Myanmar lamlen semna di machine kithopi
Imphal, Lhaphul. 21: IGAR (South) Major General CA Krishnan in kolgam (Myanmar) te lamlen semhoi
nading kithopi na neinom jalin Engineer Plant le manchah ding Machine pehdohna kin chu Moreh khopi muna Tamil Sangam Lentol ah aneiyin ahi. Hichea dinga manchah kipe hochu ahile, 14 Engineer Plant Equipment le 18 tipper, Bulldozer BD 80 1 le 46 jat spare le Dozer manchah dangho, tipper machine a dinga spare 9 hochu
Brigadier General Tin Maung Ohn lamkaina a Myanmar Army thalhenga hung kalsong mi 15 hon akisan uvin ahi.

Hiche kin neucha hi 31 Assam Rifles le 57 Mountain Division a 9 Engineer Regiment hon agon u ahi.

Thaotui hahsat nachunga Commissioner in thuso nei
Imphal, Lhaphul. 21: Tuchung boina lhunto kisai a Cabinet Meeting touna a NRL le BPCL Petrol Pump hon Thaotui (Petrol/Diesel) aman ahiding bang tah a ajoh diu tia thulhuh anaum chu kah lah a hon dan kibol palkeh
in achatloh uve ti thulhut akimu jehin Imphal West DC/SP, Imphal East/ Thoubal le Bishnupur district hopsung’a Petrol Pump hon amaho koma phalna lekha neilou hella ajohlhah tah lou diuvin thupeh chu Pu. P. Vaiphei, Commissioner (CAF & PD) a konin akimun ahi.

Hiche dan palkeh a natong aumkhah kit ahile Ministry of Petrol and Natural Gas, Government of India dan noiya achung thu kitan ding ahitai tin thuso chun asei be’n ahi.



GSO in hetsan na nei
Lamka, Lhaphul. 21: Gangte Students Organisation (GSO) General Headquarter thulhu neina dung juiya ahung lhungding Lhaphul nisim 24 nikho tengle nidan 10:00 a patsa Tuibong Khopi veng muna General meeting umding ahi ti hetsah nah Pu. Lamlalson Gangte, General Secretary GSO a konin hetsah nah akimun
ahi. Hiche nading ahin Block tinna GSO lamkai ho le advisor ho jouse thon louva ahung lhah tei diuva temnajong akimun ahi.

Chukitleh ahung lhungding Lhaphul nisim 28 nikho a patsa Gangte Students’ Organisation Delhi
makaina noiya koi tobang pamlanga lekha simnom hoa dinga hetding khoh le thilpha ho kihoumat tona
umding ahi tinjong hetsahna akimui. Hiche thua ahechen nom aum ahile GSO (D) a mopo Lien Gnagte le Lalzo Gangte 09999376241 chule 09711971960 a kihoupi thei ahi.

TSA Chandel in demna nei
Imphal, Lhaphul. 21: Achesa Lhaphul nisim 14 jan nidan 7:15 vella Khengjoy TD Block muna BDO pa in
grenade bomb mangcha’a kibuluna aum jal chun Thadou Students Association (TSA) Chandel District
in demna chu Pu. Hempu Haokip, Information & Publicity a konin ahin neiyin ahi. Tuban hitobang thise alhut khum kit tahlou heldiuvin temna jong ahin nei uvin ahi.

NCYCF hon villhah na nei diu
Lamka, Lhaphul. 21: Northern Churachanpur Youth Clubs’ Federation (NCYCF) lamkai hoa konna
thusoh kimu dungjui yin gamsunga mitin ngaichat nehle chah sil le chen le thaotui ho aman vettup na
CDSU in abol toh kilhon a amahonjong aboldiuvin hetsahna Pu. Henkholal Gangte Information Secy. Le Laljahao Haokip, General Secy akonin akimun ahi. Hiche thuso toh kilhonna Lhaphul nisim 22 nikhoa
patsa pat ahiding jong akimun ahi.