Ukhrul, Laphul 17 (NNN) : Ukhrul gamkai Tangkhul Organisation hon tuchung NSCN-IM leader Th.Muivah
in Manipur vil ding tohgon anei na toh kijui a gamsung boina ho, Imphal a pat’a thuso so hon langnei sihnei na nei ja thuso aneijeh uvin alung nopmo nau aphong uvin ahi.

Hiche lung nopmo na jeh ahin, Tangkhul milham ho kiloi khom na lenpen – ‘The Tangkhul Action Committee
(TAC)’ chun Imphal a pansa Newspaper ho jousen langnei sihneina beihel a thuso apeh diu, achutilouleh hiche newspaper ho jouse hi kikhah ding (ban) ahi tin ìwarning notice’ (gihsal na) tunichun aneijin ahi. TAC in aseibe na a chun, Muivah in Manipur avilna ding thu kisei a pat in hiche thuso toh kijop thu le la ho jouse hi
Manipur phaitol a pansa newspaper hon dihtahleh hoitah in thuso kilhutna ho a ahop pouve tinjong lungnopmo na aphong uvin ahi. Hiche langnei sihneina neija thukiso ho jeh ahin, TAC in Imphal a pansa newspaper ho jouse ‘warning notice’ peh dingin kinoptona Laphul Nisim 17 nichun aneijin ahi. Hitobang langnei sihnei na neija thukiso hohi angahlou uleh, Phaitol a kisoEnglish newspaper jouse Ukhrul district a kikhah ding ahi tin jong TAC in kilolna aneijin ahi.

Laphul Nisim 18, nilhah lang nidan 6 leh, Meivah dop a kijotna neidingin jong kilolna TAC in aneijin ahi. Hiche kijotna hi lambom mun ni-Dungrei Junction leh Kharasom junction a hungkipan a Tangkhul Naga Long (TNL) Ground kisuto dingin tohgon aumin ahi. TAC in aseibe na a, hiche kijotna hi Th.Muivah, Ato Kilonser, in apenna gam vil ding ti lunngaituo aneina chungchang a Central Sorkar in langnei-sihneina aneitoh Manipur Sorkar in ahunglut na ding lampi akha jeh a lungnopmo na vet sah na a kigong ahi ati.

TAC in hiche thuso aso na a aseibechuahileh, Th.Muivah in Ukhrul ahung vil masatpen na ding ahin, ama lemna ding tohguon thupi tah in akigong e tin jong aphong doh kit in ahi. Th.Muivah ngailua le munom Tangkhul mipi tamtah, alen aneo, ahung ding ngahlel tah in aumjing ui ati. Akhomun hung lhungding ngahlel tah in ama lemna dingin, mun 20 val lambom hole lamka tina Nampi chondan a lemna kelkot ho akisem in chuleh inchungvum ho jouse a jong ponlap kang (white flag) leh poster ho akitah doh gamtai tin TAC in aseiyin ahi.

Achesa Nisim 11 Lhaphul 2010 nikho a ana mollep, DDK Imphal a News Editor Pu Robert J.Baite in aphat
loutah a eina mol lep san uva, aji acha chu leh anam mite dalha a atonsot muna dinga eina dalhah u hi Thadou Kuki Journalist Union (TKJU) in akiponan aki itlheh in ahi. Aman eimol lepsan uhi eimi tedinga thuso lama manna lentah ahi keo hilouvin, i society uva dinga gou loupi tah kimansah ihi taove.

TKJU in Tulha Nisim 16 nichun office muna Simlemarnet Mobile News kum 2 lhinna leh meeting anakinei na
ah chun ama Pu Robert J. Baite jana leh lhah na ana kinei in nasa tah in a Insungmite lunghempi na leh lhamonna thu jong ana kisei khom in chuleh hiche Gosem thuso mangchan Pu. Robert Hekai Kipgen Secretary, TKJU in Lhamon na thu ahin thot ne.

Lamka, Lhaphul. 17: Phatchesa hoa Kuki National Organisation (KNO) noiya Information & Publicity anahi Pu. Lenin H. Kuki chun Organisation a konna haina pelutin UKLF joh a alutna hetsahna lekhathot thuso miho henga apelut tan ahi.

Aman aseina ah, ‘KNA hi ahung kipatdoh a kipatsan RAW le India Sepai hon kiothopina apeh uva, nam khat lenamkhat, adeh a North-east India a um tribal miho, kikah a kikhen tel na ahinso doh jingu ahi ati.

Nam ngailutna umlouvin, KNA/KNO hi politics a lunglutna nei vaipo-thuneiho toh kikhut jopin, mipi deilam hilouvin amaho deimi leh innsungmi (tichu-Telsing) ho bou candidate a lungtup aneiju ahi tinjong aseijin ahi. Tu le tu jeng a jong ‘donation’ ti a MDC candidate ho koma sum donna aneijuhi thilguh kihe khat ahi. Chuleh, UPF hetlouva Central Sorkar toh SoO aneiyun jong chu, mipi kilhem lha keu hilouva, KNA/KNO Revolutionary Movement kichaina hungkipat na ahi. Hiche SOO in ahinsodoh khat chu ahileh phung le chang a thingnoimi hung kisepdoh hi ahi. Chukitleh, khopi nom ho a alamkai hou nom tah a hinkho amnuva nampi adinga sumle pai kidong ho amanchatvei jehuva asepaihou thasegam uva organization dang abeluva abang loi khamnathei bola kimangcha ji ahitaove. Moreh ICP a sum lilahdoh ho jong ‘Boss’ bhabep hon akilah gam u ahi ati.

Hijeh chun, KNA/KNO hi Kuki nampi adia kongtol ahinaova konna kiheimang uva lhingjoulou ahitah jehuvin,
tuni a pat ahin hiche Organisation a Cabinet Member kahina dalhan Kuki nampi a dinga kikiphalna tuhdet in UKLF joh kajop tan ahi,ati.

Imphal, Lhaphul. 17: Ahunglhung ding nisim 22 Lhaphul (Misemni) jingkal nidan 10:30 teng leh Kuki Inn, Imphal muna Kuki nam sunga lamkai jouse kihoukhomna um ding ahi. Hiche kihouna a kikou le hung pang ding ho chu- Kuki MLA, Ex-MLA, MP(LS), Ex-MP(LS), Kuki Inpi Manipur, KIM lamkai masaho, KUMHUR, KSO GHQ, KWU, KRF (Kuki Re-search Forum), KSCWF, Lhang Kuki Inpi lamkai, Kuki Kho Haosa, chule Phungpi lamkaiho jouse ahiuve.

Gam le nam chungchang thua lung le tha sekhom’a kihoulhahna um ding ahijeh chun kouna muhon khohsahna
nei tah a thonlouva hung pang tei diuvin Pu Paotinthang Lupheng, Inpi Lhangsam in hetsahna ahin pei.

IMPHAL,Lhaphul17: All Assam Manipuri Students’ Union hon Manipur chunga NSF leh adang Naga Civil Organization hon ‘Economic Blockade’ abol uhi nikhat (24 hrs) sunga a alahdoh lou uleh, amahon jong aboltheichan u aboldiu, ‘counter blockade’ jong aboltheiyu ahi tin temna leh gihna aneijuvin ahi. Hiche hi Manipur gamsung a cheng milham ho nasatah a hahsatna ato’u, adeh a nehle chah chuleh ana asa ho jong kijen thei leu louva aum tah jeh uvin, Manipur gamsung dinga hinso na lampi (National Highway 39 leh 53) hi gangtah a milham ho ding gelkhohna jalla alhakang diuvin nghehna aneijun ahi.

Imphal, Lhaphul 17 : state a mipite kipana tah khat chu tuni apat chun nitin a ngaichat thil ho Imphal khopi ahung lhung pan tai. Consumers Affairs, Food and Public Distribution akon P.Vaiphei in thulhut anei dung juiyin anchang 3.5 metric tones chu tuni nilhah lam 5:30 pm chun Indian Air Force huikong a ahin kipo e ati. Thulhut in aseibe na a hiche thil chu airport muna DC Imphal West leh DSO, Imphal khut a akipe doh pai tai ati. Hichu jing nikho 9:00 am apat Imphal kailhang mun phabep a kijoh ding ahi.

Akijoh nading mun ho chu kwai Bazaar (Samu Makhong kom) chuleh Singjamei muna Government OMSS rare Rs. 15.85/kg a muthei hiding ahi. Hiche anchang kihopna ahi insung vaicha chuleh BPL card neihon 5kg cheh akichoh thei ding ahi. Khwairamband bazaar a nidan 9 am apat 12 changei kihom ding chuleh Singjamei bazaar a 12 : 30 apat3:00 pm chan kihom ding ahi. Agom a kihom doh ding hi 35 quintals hi ding ahi.

Thulhut in aseibe na a jing teng leh Guwahati Airport akon jinglam jinglam 9 am teng anivei channa anchang
hin kipo kit ding ahin ahung lhun lhun leh DC, Imphal East leh DSO, Imphal East koma kipe doh ding hichu amat jat ma ma a Konjung Mamang Bazaar leh Lamlong bazaar muna kijoh ding ahi ati. Chuleh Guwahati akon a huikonga thil hin kipo hi angaichat channa kipe dingin akiseiye. Tupet in sorkar koma anchang um hi 7683 Matric tone ahin hichu state sunga lha khat tobang che nalai ding ahi. Hiche jeh a chu tupet a moh kichat chat nading ahi hih laiye tin aseibe in ahi.

Alangkhatna Home Department in aseina a Silchar- Aizawl-Sinzawl-Churachandpur akon in Lhaphul 15 nichun gari 15ahung lhungin amaho chun cement bag 200, diesel 28 barrels leh petrol 9 barrel ahi pouve ati. Chuban in Lhaphul 16 ni chun gari 19 ahung lhungin chini bag 35, diesel 48 barrel leh petrol 31 barrel ahin polut tauve.

Lamka, Lhaphul. 17: Autonomous District Council MDC Election hi Lhaphul nisim 26 a aum tah
ding toh kilhon in MDC Election sung’a Duty ding Presiding Officer, Polling Officer, Polling Peon hon
tunin Synod hall IB Road mun leh YPA Hall Hiangtam Lamka a Kichuhna apan tao vin ahi.

Hiche kichuhna hi nisim 19 le ajo diu ahi, chuleh MDC Election duty adinga ZEO noiya pat mi-369 pangdiu,
District Council noiya mi-211 jao diu ahi. Hiche ho lah ahin Numei mi-11 jong apang uvin ahi, Ms. Jacintha
Lazarus IAS D.C Churachanpur in Thusoh lakhom miho kom a ahoulim na ah, “MDC Election Duty Ding’a Numei Appointment kipe kha jouse Koima Duty lou ding akhel ding u kibol peh diu ahi tin aphong doh e.

Imphal, Lhaphul 17 : Imphal East District Police Commandos team in Mao akon hung truck No.
MN-01/7626 apat spasmoproxivon (SP) Capsule tablet dangka 2.5 lakh amandoh un ahi. Hiche kham nathei lou neipa panna in police hon mi 2 aman un ahi. Amani chu Md. Nahamei alias Ajijur Rehman, 32, s/o
Md. Muhammad SoraKhunta Chingjin akon leh naoba Meitei, 19 , s/o H Ibungo Meitei Lamsang
Heibong pokpi apat ahilhonin ahi.

Official thulhut kimu dung juiyin commandos team ho hin Mao akon a thil hinpo truck khat a SP capsule ahin
kipo e ti thuguh ahet phat uva NRL energy station Mantripukhri a mobile check abol uleh nidan 1:30 pm vel a chuamat doh u ahi. Police commandos ho chun bedding noiya kisel SP Capsules 50,000 hichu dangka 2.5
lakh man chu amat doh u ahi.

Imphal, Lhaphul 17 : Tuni chun lou le ai 8 metric ton chu air cargo apat Imphal ahung lhung tai. Chuleh nitin a ngaichat thil ho leh Petrol thao ho National Highway -150 a hin kipo chu tuhin Churachandpur ahung lhung tai. Manipur home department seidung juiyin state sorkar in mipi ho henga nitin a ngaichat thil ho leh lou le ai ho akimu theina dingin pan hatah in ala e ati.

Home Department in aseibe na a lou le ai 8 MT chu tunin air cargo apat Imphal ahung lhung tai ati. Hiche lou le ai hochu Dextrose ho, diabetic lou, insulin, heavy bottle items leh adang dang ahi. SPF sorkar spokesperson N Biren in thuso miho koma aseina a tunia kipat a lou le ai hochu huikonga hin kipo pan ahin chuban leh 3.5 MT anchang chu Guwahati akon a tuni nilhah lam teng hung lhung ding ahi ati.

Biren in NH-53 hi thil pohna dinga lampi aum khat chu ahin hinla tupet a economic blockade um jeh a Nony leh Tupul mun hoa song kikoi a lampi akitin jeh in ahon nadinga phat hung geisang jep ahi ati.

Cabinet Minister pan aseibe na a state sorkar in NH-53 ahi security lhingset a apeh thei ahin hinla blockade bol lah a numei ho tampi in pan alah jeh in Mao Gate tobanga boina avel a aum kit louna dinga ahithei leh kihou cham ding joh kigel khoh ahi ati. Alangkhat na Silchar-Aizawl- Sinzawl-Churachandpur apat thil hin kipo ho Churachandpur ahung lhung tai tin Home department chun aseiye. Thil hin kipo ho chu atamyo thao tui, Chini, Cement leh adang dang ahi.

Dimapur, Lhaphul. 17: Phatkhat a Naga Hoho lamkai them, thilbol thei tah le pi lhing tah a ana kigel jichu tun
vang Th. Muivah thuthu a hengle kom sugenthei chapang phalou ho tobang ahibep tauve tiín NSCN-K hon aseiuvin e.

NSCN-K hon Newmai News Network thuso miho hengahetsah anei nau va, “Naga Hoho hohi Naga Hoho dihtah ahi pouve, ajeh chu Nagaland gamsung a Naga nam kehkhat sang a lhomjo bou ahop ahi. Naga ho jouse kinepna chu ahileh, aki punkhom nau lenpen hin akhon na kheh alhun teng u jongleh gunchu tah le lunggel thei tah a na atoh diu kitahsan ahin, hinla hiche ahin Naga Hoho nasatah in alhachom in chuleh pi lhinna le chihna imacha atah lang poií tin aphong uvin ahi.Thil neu chakhat thu a konna aheng akom chuleh Naga ho suhminset sah ahiuvin hijeh a chu midangho jouse mitmu a Naga nampi asuh minset jeh vin amaho tichu Eastern Naga Peoples Organisation (ENPO) leh Nagaland a um chiding nam dang hon tuchung thilsoh hohi State dang a nam chom chomho kom a donbutna anei u ngai inte tiín NSCN-K in aseiye.

Naga Hoho in tu naicha a press statement a suo u chun Naga sung kikhenna alet sah cheh naban ah akimvel a State hotoh ginmona abe lap e ti’n NSCN-K in asei e. Hitia kisei lo najehchu ahile tulha nisim 9 nia chu Naga Hoho in newspaper a ‘Naga ho chung a Manipur sorkar in lhangphong tah in gal abol e’ tia thuso anaso jeh u ahi. Hiche hi mi themkhat in lungguh neitaha amaho thanopna machal nading a mipi lung achou doh gotnau ahi bouve tiín jong NSCN-K in aseiyin ahi.

Achesa nikho hochun mi ana kithat naiye, da um akisa lhehin ahi hinla hiche thua Naga jouse thalheng a Manipur gamsung gal sokhum ding hung kiseihi adih le dihlou chu Naga Hoho hon akholchil masat ngai u ahi. Muivah chu tolthat ahi tia Manipur government in aphonchu Naga Hoho hon gal bolkhum dinga aphon khumchu dihmong ding hinam?

Manipur vaipoho thilsei chu lamkai hina dolía kholchil masat ngaijo hilouham? Hichu hilouva thisan kiso jehía
gal kikou chu khohelou milham hochu Manipur Police ho thalchang masanga kisongdoh ahijon ahi. Naga
Hoho hon lamkai hina chihna le vaihom theina anei pouvin hiche thilsoh chunga thepmo nanei holding hileh Naga Hoho tilou koiman donbut theiponte tin thuphon anei uvin ahi.

Gal kibolto sang chun Naga le Manipuri hohi masang ana chenkhom jingma banga kilung tohtah a chenkhom jing nahlai ding ahi tin GPRN/ NSCN (NSCN-K) hon temna ahin neuvin ahi.

Amahon aseibe nauva, “H.K Zhimomi, Naga Hoho Speaker le Chuba Ozukum, General Secretary tenin thal
ijat lom Manipur sorkar douna dinga akoidoh uham tin thudoh abol uvin ahi. Iham tia Manipur sorkar in Naga
ho ahin doukhah a ahile Naga Hoho a lamkai tenin thepmo akichan hon ding ahi tin GPRN/NSCN (NSCN-K) le thilgel thei dom lamkai hon thuphon ahinnei uvin ahi. Hinla kum 60 val nampi ding kigel na ahin Manipur sorkar koma kiphinna di thu ima aumpoi, Th. Muivah in Manipur agavil dingle avil louding thuchu Naga-Manipur boina ding ahipoi tinjong asei uvin ahi.

Chukitleh Naga Hoho hon mipi kipun khomna tia Joint Working Group (JWG) khat abol nauva thuso anei u
GPRN/NSCN, IM, FGN honLhaphul 16 nikho teng Muivah in apenna kho ajotding adeisah nau thuphon kibol chu akimun kidang akisai tinjong asei beuve. Hiche thuso hi gelkhah lou, thil kidang, ahilou ding kisei na ahin Naga Hoho lamkai lhahsam jeh ahijoi tin asei uve. Muivah cheleh chelou dingthu seina ahipon hitobang thua NSCN-K in
akigel khapoi. Ahin thilsoh jeh’a hinkho chanlo ho inkote heng ah lhamonna thu akiphong in chule akisukha ho
jouse adamvah nadiuvin thupha kahin choi uve tin thuphon anei uvin ahi.