Thingnoi mihon Lahore mosques 2 lonkhum, mi 1,500 ki hen den
Lahore, Lhaphul 28 : Tuni chun manchah tampi kichoi Taliban galguh bol hon hou-in (mosque) ni alonkhum un mi 1,500 tobang ahen den un ahi. Galguh bol hon hou-in alonkhum pet un thal akap un chuleh bomb jong apohkeh in ahi. Hou-in teni chu Ahmadi sect ho kikhopna Garhi Shahu leh Model Town mun ahi. Geo TV in aseina a thingnoi mihon hand grenade asep un chuleh thal jong akap un ahi. Security forces hon amun chu aum kimvel un milham akihen ho lhadoh nadin natoh anei pan tauvin ahi. Tehreek-e-Taliban Punjab hon keiho kahiuve tin kiphonna anei un ahi. Masang jep Lhakao 12 ni chun Lahore khopi a suicide bombers hon
kailhang mun khat bomb apokeh sah un mi 45 athi in chuleh adang mi 100 val ana kitongkha in
ahi.

Telengana report akipeh lut jou teng gal um ding ahi tin KCR in gihna nei
Hyderabab, Lhaphul 28 : Sri Krishna Committe in report kum kichai lam teng apeh lut ding ahin hiteng chuleh Telengana state pilhing hisah na ding gal khohse tah um ding ahi tin TRS president K Chandrasekhar Rao in aseiye. Telengana state semdoh nadinga Centre in phatsahna anei jeh a kiphinna khongai ahin tua hi khatvei kiphinna um hen lang hileh Telengana kimu tante ati. Ollha nisim 31 jou teng gal lentah um ding ahi hiche nadinga chu kigot angaiye ati. Hiche thu hi Hyderabad a party office a mipi kikhopna khat a asei doh ahi. Congress MP YS Jagan Mohan Reddy in Warangal district (Telengana) a tour bol ding ati jeh in khangdong khat ama le ama akithat in ahi. Chuleh Jagan in tour abol got hi Telengana state pilhing hisah louna tei agot ahi tin Rao in demna anei in ah.


Air India in phatah a natoh nei pan kit ta
Mumbai, Lhaphul 28 : Air India huikong jouse ni 2 sung kiphinna ana um chu tunia pat in angaiya bang in ache lha pan kit tai. Air India natong mi 15,000 tobang in kiphinna ananei u ahi. Air India natong jousen atohmun cheh ajom kit tai chuleh 100 percent natoh achelha tai tin spokesperson in aseiye. Aman aseibe na a ahung lhung ding Lhadou nisim 1 nileh Union lamkai ho leh sorkar in kihouna anei ding ahi ati. Ni 2 sung kiphinna jeh in huikong 100 val akitol koiyin mihem 13,000 val in hahsatna atoh in chuleh Air India in dangka 12 crore ($2.65 m) amansah in ahi. Delhi High Court in Lhamul nisim 13 changeiya kiphinna anei lou diuva thupeh anei phat uva natoh hi ajop kit u ahi Mangalore mun a Air India huikong khat in toset anato jeh in mi 158 anathi in hiche jeh a chu anatong hon imacha thu asei lou nadinga management in thupeh anei chu deilou jeh a kiphinna hi ana um ahi.


JK police in Army major 1 mithat case a man ding
Srinagar, Lhaphul 28 : Jammu and Kashmir police army major khat le milham phabep in Machil sector a
dan toh kitoh lou tah in kikapto na aum e ti jeh in case abol khum un ahi. Hiche thu a thil umdan state sorkar in report angeh in ahi. Het ding khat chu achesa Lhatun 30 chun 4 Rajputana Rifles hon thingnoi mi 3 kikaptona a athi e tia anaphon doh ahin hinla Muhammad Shafi, Shehzad Ahmed leh Riyaz Ahmed insung miten milham ahiuve tia case anabol u ahi. Hiche jeh chun police hon case registered anabol un ahileh khangdong mi 3 hochu insung mite hetlouva kipuimang anahiuve. Tua hi hiche case hi hung ceh peh a tolthat case a um ahitai. Hiche chung changa army hon kithopina phatah a apeh nadin police in ngehna aneiye. Chuleh Chief Minister Omar Abdullah in jong hitobang dan dihloutah a kitha nachunga themmo na nei jouse gotna kipe ding ahi
tin aphongdoh e.

Swat a Taliban lamkai Maulana azlullah kithat ta
Peshawar, Lhaphul 28 : Taliban galguh bol lamkai kichat umtah Maulana Fazlullah chu Vahchanni chun Afghanistan gam Nuristan province a police hon athat tai tin Afghan police officer khat in aseiye. Hiche thuso hi adih ahileh Pakistan Taliban lamkai luboh ani channa a kithat hi ding ahitai. Amasa chu US drone in Baitullah Mehsud ana tha ahi. Swat muna tupet in Pakistan sepai mi 30,000 tobang akoiyin ahi. Fazlullah hi mi atam jon Mullah Radio tin jong ahe un amahi Swat a Taliban commander jong ahin koi hileh ama that aum eh $600,000 amu dinga kisei ahi. Afghan officer khat in aseina a Fazlullah hi Afghan- Pakistan gamgi kom Barg Matal muna adang mi 6 toh kithat hinte ati. Tua hi akikhol lai tah ahi tin Afghan border force chief Mohammed Zaman Mamozai in aseiye.

British PM David Cameron Downing Street a kichon lut ta
London, Lhaphul 28 : British prime minister David Cameron chu official residence Downing Street a janhi chun ana kichon lut tai. Hiche hi election aum kal 3 jouva sorkar ahin sem a pat umdoh khat chu ahi. Achenna Notting Hill akon in mi phabep in thil le anei-agou ho chuleh naovop ajinu leh acha teni chu ahin pouvin ahi. Cameron le a insung mite hi Number 10 Downing Street 2nd floor a cheng diu ahitai. Hiche mun hi British prime Minister office umna mun jong ahi. Cameron in BBC radio a aseina a tuni leh kichon ding kati ahi hijeh achu tua kachenna a jingkah breakfast achaina dinga kaneh u ahi. Hinla toh ding leh kihouna tampi kaneiyin hiche ho bol toh kakop ding ahi ati. Tua achenna Notting Hill a ainmun ajoh dem tia adoh nauva aman koima kiumsah ponte tin atot in ahi.

Numei hunam a kisuminse ho nao avop louna dia lou neh phal hita
Mexico City, Lhaphul 28 : Mexico Supreme Court in hunam a numei kisuminse hon nao avop lona dinga lou aneh thei ahi tin Federal dan um chu aphal un ahi. Hiche thu hi session 6 vei touna aum jouva magistrate mi 11 lah a 10 in NOM-046 dan chu apom lou ahi. Hitobang case hi achesa 2009 a Jalisco state Governor Emilio Gonzalez in constitution (danpi) toh akitoh poi tia case anabol apat athu hi hin kisei pan ahitai. Governor pa hin emergency pills (lou chang) neh ding adeisah lou ahi ajeh chu Catholic Church in lou neh jeh a nao vop lou ding kiti chu nao kisumang tobang ahin houdan toh akitoh poi ati ahi. Achesa 1993 kum in Paulina Ramirez (13) chu human a kisuminset jouvin nao avop in amanu in na chu suhmang ding agot vangin doctors ho anom poi. Hiche jeh chun Inter-American Commission on Human Rights in Mexican state henga numeinu le achapa Isaac chu kum 18 alhin masangse a kithopina apeh din thupeh anei uvin ah.

Palestine miho $50 million a kithopina nei ding
Ramallah, Lhaphul 28 : Palestinian labor minister in thuso miho koma aseina a ama sorkar in Israelte chenna ding in sa hon angah nadiuvin kithopina $50 million kipe diu ahi ati. Israel ho chenna dinga Palestinian mi sang tampi in na atoh uva kivah ahiuve. Hiche hin Palestine gama Israel ho hung chen lut ding ichan gei ham a atin ding ahitai. Hiche natoh lou ding asei ban uva Palestinian hon dukan a insahna a angaicha ho ajoh tapouve. Alangkhatna Israel in hitobang tohgon kinei hi gam teni kikah a chamna aum ding hahsa cheh cheh ding ahi tin phamo asa lheh e. Ajeh chu West Bank mun ahi natoh ding neilou mi tamtah um ahin chuleh natoh kham ding kiti chu thil hahsa khat ahi. Hinla Palestinian labor minister Ahmed Majdalani in ama sorkar in kithopina a $50 million kipe ding ahi ati.

Palestine toh kimaitoa a kihoui phat ahi : Netanyahu
Paris, Lhaphul 28 : Israel prime minister Benjamin Netanyahu in aseina a tu petna Palestine toh kimaito a kihou phat ahitai ati. Aman asei be na a hiche thu hi president Barack Obama toh kal kit teng akimuto lhon phat leh kasei ding ahi ati. Paris muna French president Nicolas Sarkozy toh akihou jouvin Netanyahu in malam ve a kihou ding kanom e ati. Agan nathei channa Palestine toh boina ho seikhom loi ding kanome. Chamna hi toukhom a kihou a bou aumdoh sah thei ahi tin Netanyahu in French presidential Palace muna thuso miho koma aseiyin ahi. Palestine toh kihouna hi lha masa achu ana um pan ahin tua hi khat le khat toukhom a kimaito a kihou ding bou avat tai ati.

Jamaica gama boina jeh in mi 73 athi e
Kingston, Lhaphul 28 : Security forces ho leh kham nathei a kivei miphalou (gangs) ho kikapto na jeh in alhom pen in mi 73 athi in chuleh adang mi tampi akitongkha in ahi tin thulhut akimui. Miphalou lamkai Christopher ëDudusí Coke man dinga security forces ho ache nauva kikapto nahi ana um ahi. Amapa hi US in jong kham nathei leh galmanchah case a mat dinga ahol jing u khat chu ahi. Deputy police chief Glenmore Hinds in aseina a security forces hon alonkhum na a mi 500 tobang aman e ati. Jamaica khopi pama Tivoli Gardens a kikaptona ana um ahi. Hiche mun hi Coke lalna mun ahin chuleh Jamaican prime Minister Bruce Golding parliamentary constituency ahi. US in Coke matna chuleh agama thutanna um dinga ngehna anei chu PM Golding in aphatsah to lhonna kal masa kipat achu Coke matna dia natoh anache lha ahitai. US prosecutors hon asei dung juiyin Coke hi miphalou Shower Posse drug lamkai ahi atiuve.

Indo-US kigolchatna hi 21st century adia ahoipen hiding ahi
Washington, Lhaphul 28 : Indo-US Strategic Dialogue Cabinet-level masapen aum ding toh lhon in Obama vaihomna a official luboh khat in 21st century sunga India leh America kigolchatna hi hoipen ding ahi ati. National Security AdviserGeneral (rtd) James Jones in aseina a US in India toh kigolchatna asem hoi ding ahi ajeh chu Obama vaihomna in India hi agelkhoh pen gam khat ahi ati. Aman aseibe na a World War II jouva US in vannoileiset kivaipoh ding agelkhoh tobanga lamkai le mopohna anei jing ding ahi ati. Hiche thu hi Washington Foreign Press Centre muna thuso miho henga aphon doh ahi.


Sudan president dinga Bashir in kitepna nei
Khartoum, Lhaphul 28 : Sudanese president Omar Hassan al-Bashir chu janhi election thah beh a akaidoh toh lhon in president dingin kitepna ananei in ahi. Ama hi International Criminal Court (ICC) in gal bol leh tolthat case a mat dinga ahol jing khat mi anahi in ahi. Hinla Bashir in akingohna ho tichu mi tamtah atha, numei asuhset chuleh bol gentheina tampi ho chu adih ahipoi ati. Ahung lhung ding 2011 Tolbol lha teng leh south Sudan chamlhat ding thu a vote lhahna um ding ahin hiche ahi Bashir in lamkaina anei ding ahi. Mi tamtah in agelna dung juiyin thao tui podoh south Sudan hin chamlhatna amu din asei uve. President dinga kihahselna aneina a African gam a kon Mauritania, Chad leh Djibouti ho panna in gam dang 5 akon lamkai ho apangin ahi. Parliament Hall a mipi kikhopna a Bashir in tun vang galguh kibol taponte ati.