Lamka, Lhajing 14: Achesa Lhajing nisim 14 nikho chun Synod Hall, IB Road, Churachandpur mun ah Pu Chawngthahlei, Speaker Kuki Inpi Manipur Coordinator hinan Family Get-together kiti kingon khat ana kimangchan ahi. Hiche kin-gon chun Hmar Inpui, Zomi Council, Mizo Peoples Convention le Kuki Inpi lamkai sen kihou khomna leh thakhat tah a dinkhom nading thu kihouna anei uvin ahi.

Thakhat a umkhomding deisah najal le panlah khomna ding apoimo dan thua houlimna Pu Thangsei Haokip in aneina achun hitin aseiyin ahi, 'Eihohi aboi ihi pouvin moh a bou kijahmatna (communication gap) alhahsam jeh ahi. Ipi jeh'a siki Kuki, makhai kuki tia ikingoh sah uham? Thakhat ihibou uve. Idinmun uhi ivetleh Kuki hon imajouse Kuki hiding chuma banga Zomi honjong Zomi tilou adang hilou, hitobang lungthim inei hohi pailhau hitin ilhahsam naho velphoh louvin maban jotjou hite' tin aseiyin ahi. Achesa Lhakao nisim 5 nikhon consultative meeting dingin Tribe jouse ana kikouve, hivachun pao le ham chom chom thote kihi jon-gle unao khat ihiuve tin thulhuhna ana kineiye.

Tua Manipur dinmun ipi ham? Khangthah hon dinmun jotkhel tajongleu khonungle hungpha nante ahin
tua apoimo penchu panlah khomding ahi. Masang bolkhel naho sumil u hitin dingkhom taute. Chin Hills,
Chittagong Hills le adang hothu seikhom tau hite.

Lhamasa thilsoh chunga UNC hon panlah khomding ahin seiyun hiva ana kidonbut chu "Muivah anop pouleh Tribal Unity kapom diu ahi" akitin hinlah imacha thu aumtapoi. COPTAM hon UNC aga kimupi chun atumbeh a kivaipoh dingbou kadei u ahitai atiuvin ahileh thil umchan hi imoh vetdiuham aloule pan itilah dingham gelphat ahitai tin houlimna aneiyin ahi.

Pu Vungzalian Ex-Minister in houlim aneina ah, "Naga movement la ipanpi pouvin, Mizo movement la ipanpi
pouvin eiho chungthu kisan ipanhu deh pouvin mimah tahkhat chu ihiuve.

Achutileh phaicham miho toh thakhat a ium uva Panchayat ijop uva development iumsah diu hitam? kigelphat angaitai' atin ahi. Masang minister kana hilai injong tua thilsoh dingho mumasat ahitai, hivachun kenjong Gaikhanngam komchun thinglhang miho communal ahipoi phaicham miho joh ahi bouve ijeh inem itileh District 2 toh kinaicha um'a hinla hinchop khupsah a Jiribam Imphal District aumsah khu ipi seibeding umem tin kana houji e atin ahi. Tunjong kinepna ding umlouhel ahi sum tampia hinkijol lhading ahin kichih thei angaiye.

Hitobang dinmun a kium a Zomi, Kuki, Mizo thingnoimi jat jat iumkit nah lai u. hihohi ipijeh ham itile Political movement ineiloujeh u ahi. Kalam kaiye tihohin CM toh ann nehkhom donkhom ding thupi a aneigam u ahitai tinjong aseiye.

Ahinla nampi ase naipon ahi, semphat thei ahinalaiyin ahi, hiche nading ahin Pu Thangsei injong lamkai hina athahbeh in panlahna neihen lang sum le pai yin kisah boida leh nalolhin ding ahi tin vailhah najong aneiyin ahi.
Chutoh kilhon in Zomi Council ahin Hmar Inpui ahin chule Mizo Peoples convention lamkai honjong houlimna anei uvin thakhat a dinkhom dingchu thupi penin aseisoh keiyun ahi.

Hiche nikho a thulhuhna anei uchu ahile; namkhat thakhat ihiuve, igamsung huhdoh nadinga gelkhoh ding panlah khomding, tuchung COPTAM ho kiphinna chu aki tosot in ahi chule hitobang kimutona hi banjop jingding tiho chu ahi. Aban kit'a kimuto nadinghi Lhalam (September) lhale Hmar Inpui hon abolding in akiphatsah uvin ahi.

Sadar Hills a chamna aumtoh kilhon’a Dist. Jong umvah ding ahitai; S.H. Seipu 
Sadar Hills, Lhajing 15: India gamsunga chamlhatna ahung umkal kum 64 alhintoh kilhon in Kangpokpi ADC Hall muna loupi tah in Pu S.H. Seipu, Chairman ADC Sadar Hills Jingun hinan kin-gon aki mangchan ahi. Hiche kin a houlim aneina achun Pu S.H. Seipu in, "India in chamlhat amukum sihle Kuki thingnoimi hon Kukiland umsah nadinga kiphinna ana neijeh un achesa kum 20 tobangchu lhang sungah ana kimangcha theiji pon hinla tua patsa athah beh'a panlahna ahin nei uva SoO noiya Sorkar toh Kuki thingnoimi hon Kukiland muna dinga Political dialogue achepi jal un imang thei uvin ahi. Hichetoh kilhon chun Lhajing nisim 14 nikho chun ADC Chairman hon CM pa toh ama office ah kakimuto uvin Sadar Hills pilhin nading thu kaki houlim uvin hivachun CM in agan nathei chan a um-sah dingin aphongdoh tai' tin aseiyin ahi. Aman aseibe na ah, Sadar Hills hi jatjouse kimna mun ahin Dist. Pilhin nadinga asungthu suhtoh ding themkhat umjongleh umvahding ahitai' tinjong aseiye.

ADC thaneina thua houlim aneichun Pu Seipu in, ADC ho power hi aban abanía first phase le second phase tia department athem athem'a pehdoh masat ding ahidanjong CM in aseiye' tin aphongdoh in ahi.

Kin-gon kichai nunga Gosem News toh akimuchun Pu S.H. Seipu in Gosem thuso pachatna sangtah aneiyin chule mipi in support abolding deisahna thuphon jong aneiyin ahi. Aman aseina ah, "Lengjouse lah a chingpen Solomon Lengpan thuso kitihi dangcha pettah a twi kidon tobang ahin hijeh a chu Gosem hi nasatah a ipanpi diu ahi' tinjong aseiye.

Gosem in maban panlahna anei kitding thudoh aneichun Pu Seipu in adonbut na ah, "Lhajing nisim 17 nikho tengle ADC Chairman jouse thalheng a Delhi khopi jonding kahin ADC ho thaneina (Power) chungchang
thua Minister hotoh kihou khomna nisim 18 a patsa 20 changei kaneidiu ahin nisim 21 nikho kahung kile tengle dinmun hung kichehdom kitding ahitai' tin donbutna aneiyin ahi.