Afghanistan leh Pakistan a galguh bol ho doudal na achellhah jing theina ding leh Pakistan economy, military leh twilet hahsatna ho US in apanpi jing ding ahi tin Ruggiero in aseiye. Ningkum chun US Congress in kum 5 sunga Pakistan kithopina dingin 7.5 billion dollar package ananeiyin hichu Pakistan gam’a School sahna
ding leh mipi vaihomna det taha um na ding ahi akiti.
Hiche toh lhon chun Pakistan in agam sunga galguh bol ho nasatah in doudalna ananeiyin hinla India in hiche
sanga nasa jo cheh a pan alah din anaseiyin ahi. Adeh a Mumbai bulu a pang thingnoi ho asuhmang nadin hatah in anaseiyin ahi. Galguh bol ho thua Pakistan toh pan akila khom jinge tin White House spokesman Robert Gibbs in aseiye. Strategic dialogue ahi Pakistan Foreign Minister Shah Mehmood Quershi leh COAS General Ashfaq Kayani jong pang lhon ding ahi. Hiche kihouna hi Pentagon mun’a umding ahi.
Maharastra sorkar in medical colleges ho dia E-Library umsah kigo
Mumbai, Ellha 20 : Maharashtra sorkar chun state sunga medical colleges mun ho a E-Library facilities ho peh din tohgon aneitai. Hiche thu hi Minister of State for Medical Education Varsha Gaikwad in aseina a E-Library hin nasatah-a simlai ho akithopi ding ahi ati. Tupet in state sunga medical college 14, dental 3, chuleh nursing college 4 aume.
Achesa Lhadou lha apat chun Bachelor of Paramedical Technology (BAPMT) Course thah akibol pan in ahi ati. Minister in aseina a ama department in post graduate course 500 apat 700 in seat akitam sahbe in ahi ati.
Chuban leh Raigad district a Alibaug mun’a government medical college 3 kibol doh ding ahi ati. Hiche chung chonna Centre in Nagpur, Pune leh Kolhapur medical colleges ho a trauma centres bold oh ding in lhendohna anie in ahi. Hiche trauma centres hohi dangka 15 crore cheh lutna kisem doh ding ahi ati. Gaikwad in aseibe na a hiche colleges ho ahi operation theatre, CT scan leh Intensive Care Unit (ICU) ho jong umding ahi ati. Mumbai a um JJ Hospital banga medical college ho aum na din state sorkar in fund kithopina angeh in ahi.
Karnataka a BJP MLA akiphin ho court in athu sei panta
Bangalore, Ellha 20 : Karnataka High Court a single bench chun BJP MLA akiphin mi 11 ho petition chu tunin ngailhahna anei pan tai. Amaho hi BJP akon apam petdoh phat uva speaker pa in disqualified abol uva State Assembly a pang thei lou u ahitai. Hiche case hi Justice VG Sabhahith kom ahung lhungin achesa ni 2 sunga court in geldan kibang lou ana phondoh jouva Sabhahith kom’a kipe lut ahi tai. 10th schedule noiya hiche member ho disqualified kibol chu Chief Justice JS Khehar leh Justice N Kumar in lunggel kibang lou aneilhon ahi. Hiche phat a chu athu hi Sabhahith kom lhung ahitai.
Justice Khehar chun Speaker KG Bopaiah thulhutna chu apom in hinla Justice Kumar chun report166-page chu apom lou ahi.
BJP MLA ho chun tua Chief Minister Yeddyurappa sorkar chu tahsanna kanei lou phat uva ama party akon kahai u ahitai atiuve. MLA 11 ho leh independent MLA 5 ho chu Speaker pan Ellha 10 nia chu disqualified anabol ahi. Hiche hi Chief Minister BS Yeddyurappa in trust vote anei ding kon’a kibol anahi. Speaker pa in athilbol chu Governor HR Bhardwaj lunglhai lou anahi.
Sorkar in Vedanta refinery keh len ding phal lou
Bhubaneshwar, Ellha 20 : Environment Ministry in Orisa a Niyamgiri hills a mining project Vedanta in ana nei kigot aphal peh lou banna hiche company in Lanjhigarh mun’a alumina refinery kehlen dinga tohgon anei jong dan toh kitoh lou ahi tin aphatsah tapoi. Environment Ministry akon thulhut kimu dung juiyin company in hop-6 a refinery kehlen ding tohgon anei ahi. Hichun kum seh leh 1 million tones akon 6 million tones pohdoh ding agon chu forest law toh kitoh lou ahi ati. Hiche jeh a chu environmental clearance jong kipe thei lou ahi ati. Niyamgiri hills a alumina refinery leh bauxite mining project hi thakhat tobanga ana umkhom ahi. Mining Project pen chu environmental clearances amujou tapon hinla refinery chu kumkhat leh 1 million tones apohdoh dinga phalna ana um ahi.
Achesa 2007 apat a chu hiche refinery hi ana um pan ahitan 75 MW power plant jong anei ahi. Angaichat bauxite chu Chattisgarh, Gujarat leh Tamil Nadu akon anal ah son ji ahi. Hiche kum ma chun company in hop-6 a kehlen din petition ananeiyin hinla phalna aum masangin company in natoh anei pan tan ahi. Hiti ahijeh chun Niyamgiri mining project hi tuchan a chellha thei louva boina umjing ahi. Alangkhatna Vedanta company in Environment Ministry henga iti dan’a clearance umthei lou ham tin thudoh ananei in ahi.
Pao thu a China a um Tibetan hon kiphinna nei
Beijing, Ellha 20 : Tibetan simlai mi 1,000 vel in amaho nam chonna venbitna aum theina dingin kiphinna ananei un adeh-a amaho pao le ham khamgahna aumlouna dingin kiphinna chu ananei un ahi tin rights group hon asei uve. Simlai ho chu police kikum na louvin Tongren mun’a kijotna chu ananei un ahi tin London a aum Free Tibet campaign group hon aseiye. Tongren mun ahi Tibetan ho tam chenna pen mun khat ahin chuleh Tibetan hou lamkai Dalai Lama penna mun jong ahi. Telephone apat kihoumatna dung juiyin mihem 1,000 val in kiphinna chu abol u ahi ati. Amun a cheng mikhat in aseina a kiphinna a chun police ho akikum pouve ati.
Kiphinna chu nilhah lam’a ana um ahi. Hitobang a kiphinna aum vangin police atam um chom poi. Apet tah
in Tongren leh Qinghai sorkar lam’a konin imacha thulhut jong akimu poi. Alangkhatna Free Tibet hon
aseina a akiphin simlai hochu 5,000 apat 9,000 vel hite ati.
Amaho hin themjilna toh kisaiya Tibetan pao man lou dinga kisei chu aphatsah lou u ahi. Education reform kibol na a Tibetan pao chu Chinese paova kikhel ding tohgon umchu adeisah lou u ahi. 1950 kum’a People’s
Liberation Army hon Tibet Autonomous Region alah uva kipatna China in Tibet ahi vai ahop pan anahi tai.
Tibet gam sunga din Tibetan chu official language in aum jingin hinla Chinese sorkar in standard Mandarin pao chu nasatah a khantou sah ding angaito jing ahi.
US in ISI phalna louvin Taliban lamkai hotoh akihou-e
Kabul, Ellha 20 : Afghanistan gal akichai vah na dingin US commanders hon Pakistan Inter-Services Intelligence (ISI) phatsahna umlouvin Taliban lamkai hotoh kihou ding anom in ahi.
New York Times in aseina a kihouna aumtheina dingin Taliban Commanders ho Pakistan gam’a akisel nauva
konin NATO hon akithopi un Kabul mun’a kihouna anei kigo uve ati. Hiche kihouna chu President Hamid Karzai, Quetta Shura members leh Taliban gal kibol vesui a pang lamkai ho hetna a kibol ahi akiti e. Afghan lamkai ho jong Haqqani network hotoh kihouna anei un ahi. Haqqani Network hohi hard-line guerrilla kiloikhom ahiuve amaho banna eastern Afghanistan a Peshawar Shura ho jong apangun ahi.
Hichekihounahikhatlekhat kimaito a kihouna um ahi. Hiche hi American mite ahiloulehKarzaikipanadinga
kibol ahipoi. Afghan mipi te dinga phatchomna dinga kibol ahibouve tin Afghan official khat in aseiyin ahi. Taliban lamkai hon akisel nau mun ahin dalha un, Quetta Shura member 3 leh Haqqani Network a mi khat in hiche kihouna a chun apangun ahi.
Taliban lamkai hon agam sunguva kichatna umlou hel’a ava le thei jeh un agam uhi chamlhat mu bangin agel uve tin official khat in aseiye. Hinla Pakistan ho nopthap a aum jeh in ijou leh boina ahin sem diu ham ginmo aum in ahi. Kihouna a pang Taliban lamkai ho chu White House leh Afghan ho deisah jal in amin u akiphong doh pon ahi.
India a khantouna umlou pen Bihar a election um ta ding
Patna, Ellha 20 : Bihar state hi dan kijuilouna, vaichatna, chuleh khantouna aum louna pen state khat ahin tia kisei chu jing nikho teng State Assembly election kipan ding ahitai. Bihar a jat le nam chuleh pung le chang a vote lhahna aum jingin hinla achesa kum 5 sungin vang Nitish Kumar sorkar chun term lhing in sorkar mopohna aneiyin ahi. Bihar state ahi mihem 83 million um ahin Germany sanga mi tamjo ahitai. Social leh economic lam’a Bihar hi anukhah pen in apang jingin ahi.
Bihar a mihem 40 percent tobang hi below poverty line (BPL) a um ahin, literacy lam’a jong Indian state lah a anukhah loi in apangin ahi. Chuleh nehguh lam’a achung nung pen state ahi tin Transparency International India chun aseiye. Jing nikho teng leh member 243 lhena kipan ding ahitan tuchung hin vang caste-based politics sangin economic khantouna lam joh athupi jo tai. Kumar hin ‘developed state’ chu 2015 teng hisah na dingin avel in election atet kit in ahi. Ama dingin RJD party hi kichat umpen hidin akiseye.
Pakistan a boina jeh a mihem 50 tobang thi
Karachi, Ellha 20 : Pakistan sumkolveina munpi Karachi khopi a boina ana um jeh in mi 50 tobang athi
in chuleh adang mi 25 val akitongkha e tin police thulhut chun aseiye. Janhi seh in jong mi 12 val akikap lih un ahi. Tunin boina chu asang cheh cheh in hijeh chun Pakistan People’s Party (PPP) a senior lamkai Nabil Gabol in athu suthip dingin army ho panpina angel in ahi. Achesa Misem ni apat a athi hi 55 aval tai. Boina hi northwest a Pashtuns ho leh Urdu pao tho Mohajirs ho kikah a boina um ahi.
Jat le nam kikah a boina suthip dingin ruling party a core committee hon president Asif Zardari henga pan alah din angeh un chujeh chun President in interior minister leh law enforcement agencies ho henga thupeh ananeiyin ahi. Police in aseina a Kabari kailhang mun’a mi 31 tobang ana kikap lih e ati.
Janhi jan chun Shershah mun’a melhet lou hon thal amoh kap kap jeh un mi 12 val ana thi kit in ahi. Lhajing lha a Muthaida Qaumi Movement (MQM) a provincial lawmaker Raza Haider akitha apat in mihem
80 val hinkho abeitai. MQM hi vaihom apang PPP toh kithokhom ahi.
