Thil dihlou nabol hihen adih nabol hijongleh aman napehtha chihcheh ahin, mi themcha bouhin thildih kabol pouleh aman ipi hijongleh pejeng inge tin akigel lhaovin, atamjo vanghin nopsah nading ahipouleh thil dihlou hijongleh ibolji taove. Thildih kiboljeh a aman kipe hochu ñ phat mantam, chamlhatna, sumle pai, lung monna, damtheina, thacholna chuleh abang komleh mitlhi puma thohkut kut nading phat aumji e.


Thil dihlou ibolleh aman leiset chungkeo hilouvin van gama jong akipe e tin Christian ten itahsan uve. School kai thase leh lekhasim nomlou hochun lekha asang simdohjou pouvin, guhchat bolhochu achai naleh aloulo jiuvin, judon leh khamna theija kitimlou hochu adamlai ni asot joupoi tihi ihesohkei uve. Bible injong thil dihlou athen, Rome 6:23 achun “chonsetman thina ahi” tin jangpetnin asei jenge. Sodom leh Gommorah miten thil dihlou abol jeh un Pathenín asumangin ahi. Christiante dingin galjona hinkhohi Bibleín eihilna houhi detchet na ihinkho uva ivuilhum uva Bible toh kitohlou umchan hohi inungsun teng ulebou ineithei diu ahi. Hijehchun, thil dihlou ikimai topiteng jongleh idinjou nadiuva Pathen galvonna ikivon jing diuhi akulle.

Ichapan laija school ikaipat tilchun ibolla ana kithada lheh ham itileh, aman ana kipe ngap chalou - tichu inopma khulai kivah theilou, lekhasim phatleh iloitoh kichep phal hitalou, hichiho cheng pihi anakilha ngapchalou ahi. Thil jouse mannei ahidanhi golseh langa sangtah a kichemdoh Mary Kom gahveu hite. Boxing suhna a ahatmona ijatvei anaum khading hitam? Hijongleh, athepna asuhsangnomjeh chun tahsa dinga phalou duchat thei tampi angollin, phat ong aneiseh a tahsa hatna thei dinga exercise abolleh tu adin munhi lhungthei bep ahibouve.

Phat chomkhat a dingin nalung mitnin lasathem hokhu gahven. Minthan naleh sum tampi amu ukhu akihen. Hichan aphah nadiuva khun aman ijat apediuvem? Thildang kiseida tajong leh kithem chuhna a vang phat tamtah asuhmangdiu hetsa ahi. Gamdanga tour ache uleh angailut insungmi, loile paite dalhan sotpi avaitham jiuvin ahi. Mi abangkhat dingin aminthan teng uleh aman apeh uchu privacy aneiji tapouve. Kotkhah phung kalkhat ikhella patna lim eilah diutoh thu eidoh diutoh, koiham athanom ding?

Mimantam themkhatcha bouhin thildih bolman ape ngap chaove. Ama hohi politician jong hithei, thingnoi lamkai jong hithei, K.S.O. lamkai ahilouleh milham jong hitheiyu ahi. Ama hohin mantamtah senga thildih ahinbollu ahitahleh mipihin ipachat uva anung ijuidiu angaije. Mipin kitoh chetna idinpi teng ulebou thildih chu inamsung uva machal theiding ahibouve. Ilah uva thil dihlou umhohi police hon kivettup naovinte tia nganse thei ahipoi. Thildih bolhochu ikipapi ngal uva ijop nomlou uleh alampiu khabing peh a kipang ahi tichu sumil poute. Ibon
chaovin lamkai leh hero akihithei poi, ahinlah atamjohi mikichase ihiuva min adih abolkhat jongchu adihnai itingamlou uva chuleh inampi ding gellouva eileh ingailut hoding bou igel uleh ichen khompiu namdang hohin tun eineh chinto taovin injoleh chotpha ajong eihin neidiu ahinalaije.

Mihem akihijeh hin, ei ikingailut banga iheng ikom ngailut dinghi atamjon akijoupoi. Hijongleh ibonuvahi iheng ikomma cheng inam mite dinghi gelkhoh louthei ahipoi. Ajehchu, namkhat kitichu akipaithei akiumpon, chuleh eihon kikhentel dingen kisom jongleh namdangho mitmua thakhat ihijeh uvin, amaho chunga thilsoh chu nang chunga jong hungsoh thei ahi. Inam mite jouse venbitna dingleh lungmongtah a achenthei nadiuchu ibon uva imopoh naovin kilah u hite. Chuteng lebou, ibon uva ikivenbit uva lungmonga ichen theidiu ahi. Ilamkai houhi anung uva dingu hitin, keiho jouse thalhenga thildih nabol houhi kakipa piuvin katosot jing uve tihi hetsah
u hite.

Thil jouse aman pehding ahijeh hin, apedinga ikigotnu hinam. Mijouse lungthima hin thildih bolna dinghi hetdimpeh gotnu hite. Aman pehding hijongleh akhohpoi, peh a lom ahi.