Masang laipeh a thilsoh ho akihet joujai loujeh hin phat chesahon tunia ihinkhou semdohna dinga ichan geija panmun aneijem tihi ahetdoh hahsa lheh e. Mi themkhat chun henasa san abang komleh phat chesa hochu ageldoh nompon ahi. Ahin, ipu-ipa khanga konna ikilahsonnu sap paova “genetic inheritance” kitihin ihung seiletna school leh khosung-vengsung ho sunghin imihi naohi ahasemdoh joh in ahi tivanghi kinelna aumpoi, chuleh “genetic make-up” hi masang laipeh a ana kigongtoh ahitai. Ihinkhou khelna thei tha ineipouve tina ahidehpoi. Ipu-ipa a konna thil tamtah ijildoh holah achun pha isah hochu imangun, ideilou ho vangchu tukhanga din manthei ahitapoi tin ipai jiuve. Khonunga kinepna inei naojong chutobang machu ahi. Ipu-ipa chu lounatong ahi manna lekha simthei louding chuleh natoh hoitah tohmo nading, sumkolvei mona ding aumdeh poi.

Jatlen jatneo kilhekhenna jonghi abeija tobang ahitai. Vetsahnan, masang laija haosa len chanu khatchu milhammin kichenpi theilou haosa cha maman bou akichenpi theijin, tunvang kho-chaga toh haosa chanu kicheng simsen ahitapoi. Chukhanga chu min ngei hohi haosa tenbou anakisah theiju ahin, tunvang ideidan dannin min ikisah thei taove. Ipu teuchu saplenho masanga kihot leuva jana anapeh jiu ahin eihon vang ibol tapouve. Pathen ihou uva education ahunglut a pathin anem-asang kilhe khenna hi adailhatai.
Ahin, thil tamtah a vanghin masang laija chonna hochu imang nalaijun ahi. Ichennao insung chuleh
ilennao society hin masang laipeh a chondan inei houchu ajuijingin ahi. Khankho, chonchanpha,
isanga len jaje, insah inlhang khoto ding tihohiakhang khanga hung kipeson ahi. Adeh a eimiten
custom inei houhi tuni geijin ijui jingun ahi. Ipu-ipa ten ana bolkhahlou custom tobanga isemdoh u phabep ñ numei ajinei teng kol hon dowry akipoh bang uva thil mantam tampi ikenpeh u, naopuina a thil mantam tampi ipoh hou vangkhu khelloi chella, ichate khang ahijoulou tah jongleh itute khang beh a ahin haimil nadiuhi gelkhoh in phante. I society uhin chihi aphan chikhu aphapoi tihi aneijin, mijousen apha ahi atihochu akijuijin, ajuilou hochu notthapmin ikoiji taove.

Masang laija ipu teuvin gal ana hasat laiju chun achateu galsatje ana kichuhsah un ahi, ajehchu achateu ahung letdoh tenguleh galsat dima ahiuve. Numei hohi tilla patnin inamsung uvah pasal sangin anemjon ana ummun, tuchan geijin adin munnu aphalheh tai kiti jongleh pasal toh kikotnin akikoihih laije. Africa gamma tribal khangthah hokhun masang laija apu-apateu ana kihadou jeh un lhang khatna achen khompiu namchom hochu avetnom pouve. Nam khatchu ahatjo namdang hon aneh chintouva gal abolkhum jing uleh, alungu kichatnan alodimmin lung lentah leh chamlhat tah a hinje athemvah thei pouve. Alang khatnah, Britain te gamkhu alang jousea twikhanglen nin aumkimvel ahijeh khun koiman gal abolkhum
theipon hijeh chun alungu alenne akiti e. Phat achesa hohi igeldoh teng inatoh ithilbol hochu akisitjin, hitia joh kanabol hitaleh akitiji e. Mi konkhat deh-deh chun phat chesa hobou agelna lammin tua aboldingho asaplo leujiuve. Alang khatnah, mi konkhat chun phat chesa hochu adonse pouve. Khonunga ipi hungsoh ding ihepouve.

Khonung thuhi donlouvin ikoithei diuvem? Donlouvin kikoithei naisai ponte. Khonung hi imohnga loudiu amavang kinemtah a aingadiu ahi. Ichate, ituteu khangleh nampi kilung tona ahin neidiu ideileh tunia hi phungle changa kihotna ho ipailhah uva lamkai thusei ijui pandiu ahi. Dettah a agamsung uva ahung chendiu idei uleh tunia hi gamle lou namdang komma ijoh loudiu Sadar Hills beh hi eiho khanga ideldohlou uleh khangkit ngah leuhen Meilhei leh Naga te kihomtel tao vinte. Ihinkhou tongkhapen vangchu ipi akisei vangin education ahi pennin, chuleh itobang education inei uham tichu malai ithusim mun apon ahi. Vetsahnan, India hi phat sottah sapte noija um ihijeh un chamlhatna imujou unjong sapte education chu ijompeh un ahi. Phat tampihi achesaho igeldoh un, ahung lhung ding phatho ilung kham piuvin chuleh tu tua idin munnu ihaimilji taove. Hitijoh hin lungput kineileh i atidem - achesa phat hoa isuhkhel houchu kihilnan kinei henlang, ahung lhung ding phat hi kinemtah in kingah henlang, tu tua idinmun uhi kihagel khoh penleh phajolou diham.