Kuki ten kho thah sem hi ithisan uva um ham, mi noija umnou loujeh ham, asopi aheng akom kisan’a cheng theilou ihijeh uham ahilouleh sorkar akon nehding sum lepai themkhat dei jeh ham, tu “21st century” chan geijin kho thah sem ikitet tho nalai jeng uve.

Til’la chu gam ong thinglhang anatam in puncha pasal tamte chun kho thah asat jiu vin ajeh pi pen chu ahileh thinglhang lou vat loubol navah na ding ahi. Ahin ipu ipa teo hat laitah (Kuki rebellion 1917- 19) chun kho khat chu in tamtah chuleh haosa khat jong chu leng tabang khat ana hijeng ahi. Hi jeh chun kho kivaipohna hihen gal le tol hileh kitup tah le kisuhsel anahiuve. Tulaiya Eimite kho hohi kho lhing tithei tampontin abang khat ho vangchu akho min leh haosa pa minbou lekha a (sorkar hetdia) um mai mai hinalai ahi. Hi che hi i-christian hou utoh akito lou keo hilou vin tu le tua jong kho neo chacha a ichen uhi khantou machal na ilah uva umlou ding, ijo gal thu hung khoh kit nileh kho neo cha cha hochu ato ding hetsa ahi.

Jong-in athina aginge bon kiti ahin Eimiten vang ithinao jeh jong ihepouve. Gaal ina toh jing uve, khonung leh kitoh kit tapone tithei ahidehpoi. Jat le nam gal himong hih jongle thingnoi ho leh sorkar kiboina ahung umkit ni leh, Mizoram a sepai hon anabol bang uva chu Eimi kho neo chacha ho jong ‘operation’ bol navah nadia ida ichamlou uva ahin gopkhom thei u hinalai ahi. Midang hon ‘town’ jotna khopi, kholen semdi akitet lai in Eimiten khothah khoneo cha cha iki hop khen jing nahlai uhi nam lamkai hon agel khoh dinga dei umtah ahin,
vangset umtah in ‘vote’ sem nading ham le ‘fund’ muna ding jehham in khothah sem akitettho ibang leo taove.

Kholen kho lhing khatna chu achamlouva khantou machal na umding ahin, sorkar injong khantou nadinga thilpeh natoh abol tei ding ahi. Vetsah nan, kho lhing khat umnah a chu, sorkar in jong ‘school, primary health centre’, lentol, adang dang abolthei ahi. Sumlepai inchen louchen nalam ma jong mi atamchen khom teng machal na umtei ahi.

Hiche adih apha henasasa kho thah isat jing u chu ajeh dang dang umjongleh haosa khat hinom na ahin chuleh tu tua “job card” phatchomna dei jeh ahipene. Ahin khoneo cha a haosa hi vang chu humpi mei sanga mengcha lu deijoh na ahin phachom di hinam, chuleh “job card” jong hi tonsot na umdi ahidehpoi. Kho chaga jong chu achenna khoa kihol tah a achenna khosung mikhat hina a sorkar akonna hihen kho kivaipohna hileh achandidol achan thei leh kichaova khothah sat di koiman godeh ponte.

Eima chang phatchomna ding hilouva inam leh gam pumpi di igel uleh I kho chen u iveng chen dan u kisemtoh dihi thil khoh tah ahi.