Imphal, Lhaphul 15 : All Manipur Christian Organisation (AMCO) in tupetna Manipur miten hahsatna
atona chunga Prime Minister Manmohan Singh in pan ahin lah a boina hi apet pet a aseitoh din Manipur a Christian denomination jouse kipunkhomna in ngehna anei un ahi. AMCO in India Prime Minister lekha
athoh na a Manipur a chamna le lungmon na aum nadinga pan kila jing ahin chuleh Manipur a
cheng nam jouse hi thakhat in akigel jinge ati.
All Naga Students’ Association, Manipur (ANSAM) in national highways teni a economic blockade phat teplouva anabol jeh in state a thao twi leh nitin a ngaichat thil ho akimu tah lou jeh in mipi hahsatna asang tai tin Christian kiloikhom chun aseiye. Blockade kibol hi sorkar in state a thinglhang gama cheng mi tamtah
in adeilou AutonomousDistrict Council (ADC) elections bol dinga aphongdoh jeh ahi. Hiche chung
chonna Independent Naga MLA mi 7 ho state Assembly member ahinauva konna ahai jeh jun boina hi
akhohsse cheh cheh in ahi tin AMCO in aseiye.
AMCO in aseibe na a tua milham ho hahsatna hi ichan ahin phah ding seithei ahipoi ajeh chu Manipur
State hi land-locked ahi ati. Hiche jeh chun India Prime Minister in blockade akilah doh nadingin pan la hen lang alang langa hahsatna toh ho kihou pi dingin kouna nei hen tin temna aneiyin ahi. Chuti henlang hileh blockade leh counter-blockade kibol hi kichai in tin State a mipi ten chamna angaichat jing hi athah beh a umdoh kit ding ahi ati.
AMCO in blockade thu a PM henga thu lhut nei
