hochu alung neosah bepmin ahi atikit uve. Chapang school’a kichep golseh ajao uhi asetna umda a ahipoi. Kichepna a akisuhkhah teng uleh chapang lungthim chu phat sotpi kichatnan alodim theije. Phatleh sum lutdan jonghi insunga boipi umtah khat ahi. Chapangho kisuhkhahna hopthum lah a hopkhat khu kichepjeh ahi. Akumseh in chapang million 3 tobanghi akichep naova konnin akisukhaovin ahi. Thagum patna kichepna football tobang a hin kisuhkhahna atam dehsetnin ahi. Kitetna golseh a jao chapang hohin imalam jouse kitetna inbou agel uvin, amaho jengjong kitetna a alolhinlou teng uleh pannabei dannin akigelji taove. Hibangchun, aloiho alolhing louho jongchu avenem jiuve. School a golseh kichepjeh hin phat tampi asumangun, insung mitoh kipol khomna dingleh lekha simna dinghin phat aneilhomji taove. School’a kichep golseh ajao uhi uniform chohna, registration fee chuleh adang dangah ginchat sangin sum alutnin ahi.
Quiz leh kinel kitetna a jao chapang hohi ivetleh khatnin khatchu joteiding agotnalam uvahin thil ahet thuhnao akhangtouve. Ahetnaohi kitetna’a manghihleo phachom behseh ponte. Kinelna hin chapang hon thilkhat chu adeileh adeilouna ichan geija khapet chenga asei theijem mudohthei ahina bannah milah a ngampella thuseije jong akijil theijun ahi. Kinelna a mark amudung juihin thusei ichanna abolthei jem akihe theije. Quiz kitena ahin akhangol ho sangaakidong subject chu ichanna ahetjoh ham mudohthei ahi chuleh quiz a jaohohi chihna leh hetna hatah in aneibeuve.
Tahsa cholna theija golseh kibolna a jao chapang hochu a-fellun atahsao adam theije. Golseh a pang chapang hohin changseh a panje chuleh loile goltoh pankhomje aheuve. Chapang hochun itobang kichepna a them pennem akihet theijun hichu ahunglet tenguleh kivahna “career” a aneitheiju ahitai. Chess tobang kichepna a pang hohin kichep jona dinga lungel lhahje athemmun, kichep golseh kitihin chapang hochu gangtah a lungelji leh angaichat dungjuija lungthim khenje ahille. Kichep golseh langa chapanghoboltheina chenghi kitetna umlouvin akihedoh theipoi. Hijeh chun, school a kichep golseh hin chapang holung asuhneo sanghin kitetna a themho chu amuteng uleh kitil khounajoh in anei uve tithei ahi.
Nulepa tehin achateu school kikhen jouleh atahsa phatna dingleh, adamtheina dinga akichep diuhi ideijun ahi. Insunga thang dehduh a akichep sang uva pamlanga akichep diuchu nute deilam jong hinte. Nulepa atamjo hin achateu school kichep golseh a ajaodiu idei uve, ajehchu chapang hi akichep teng adam theije tichu ihetjeh u ahi. Nachate chu school kichepna a ajao louleh inajong thacholna theijah kichemnom ponte. Pamma abolkhah louchu inna itiba abolding ham. Hichi sangchun, nehthei hollin tin, T.V. ventin ahilouleh computer maijah kitung inte. Kichep khohsah louva um chapang hohi athaoval nom uve. Chapang Schoolía kichem hochu inajong aniseh a pung-khat, pung-ni akichep keo hilouvin kichephi amaho dinga thanopna tah asohdoh jitai. Nehpha inehleh itahsa dingin aphan, hijeh chun aneh houchu tahsa dinga phading hinam akivet taove, Ikichepchanna kithem ahijeh hin school kichepna a bolhoina theidin tanglouvin aniseh in akichem taove. Hitichun, atahsao aphan, adamthei uvin, thao netnut kitichu amaho dingin agamla lhehtai.
Nulepa tehin achateu athaoval dinghi ageldoh teng uleh alu apei jengdiu ahi. Doctor ho seidannin chapang toumunna kichepna video games, computer games leh adang atamphat hin chapang athaoval leh agihval hi atamcheh chehtai. Hitobang chapang hohi thaoval jeh a natna diabetes leh hypertension aveinom uve. Athaonao chu min totnopna aneiteng uleh lungneo nan aneikit jiuve. Hijehchun, nachachu school kichepna a jaonomlou ahijongleh ajaona dingin tilkhouvin. Atheploujeh a jaojoulou ahi jongleh kumkitna ajaona theiding beh in kithep chuhsah in, ajehchu nacha damtheina ding bolla nahi.
Chate chu golseh a konna ahungkile teng – najonah em? Tia doh sangin nakichep chu nop nasah hinam tia dohjoh aphai. Chapang ho golseh akichep uhi athepnom uleh athao anopjeh ahi. Nulepa konkhat chu achateu kitetna a ahatmodiu ahetteng uleh acheji taove. Amahohin hatding bouhi agelsangu ahi. Icha ahatmo ding jeh a chemangjeng chu thilpha ahipoi. Ajehchu, ajouva pansanga kichepna a agajao joh uchu lolhinna ahijoi. Chapang hohin ahatmodiu jeh in kichepna adalha pouvin, athao anoplou teng lebou ahaijiuve. Chapang chu kichepna a ahatjoa apanteng jongleh kipaval louvin aphai, atilouleh jona bouchu athupiham tia agelkhah theiju ahi.
