Ukhrul, Lhaphul 19(NNN): Vanghomni nisim 19 nichun Tangkhul milham lom jousen kigoltah in tuchunga 3rd Amendment Manipur ( Hills Area) District Council Act,2008 noia Manipur sorkar in district jousea District Council kilhenna abol hi adei lounau athah behin phondoh a aneiuvin ahi. Hiche Tangkhul Milham lom hon thuso miho henga hetsahnah anei nauva, “Naga Milham lom in District Council kilhenna kinna Naga ho jouse khatcha cha jaolou ding tia kilolna palkeha , hiche kilhenna dinga pang kigo nalai nomination file bolho
chunga gimneitah a vaihom hiding ahií atiuvin ahi. Hijehin, kilhenna pang kigo nalai mi aum leh achung thu u nasatah a sei hiding ahi tinjong asei uvin ahi.

Hiche kilol lhahna hi Tangkhul Naga Long (TNL), Tangkhul Katamnao Saklong (TKS) / Tangkhul Studentsí Union chuleh Tangkhul lom tamtah hon thakhat a adin piu ahi. Council election a pang kigo ho chung a gihna
anei nauva, “Koi hitaleh, hiche kilhenna kina pang pou pou hon khosung apet peta adalhah diu ahi. Amahohi Naga te gamkai jouse hopsunga Inn chen leh louchen asem theilou diu chuleh anei uleh agou jouseu ongsuhset leh suhchip peh hiding ahií tin gihna khoutah aboluvin ahi. Chulejong, tunung tuma ajong Tangkhul ho laha alhah diu jong phal ahi poií tinjong asei beuve. Hiche Tangkhul Milham lom thulhuhna juilou aum leh, athinau hitahtah ahi louleh avangsetnau hoa Tangkhul milham jousen vetía jong akoitah loudiu ahi.

Nungvet theikhat chu ahileh, Manipur gamsunga Naga hohin, United Naga Council (UNC) kilolna leh phatsah natoh kilhona District Council kilhenna kinnahi Naga kiti khatcha cha jaulou dia thulhuh ana nei uh ahi.UNC lunggel lahi, hiche Counil Act hin Manipur thinglhang mite dingin imacha phatchomna ding apehlou ahi. Phatchompi malah, hiche hi thinglhang mite dia thigamna dinga thang kikam ahi atiuvin ahi. UNC hin (HA)DC Act,2008 hi semphat leh semtoh ahi masang se’a council election aum ding hi adeilou keo hilouva aphatsah lou mong mongu ahi.

Hinlah, hiche kilhenna hi Manipur sorkar hin boldoh ahitei nadia panmun nasatah a alah ahi. Hiche dingin, kilhenpina jong hi Lhaphul nisim 26 leh June nisim 2 adia gontup ahi tai. Alangkhat a All Naga Students’
Association, Manipur (ANSAM) in economic blockade National Highway 39 chuleh 53 tenia abol jong ache lhapeh nalaiyin ahi.