijin, ilung thimma kona thil phalou hochu chingthei tah a lahdoh angaije. Lungel hi namphu a control bolthei ahipon, bolgojong lechun jammang cheh-cheh ding ahibouve. Lungel namphu a control bolgo hochu saipi patjang ngatcha khatna kantum kigoho tobang bep ahi. Yoga anapodoh ho seidanin mihem lungthim adih tahbeh chu kipana a dim ahi. Hahsat gentheina, lung kicholdo louna chuleh lhisona umlouva chamna leh kipanan alodim ahi atiuve. Gamdang mihon Yoga hi magic khattou haimo tia agel ukhu adihpoi, agelkhellu ahi. Thepna dinga lekha isimbang uvahi mihem lungthim hi naosen ihi laija lungel ngehset inei banga ineikit theina dinga ahen oh hochu ol olla lhaplhah ding tihi Yoga in abol thupi penchu ahi. School leh college a chun thildang tampi kisima ahin, Yoga a vangchu eile ei kikisima ahi.

Yoga a tahsa leh lungthim training kibolhi ateh-akhangmijousen aphatchom pithei ahi. Lungel a olsah in, kicheh setnin lung akigel theijin, hijeh chun lunga pohgihna kinei hohi angaijang theije. Yoga hi ichanga bolthei ahi vangin, akipantil hochu jilkung themtah khatnin ahilphot angaije. Leiset chunga khopi len jousea Yoga kichuhna mun muthei ahi. Iphat chompi jouna dingin nikhatna pung makhai ahilouleh pungkhat beh bol angaijin, abolphat jonghi jingkah ahilouleh nilhah aphai. An nehjou leh pungthum beh khungaija Yoga bolpat ding chuleh ibol masangjep ahilouleh iboljoujep leh kisil louding ahi atiuve.
Mijousen Yoga hi aphatchom pithei ahivangin, hichi aphatchom nahi Yoga dihtah chu ibolla chuleh aniseh a thon louva ibolteng lebou akimu theije. Yoga hi jat tamtah umma ahin, hoichi penhi eidinga phapen dingham kilhenthem angaije. Vetsahnan, nupi, chapang leh golseh kichem hodin angaichatnu akibangpon Yoga jong jatchom chom akilhendiu ngaija ahikit leuve. Feltah leh kipojang khai thetna nitin hinkho manthei dinghi mijouse ngaichat ahi. Hichi ngaichat nahi itobang na kitong henlang hijong leh Yoga hin eipeh thei ahi. Yoga hin imopohna hi hoitah leh ninglhing setnin eitohdohsah theije.

Gymnastics, games leh exercise adangho sanga Yoga aphat johna tampi aumme. Amahi playground leh kichepna thil jatchom chom angai chapoi. Ni sahenlang dai kaijongleh kumlhung keija Yoga bolthei ahi. Insung, inpo, ichangseh chuleh ihonna bolthei ahi. Angaicha chu tolla phading pon sathet khatbou ahi. Yoga hi isung onpetna bou kichuh ding ahin, buva petna boulou behdin akiseije. Yoga hi kum 7 apat kum 77 changeija dinga health insurance phapen ahi akiti e. Gule chang natnaho asudammin chuleh tahsa gihcheng chung chu akilhap sah theije.

Yoga hi ateh akhang aboncha abolthei ahivangin, mi akum dungjuija achom chom boldin aphai. Vetsahnan, malanga bunleh nunglanga nung kemlhah hi chapang kum ngaleh kumsom hoa din aphan, kumsom chunglam din kibung-butun chuleh deep breathing patthei ahitai. Hijeh a hi jilkung hon hoitah a eihil masat louleh Yoga bollou aphai kiti ahi. Yoga kabolnai tia doctor hon eihil chahna ho nahsah moding tina ahipoi. Doctor kivetsah louva ichangseh a hita dammo kahin hitia kijending kahi tia adeh a thinglhang khohoa mi tampin asei jihi thil dihlou ahibouve.

Loule ai pha tampi akisemdoh phat hin mihem hinkho jong asaojep tan, tehse atamcheh tai tina ahi. Iteh teng damtheitah a hinkho mandinghi mijouse lungtup ahi. Ahin, mihi atehjep jepleh natna ahaojep jepmin, hijeh chun tehse hohi achatloh behsehji tapouve. Ichaloh lhom channa hin natna akihaove tin akiseije. Eiho geldannin tehse chu ahithei channin kicholdo henlang chaloh humhal boldaleh itiuvin, ahin igelkhel joh udan ahi. Chat louva sottah imoh touthim tengleh iphe hohi achah in ahatmojin ahi. Thil agihsa doplouhel kiti jonghi damtheina hiloudan ahi. Tehse ho dinga kichat umkhatchu dinle sangin touthim ahaboljeh un atahsao ëbalanceí pehdan alhasam taovin, hijeh hin balance leptoh theilou jeh a mohlhuh a kisukha atammin ahilouleh athipijong aum dapoi. Tehse hohin angainan imut theilouhi achingun ahi. Jana chomcha bou a imutjeh un sunteng alipjou pouve. A imutna theinadiu tia imutna lou
nehsah jonghi side effects aumjeh in thilpha ahipoi. Research bolho sei dannin tehse Yoga bolhohi abollouho sangin janleh a imuvah un chuleh a imut sungu jong asotjoi atiuve.

University College of Medical Sciences, New Delhi a Type II diabetes veiho kum 30 apat kum 60 sung hochu ni somli jenhi nikhatna minute 40 Yoga abolsah uleh ajunlhum vei uchu nasatah in anem chome atiuve. Hijehchun, Type II diabetics veiho hin Yoga gunchutah a abol uleh ajunlhum vei uchu suhnemmin aum theije. Lhumlam gamma sapte khun Yoga hi exercise leh haidan kithemchuh nan aneijun ahi. Exercise hi analou dia olcha cha tahsa kihehnem ahin, abolsot hoding vangchu exercise hi ahahsajep jep umnante. Sapte hin Yoga abolvangun Hindu houthu anatnaho vangkhu ije atideh pouvin, tahsa damtheina ding bouvin amang uve. America gamma medical schools hokhun Yoga course jong ajaosah un ahi. Damtheina ahi danhi akihetchet phat hin chapang hihen tehse hijongleh leiset chunga Yoga bolhi atamcheh cheh ding ginchat aumme. Phat ong ineija ahileh Yoga hi bol dinga phatah chu ahinai.

Hijongleh tahsa damtheina ding bepma bolla Hindu houthu natna hohi patep louva pha ahi. Chuleh, aveise hodin Yoga exercise phabep khatkhu aphapoi.