Beijing, Lhamul 16 : Chinese leh German company hon trucks leh power equipment leh adang dang semdoh na din billion dollars tampi kinoptona ananei lhon tai. German Chancellar Angela Merkel in ni 4 sung China akholjin na a German company luboh phabep jong akipui in
chuleh gamteni kikah a sumkolveina hat sah dingin jong pan athah beh in alauvin ahi. Achesa kum phabep sunga Merkel leh Chinese Premier Wen Jiabao hi ana kimuto jing lhon in chuleh vannoiya economic dinmun semphat nadin pan alakhom lhon in ahi.

China leh Germany in hahsat na tampi atoh lhon in ahi tin Wen in Great Hall muna Merkel lemna a aseiyin ahi. Kum khat sunga hi China leh Germany hin sumkolveina $ 100 billion val anei jing lhon ahi. Hiche chung chonna German Company ho adeh a Siemens leh BMW ho hin China a sum tampi avei tong u ahi jeh in brand min ache lheh jengin ahi. Wen in aseibe na a European Union in hahsatna ato ho akon akido doh ding kinep aume ati. China dinga European Union hi sumkolveina lenpen ahi.

Tuthah ahi chan-energy technologies ho pohdoh na dingin 124 million euro kinoptona jong anei lhon in ahi.

Microsoft co-founder in anei-agou kithopina a pedoh ding

San Francisco, Lhamul 16 : Microsoft co-founder paul Allen chun anei-agou $ 13.5 billion lah a atam jo chu charity ho hoppeh din kitepna anei tai. Hiche kitepna hi Bill Gates leh Warren Buffet in anei-agou lhon akeh keh a kithopina a peh doh dinga aseilhon jou a Paul in kitepna hi anei ahi. Allen in aseina a kathi jouteng jong leh kithopina natoh kanei hohi ache jing ding kanom e ati. Amapa hin kum phabep sunga charity a apeh doh hi $ 1 billion alhing tai.

Philantropy a kakipeh doh nahi akum kuma ache jing ding kanom in chuleh khonunga hung seilen miho phatchom na anei diu kanom e tin kum 57 a upa Allen in aseiye. Tupet ahi vannoiya ahaosa pen mi ho lah a Allaen hi 37th channa ahin aman $ 13.5 billion aneiyin ahi tin Forbes magazine chun aseiye. Allen hin 1975 kuma chu Bill Gates toh Microsoft ana semdoh lhon ahin hinla aman 1983 kum in Microsoft Company ana dalha tai. Ningkum Phallha chun Allen hi non-Hodgkin’s lymphoma natna avei in chu apat chun Chemotherapy in ana kijen in tun vang tahsa dammo na anei tapoi tin David postman chun aseiye.

Pak in Balochistan a boina India angoh chu adih ahipoi : Krishna
Islamabad, Lhamul 16 : Pakistan in Balochistan a boina ana um chu India panpi na jeh ahi ati chu photchenna khatcha jong ape poi tin tupet a Islamabad a kholjin External Affairs Minister SM Krishna in aseiye. Aman aseibe na a India leh Pakistan chamna le khantouna lama kitho khom jing ding akidei in hiche jeh chun Balochistan a boina chunga New Delhi in imacha hetna akinei poi ati. Hiche kingohna hi adih mong ahi tia pakistan akon photchetna kingah jing ahin ijem tia photchenna aum khah tah jong leh India sorkar in bolthei ipi ham kibol ding ahi ati.

Hiche thuhi Pakistan journalist hon thudoh anei nauva adonbut ahi. Mumbai khopi kibulu a mi 166 athi jouva pat gam teni kihou na ana umlou chu tuchunga India leh Pakistan External Affairs ministers teni in kihou na aban jop nadin phat sotpi ana kihou lhon in ahi. Hinla amani kihouna akon machalna seidoh thei anei deh lhon poi. Amani hin maban a iti machalna umthei ding ham agel lhon ahi.

Achesa kum 4 sunga chamna dinga pan kila ho mohseh ahilou nadin athah beh in lunggel-ngaito akineiye. Hiche jeh chun tuchunga kihouna hi thupi tah ahin khonung teng jong leh kihouna aum jing ding akigel e tin akihou jou lhon in Qureshi in aseiye.

Kashmir a galguh bol ho alut jing thua Pakistan in ima akihepoi : Qureshi
Islamabad, Lhamul 16 : Pakistan Foreign Minister Shah Mahmood Qureshi in aseina a Jammu and Kashmir a Pakistan akon galguh bol ho aguh a ahet jing thua imacha akihe phapoi ati. Hiche thu hi India a atoh mun kibahpi SM Krishna toh akihou chai lhon jouva thuso miho koma asei ahi. Aman aseina a gam danga galguh bol ho tosot ding chu Pakistan policy ahilou leh Pakistan intelligence agency ho lunggel ahipoi, hinla hitobang chu aum khah tah a ahileh amaho chu gotna peh ding ahi ati.

SM Krishna in Pakistan akon Jammu and Kashmir gama boina sem a hin kisol lut atam cheh cheh in amaho hin India suhkeh ding agot u ahi tia asei jouva kon Qureshi in donbutna tobanga aseidoh ahi. India in vang Jammu and Kashmir state a Pakistan in galguh bolho akithopi in chuleh galguh bol ho kichuhna jong apen ahi tia themmo achan jing ahi. Hinla Pakistan in Kashmir mite chu athu abou kitho pina kinei ahi ati. India leh Pakistan hin Kashmir gam hi kichu jing lhon ahin chuleh agam jong atoupha cheh cheh lhon ahi.

Lhatun apat Gulf a thao put chu BP in sempha ta
New Orleans, Lhamul 16 : BP in aseina a achesa lha 3 sunga Gulf of Mexico a thao put chu akisem pha in kinep chu thao aput doh aum tapoi ati. Senior vice president Kent Wells in aseina a BP engineers hon hiche thao put na chu 2.25pm vel a chu asemphat u ahitan tun vang twi lah a thao aput tapoi ati. Gulf of Mexico a thao aput lou kahet chun kakipah lheh e, hinla hiche hi apatna bou ahi nalai in imacha seithei ahi hih laiye ati. Tupet tadin ima asei ahahsa e ajeh chu ahung lhung ding pung kal 48 hrs sung hi poimo tah ahi tin Louisiana Governor Bobby Jindal in aseiye. Thao put semphat na dinga lha phabep natoh ache lha in tun kisem pha jong leh gal akichai hih laiye. Ajeh chu thao hochu twi lah a um jing nalai ding ahi ati. BP in hiche thao ho suhtheng nadin anei-agou 20 billion dollars ajoh got ahi tin Financial Times chun aseiye.

Typhoon Conson umjeh a mi 23 thi, tampi kiholmo
Manila, Lhamul : Philippine solam panga typhoon hat tah aum jeh in mi 23 athi in adang mi tampi akiholmo in ahi. Akihol mo hohi atamjo nga man mi ahiuve. Sepai aja a sim in rubber boats leh nga matna kong neo ho atol un nga matna kong neo ho atol un ngaman mi 59 ho chu ahol un ahi tin regional military spokesman Major Harold Cabunoc in aseiye. Abon un kimu hih jong leh mi themkhat beh vang ahinga kimu ding kinep aum e tin aseibe in ahi. Kon khat chu twi kol gam neo neo va ana um diu ginchat aume tin Cabunoc in aseiye.

Ngaman ho kong akibuh khup jouvin sepai hon mi 8 ho twi kol gama umchu ana huhdoh uve. Hinla
mikhat vang chu athi tai tin Cabunoc in aseiye. Ngaman ho kong akibuh khup jouvin sepai hon mi
8 ho twikol gama umchu ana huhdoh uve. Hinla mi khat vang chu athi tai tin Cabunoc in aseiye. Philippine gam hi pacific a typhoon belt muna um ahin kumseh leh typhoon 20 tobang um jing ahn hiche ahin mihem aja a sim thei ji ahi. Laguna governor Jeorge Ejercito in aseina a mi 6 athi in chuleh anche louhing tampi asuse e ati. Sorkar weather station in aseina a typhoon Conson chu South China Sea a aum in southern China ajon e ati.

Iran gama mosque kibulu, mi 26 thi
Tehran, Lhamul 16 : Iran gama Sunni tamna southeast muna Shiite mosque suicide bomber mi 2 in abulu lhon jeh in alhom pen in mi 26 athi tai tin local lawmaker khat in aseiye. Zahedan a kon parliamentarian Hossein Ali Shahriari in aseina a bomb ni apokeh na jeh in mi 300 val akitongkha e ati. Hiche kino khumna hi Afghanistan leh Pakistan gamgi kom south eastern Sistan-Baluchistan a Jamia mosque muna minute kah hal a bomb chu pohkeh anahi e. Hiche nikhoa chu mipi hon prophet Mohammed tupa Imam Hussein pen nikho kipa golnop abol nauva kibulu uva ahi.

Hitobang kibulu nahi tijat umtah ahin abol ho chu mat doh ding ahi tin US Secretary of State Hillary Clinton in adem in ahi. Sistan-Baluchestan muna Jundallah galguh bol hon pathen houna muna buluna anei uhi demna sangpen kaneije tin Clinton in aseiye. Chuleh hiche a athi ho insung mite leh akitongkha ho jouse chunga kangailutna kaphonge ati. Hiche buluna a hung suicide bomber teni chu numei von a hung kivon lhon ahi, hinla amani chu mosque lut ding ana kiphal lhon lou ahi tin Shahriari in aseiye. Bomb khat apokeh jouva mipi hon akitongkha ho huhdoh dinga ahung kikhop phat uva bomb anina chu pohkeh kit ahi tin state news agency IRNA chun aseiye.

Indonesia Supreme Court in thu ana tansa khelna nei
Jakarta, Lhamul 16 : Indonesia Supreme Court in masanga thutanna ananei $135 million Suharto chapa neopen pa koma analah chu nung peh kit din aphongdoh kit tai. Achesa kum 2 masanga chu court in Suharto chapa akon ahi nehguh aneiye tia $ 135 million hi ana lah peh ahin hinla finance ministry in amudoh thil thah aumjeh a avel a thulhutna hi court in anei ahi tin justice Hatta Ali in aseiye. Aman aseibe na a hiche thulhuhna hi achaina ahi chuleh hiche thua ngehna dang umthei lou ding ahi ati.

Achesa 2008 kuma chu Hutomo “Tommy” Mandala Putra kiti car company tua umtalou chu $ 135 million ana lah peh ahin hichu Suharto vaihop laiya nehguh ahi tia ana phondoh sa chu tu hin nung peh kit din thulhuhna aneitai. 1998 kuma Tommy hin apa vaihop kichai masang chun sumkolveina phatah ananei in ahi. Hinla Asian gam a financial crisis aumtah jeh in Suharto sorkar alhu in chuleh ama jeng jong kum phabep songkul a ana um in ahi. Suharto chu Tolbol, 2008 in ana thi tai.