Achesa thusim hohi lo khukhumma akikhel louhel dinga koitup chetthei ahipoi, ajehchu leiset thusimhi kikhel
jing ahi. Scientist ho sei dannin - ichennao leiset hi phatkhat laija chun buhbangin anatom khummin, ahung junlhah phatnin hampa louhing ahungkehdoh in amonlhan, leiset muchi tuna thei dingin ahung umdoh in achainan molle lhang gammangin ahin tomjol tai. Hinchan geihi kum sang ijat hamkhat alutne. Chaang vaihon sa baitah a akapna thei diuvin molle lhang mei ahallun, hichi meihin hampa-ganhing jat tampi ahallih in alang khatnah hampa-ganhing jatdang chujat machu ahung kisepdoh kitne.

Leiset chunghi scientist ho seidanna buhbangin ahin tomkhum kitding ahi atiuvin, chua hingthei dinga ikikhellou uva ahileh imanthah gamdiu tina ahi. Adih mongin mihem tehi leiset kikhel dung juija amaho jong hung kikhel uva tuni channa hi hung hingdoh thei ahi. Haiti gamma ling kiho a konna hetdoh theichu mitphet kahlouva ichennao gamhi kikhel jengthei ahi. Hijehchun, kikhel ding deilou hellin kidingchang melmol jengleh adihthei nadem? Leiset thusim hi kikhel jeng tahen, ijeh inem itileh tunia khonung itiu jonghi phatkhat leh hunglhung louthei ahipoi.

Idei ideilou thuchom ahin, kikhelna kiti vanghi aloutheilou ahi. Adeh in achesa kum somnga sunghin thil kikhel danhi koiman manga jong anamat phahlou ahi. Technology leh science thahatna jalla thilthah kisemdoh ho jalhin ihinkho mandan leh ilungel akikhel lheh jenge. Chihin avetsah chu kikhelna kitihi ideileh lah a idei louleh notthap thei ahipon, amavang ipel theilou joh ahi e. Thilthah kibolleh kilolhing lelkhantin, kabol ngai-ngai hi kabolleh kalung a-oi jenge tihokhu amaleh ama kilhema ahi. Kikhelna hi kadeipon keivang kahina banghin umjing tange tijong leuhen ikom ivella thil kikhel hohi eiman ikhamthei ahipoi. Kikhel ding
deilou hohin phat chomkhat jouleh aman atohngai natoh hochu amanchah nading aumtah loudan ahin kimudoh ding ahi. Ibol ngai-ngai chu ibolleh aga imuding jongchu angaima hintin, eima ikikhel masah louleh thil hohi eidinga iti Kikhel ding!

Phat tampihin kikhelna ideilou jeh un thilkhat ahilouleh mikhat chu ituhchah kheh jiuvin ahi. Ajehchu, thil hungkikhel henlang ihetkhah loubeh hunglhung leh tua idinmun sanga hi kigenthei ding ahi tia iginchat jeh ahi. Abang komleh thilhi gangtah in kikhelleh itiuvin, abang komkit maleh oltah in ahilouleh pumkhellin kikhel daleh iti jiuvin ahi. Ahin igel loulam lam asohdoh jin ahi. Thil akikhel tengleh mi atamjon
nom akisa joupoi. Thinglhanga ichenna phaija ihungteng junthah-ehthah hahsa akisah tobang ahi.

Leiset chunga hin mi jatthum aki umme. Akhatna hochun kikhelna hi thuphalou hellin asang jengun, ani channa hohin kikhelna hi apumdei pouvin, kikhelna hi thilpha imacha toh avetchep pouve. Athum channa hohin kikhelna hi abultil a adeilou vangun ollin ahin pommun chuleh aphatchom piuve. Kikhelna ahung um tengle hin hoilang penna eipuilut dingham ahethah jeh hin mi adeilou jong aummin ahi. Hijongleh,hitobang lungel hi pailhah in aphai. Kikhelna umlou hileh leiset chunga lolhinna sangpen hohi umlou ding ahi. Lolhinna ho pihi ana umlou hileh tunia hi khantouna hoija ikilah diuham.

Khantouna umhen itileh munkhatna dinchahbet jengthei ahipoi. Imalam jousea mikitet khang ahitahjeh hin chatlou hella dingthimbeh hochu midalhah in apang jitai. Tunia thilthah hungsoh jongchu niphabep jouleh alui akisoh jitai. Gari thah, in thah, natoh thah chuleh ihinkhou jeng jonghi ikhel nomdiu ginchat aumme. Ibol jouseuhi akhantou nading ingaitodiu chuleh ikom ivella thil kikhelho tohin ikikheltha hinam vetlhih jingdin phante. Uphoh bella kihonchu twi ahunglum hiuheo chun nom asan alung lhaisellin, meichunga eikihon ahi tichu anahepon, twi ahung hasat phatnin athitai. Hitobang ihilouna diuva ikichih theijuva limgehcha i-umdiu
angaije.

Hetdia deium chu kikhelna jouse hin thilpha asodoh dehpoi. Vangset umtah chu thilthah kisemdoh jouse hi mipidia thilpha ahi tia kisem ahidehpoi. Thilthah tampihi mi themkhat nin sum amuna theidia kisem ahi. Ajehchu, mihaosa leh power neihon bou thil ahin kikhelsah theijun ahi. Kikhelna kitihi min thanomtah a kaphat chomna ding ahi tia ahinbol tengle bou achuhna khat aum theijin, chuti louva mikhat chu namphun kikhelsah got jonglehen agasoh chu hoideh ponte.

Achutile Sopite ho tua Kuki kahi kitihon ipiti lampanga kikhelna hi ibol diuham? Tua ADC election um masangle hung umjou nunga hi ipiti kikhelsah gotdi ham. Ahiloule angaima banga lamkai lui ho thusei aneihou mipi atamjon nahsah louva ikoi kit diuham. Lamkai luiho pha kisalou hokhu athua seiset thoa ipiham thilpeh ahinbol teng ima kiseise ngamlou a kium kit dingham? Apha dinga mipin agelchu kikhel a pha hilouham? Oleh koima thu kilah pi toluva tua idin bang uva idin jing nahlai diuham?
Thiljouse kikhel a pha kisei soh kei ahin hiche thilpha ahi natileh nangma nakigot pan angai tan ahi. Achuti louleh tua dinmun sanga khoh jocheh a ium diu ahitai. Hichu pha nasah ahileh tua naum bangchun mi thilbol jouse seisen lang kium thimbeh jing nalai uvin.