Imphal, Lhaphul 12 : Milun pu A K Mahato, Regional Manager, Life Insurance Corporation of India (LIC), Kolkata in tuni nidan 10:30 cm vel chun Christian Hospital, Imphal ahung vil to lhon in mipi in ama vailhun Lemna programme Christian Hospital muna ana neipiuvin ahi. Hiche kingon chu Dr. H. Khongsai, principal, Trulock Theological Seminar (TTS) makaina in ana chelha in ahi. Senior Medical Officer (CHI), Dr. J. Haokip in Pu A K Mahato leh Pu Letboi Kipgen, Manager (LIC) Imphal Head office tenin lemna anei in chuleh kipa thilpeh in nam pon "Saipikhup" khat cheh jong asilpeh in ahi.

Pu A K Mahato in phat chomkhat houlimna aneiyin ahungna ajeh leh LIC natoh ho seiphongna aneyin ahi.
Aman aseina a LIC Golden Jubilee Foundation hi Bombay Public Trust Act 1950 noiya achesa Ellha nisim 20, 2006 kuma chu ana kibol doh pan ahin adoi pipen tah chu themjilna, tahsa damtheina, vaicha-genthei kithopi ding ahi pen e ati. Hiche tohgon ho noiya insung hahsa tah a kona lekha sim ho panpina a scholarship peding, Thinglhang gama themjilna Semhoi ding, nu le pa neilou ho kithopi ding chuban leh tahsa damtheina khohsah a hospital ho panpi na nei ding ti ho jong apangin ahi.Life Insurance Corporation in hitobang tohgon tampi anei jeh a Kuki Christian Hospital jong dangka 25 lakhs a panpina kinei thei ahi tin A K Mahato in aseiye. Dangka 25 lakhs sanction kibol lah a tuni’n installment masapen a din dangka 5 lakh cheques a peh dohna jong anei ngal in ahi. Hiche kithopina sum le pai hi Hospital a angaicha ho adeh a vaicha-genthei hon aphat chom pi tei din Pu Mahato in akinepna aphong in ahi.

Aman aseibe na a LIC in project chom choma dangka 14.73 crore sanction abol in hiche lah a chu Eastern Zone adin dangka 3.64 crore hi tahsa damthei nading leh themjilna lama kithopina akineiye ati. Chuleh insung genthei tah a kon lekha them hon maban a Engineering, Medical leh graduation course dang dang ajom thei nadiuva kum khat leh dangka n10,000 cheh LIC in akipe e tin Pu A K Mahato in aseiye. Aman aseina a 2009- 2010 sungin numei le pasal scholarship kipe chu Eastern Zone adin mi 100 ahin chuleh India pumpi a agom in mi 881 alhinge ati.

Pu Dr. T. Lunkim, Medical Secretary (CHI) in ahoulim na a Mission Hospital kibol pat a ahahsat dan ho aseiyin chuleh tua Christian Hospital hi neival mana kibol ahipon mipi ten ingaichat jeh uva neilou sun suna kipan doh ana hi bouve ati. Aman aseina a Christian Hospital hi achesa 2002 kuma chu United States akon $ 40,000 ana kimu a hiche sum a chu natoh ana kipan ahi ati. Akipat til chun Staff them khat bou ana hin amaho chu Mobile Team in ana um uve. Tun Pathen mapui najal in Staff natong atam tan chuleh Hospital insong dan thumna jong akisa pan tai ati. Tua hi thilgon banga ache theiya ahileh Nursing School jong bol pat dinga um ahitai. Aman aseibe na a sum hi ngaichat ahi jinge. Ajeh chu Hospital a manchah choh ding tampi aum nalaiyin, hiche manchah angaicha ho hi aum teng neilou sun suna sum tampi lutna Guwahati, Kolkata, Mumbai leh mun dang danga che ngailouva hikom muna kijen thei hi ding ahi ati.

Pu Lunkim in aseina a tun jong Christian Hospital a damlou hung kijen ho adam doh phat uleh peh ding sum aneilou teng moh in akingaidam jitauve ati. Hiti ho jeh in Hospital a Staff natong ho lhalo (salary) jong aphatcha in anakipe thei jipoi tin sum dinmun ahahsat dan aseiyin ahi. Hiche hi Pathen natoh ahin, hahsatna thoh pum puma pan ilah diu ahi tin natong ho tilkhouna thumop aneiyin ahi. Achaina in tua LIC akon a kithopina hi ingaichat pet tah uva Pathen in eimu sah u ahi atitoh lhon in Pu A K Mahato henga Christian Hospital thalheng in akipana aphong in ahi.

Hiche nikho chu International Nurses’ Day ahi khah  khel khel jeh in Christian Hospital management in Nurse ho chu thilpeh neocha cha ananei un chuleh programme kichai in mipi chadon khomna jong ana um in ahi.