Hiche chung chon ah shooting lampang’a Omkar Singh in India te Medal Tally a 8th channa Gold medal chu
analan chuban ah Gagan Narang in jong Abhinav Bindra sanga nasa cheh in 10m Air Rifle Event achun Gold medal anala kit in ahi. Hito kilhon chun Anisa Sayeed in jong numei lam ah 25m Women Pistol Event achun gold medal mama ana lakit in ahi. Hiti hin tuchan Medal Tally dung juiyin India tehi anichanna Australia ban
ah aum jingin ahi.
CWG twije kitetna’a Goddard, Coutts in Gold ; Hasall in Bronze joh mujou
London, Ellha 6 : Premier League Champions vel 18 ana hita Liverpool Football club hi Boston Red Sox ten achoh diuva kinoptona anei tauve tin amaho official website akon thulhut akimui.
British thuso ho akon mudoh theichu ahileh Liverpool holeh New England sports ventures Boston Red Sox hokah a kinoptona jong aumtai tia phondoh ahi.
Hitia kinoptona hin Liverpool Club in Royal Bank of Scotland kom’a dangka (250m Pound) anabat ho jong kisa jou inte ahinlah tu tadia kajoh nom louvang in alou theilou inaumtai tin Liverpool Club neipa Tom Hicks leh George Gillett Jr in a-it nathu ana phongdoh lhon in ahi. Delhi, Ellha : Kum 27’a upa Goddard chun achesa kum 8 masang chun Manchester tolpia champion anala in, chu’in Melbourne tolpi achesa kum 4 masang achun ana lhaso in, ahin tuhin vang lolhin na neiho dinmun sangpen’a ahungle lhun kittai.
Leisemni (Tue) nikho nia 50m butterfly twije kitetna’a gold anala, Halsall chu 100m freestyle kitetna’a son umtah khat ahi in, hinla tha lhahsam najeh in bronze (mun 3na) joh ana kisantai.
Goddard hin Olympics a pan ana neiye. Achesa kum 2004 Athens Games achun a4na’a anapang in, ahin
tuchung Delhi tolpia chanmun sangpen ahin kisan nahin phatsot tah, hitobang chanmun anei nading ahin ngajing chu molso in akoitai.
Athens tolpia goljona, themcha’a ana kisam hiche jou’a kon chun kum 2 jen hiche twije kichepna akon chun anachol nga in ahi. Ahin tun Commonwealth record thah 1 twijena, minute 1 le second 55.58’a ahinlah
tolhonin ama’n, hiche sang’a hatcheh thei nalai ding injong aseiyin ahi.
“Tunaicha chun kalengkou kisuh khahna neokhat kana neiyin, ahin hichu phate’a adamtoh lhonin hatcheh ding
kadei in ahi” chhule “Hiche (kitetna) hi kitet gangna ahi ding kahe’in, hijeh chun hiche kitetna a masat lamkaina ding in kimapat dohding in kana kigellha in ahi” ti’n Goddard chun aseiyin ahi.
Australia akon hungkon teni Gareth Kean le Ashley Delaney, amani hin pungkal simna’a, nidan 1:57.37 le
1:58.18 cheh in anahat lhonin, silver le bronze ana kisan lhon ta’n ahi. Matah’a ana kipatdoh nale anakino behseh jeh in Hasall chu 25m final achun ana lhasam lota’n, hichun Australia mi Alicia Coutts johchun gold anakisan in ahungkon khompi Emily Seebohm chun silver anakilah tan ahi.
Tuchung Commonwealth Games ahi Hasall in world silver le European gold analah naho lah’a akoikhompi ding amujou tapon ahi. Hinla kitetna dang (other disciplines) ho’a chanmun – munsangpen’a alhunding kinepna, alha naipon ahi. Alangkhat’a Coutts chun 200m individual medley title aneina ban’a, pungkal sim
nidan 54.09 a lolhin na anei tolhonin gold 1 alahbe in ahi. 200m medley’a silver le 50m butterfly’a bronze anasang, kum 18’a upa Seebohm chun nidan 54.30 lhin na neiyin, silver anala in ahi.
CWG a India wrestler mi 2 in medal mukit ta
New Delhi, Ellha 6 : Vahchanni (Wed) nikho nichun mibon (wrestler) Rajender Kumar le Sunil Kumar teni chun India pumpi kipana beding in Commonwealth Games’a Greco-Roman style wrestling achun gold le bronze ana bondoh lhonin ahi. 55kg category achun Pakistan mi Azhar Hussain chu 11-0’a ana botlhuh jeh in
gold anachang ta’n, 66kg loi’a chun Wales akon Hawthorn chu sunil in anabot lhuh tolhonin in bronze ala in ahi. Azhar toh akisuh tolhon apatna akonin aboltheina le ahatna vetsah na’in Rajender chun Pakistan mipa chu vei 2 jen aleh lhu’in, gangchelin 5-0 alhunpaiyin ahi.
Chutichun Azhar injong kilethuh na’in akibotpi pachu hatah in ahin meiyin anahthi geiyin Rajender chu alonlo in ahi Hinla gold medal lahna ding chun iloipa’u Rajender chun anahthi lon geijong khohsahna neilou in kilethujna nasacheh ahin neitolhonin period a2 chan na achun goljona ahin neiyin ahi. Nimasa (Leisemni) chun India in Greco-Roman style’a kibotna in gold 3, Ravinder singh (60kg), Sanjay (74kg) chule Anil Kumar (96kg) holoi goljona jalin, analhit ahitai.
