~Rev. N. Lhungdim
Khanglui chonna ana um ho hi Khangthah ten jong jui cheh dinga pha jeng ahi jeh in koitobang abol lou le ahetoh lou ho dinga hung kisamphong ahi. Kuki Culture le Custom ahi jeh in jui thei cheh dinga thilpha ahi. Christian hinkho a jong bol thei cheh dinga hung kitah lang ahi.

Thi zinkou um ding dan Kukite chonna a Khosunga thina aum le “Zinkou akisol teiye, Zin kou dingho chu thite insunga Bepa hetpeh a kisol jui ahi. Thite in a kipan tei ding a zotna kho alhun teng le Haosate in a thu alhut ding Haosa ten akou ding te chu asei peh son ding ahi.

Zin kou ho chu ahung kinungle doh teng u le akon dohna mun-Thite in a chu thulhut anei ding
chuteng le bou ama in ajot bep ding ahi.Kho sunga Haosa chun akho chaga Insung nopni dani agelpeh a chule ahung ajui tei ding ahi. Haosa insung thalhenga mi khat a sol tei ding ahi.

Kho chaga in jong nopni- dani le a chenna khojol a Haosa chu a min phah a ahet sah tei ding ahi. SABA ahilou le Jukhom khat beh a hetsahna anei ding a suhmil lou ding ahi. Chule Haosan jong kho chaga insunga chu hahsatna le gentheina aum teng le aoptei ding kilom hi ding ahi.

Haosa in a kho aveng akhoto themía alainatpi them chu a kho-aveng aninglhing theiyin amin jong aphan chule jet le veiya ule nao sopi chengmo gehmo hon jong alhaingaiyin abel tei jiuvin ahi. Kithokhom kihukhom hinkho chu Kukite Custom ana um jing peh ahi.

Thi nikho a sakeng khai kibol Kukite custom a thi nikho teng le pute in Sakeng khai abol jui ahi.
Hiche hi Christian hitil chun ana kibol beh she tapon ahin lah khang machal in ahi le Custom ho hi jui tei dinga thilpha ahi jeh in avelía hung kibol thah kit ahi.

Sakeng chu thupi ahipon ahin apen na apute in angailutna kin nukhahpen khat abolpeh chu thil khohpen khat a ana kigel ahi. Khangluilai chun Sakeng akikhai masanga thi vui kibol louvin ana kiseiye. Tukhang vang chutilom chu ahipon ahin Pute kin nei chu abulhinna ahi.
A-thipa ham athinu ham apen na apute chun angailutna kin loupi khat abolpeh chu athipa athinu dinga jong vangphatna banga kigel ahi. Hiche hi tukhang in jong abol thei lou ho chu Christian pilhing lou banga gelna jong aum tha theiye.

Thi nikho hi Englishten GLORY DAY atiuvin Loupi nikho ahi jeh in Mi jouse thusei nikho jong ahipoi. Asei dinga lom tahhon bou thu asei ding, midang aop a hung ho jouse jong chu thusei banga sim ihi cheh uve.

Houbung in agon tilouvin midang jousen thi nikho a thusei neilou ding hitukhang a dinga khantou machal mutheina pen ahi. Athipa le athinu chun mipi ahung hojouse henga thu aseisa ahitai. Nang le kei sei angaipoi.

Chule Sakeng khai dingpen apute vang hi Telephone a kou bol lou ding aphai, Insung thalhenga mi khat ZIN KOU monga sol chu thilpha hinte. Midang seison meimaiya ahung hilouvin tuten pute chu jatah in kou hen.