Vannoiya hoilai mun ahin go hajuh inte tia nagel em? Hoilai mun hoa go hajuh nom ji-am? Go (rain) ahat dan kum khat a ijat ahung hi teng leh hichu go hajuh nagam ahi kiti ji ham? Igel teng leh thingphung tam nalah/ gammang lah ahilou leh thing mang nagam hoa go hajuh inte kiti ahi.
Gam got namun/neldi gam (desert) tilou in gam jousea kumkhat leh go khatvei beh aju tei in ahi. Hiche gam hoa hin kumkhat leh 68 leh 78 inches a hat in go aju jiin ahi. Alangkhatna kum khat leh 400 inches a hat go ajuh teng hichu go hajuh namun ahilou leh anom (wettest) hiji ahi. Adihtah Vannoiya go hajuh napen gamho vetlhahna in seiding hileh vannoiya go hajuh napen gam hi akisei theipon ahi. Ahileh khopi khat in ni 1 a sung nilhum keiya go ajuh leh hichu go hajuh ahi kiti ding ham? Anoiya mun 3 hoa kon amaho hi vannoiya go hajuh namun/khopi a kihe ahi. Hijeh chun ipijeh/ipi bol'a amaho hi vannoiya go hajuh napen ahi tia kilhen ham veuhite.

Cherrapunji, India : Cherrapunji a go ahajuh jeh in Guinness World Records ni vei anamu in ahi. Achesa Lhajing 1860 leh Lhamul 1861 kikah chun 904.9 inches a hat go ajuh jeh in vannoiya hitobang go ana ju khalou ahijeh in Guinness World Records anamu in ahi. Chukitleh Lhamul 1861 kum chun lha khat sunga
dia ahat dan 366 inches a go ajuh jeh in jong Records ana mukit in ahi. Cherrapunji ahin alhangpi in kum khat leh 450 inches a hat in go aju ji-in ahi.

Cherrapunji a go ahajuh nalo pen hi Khasi Hills jeh akon ahi. Bay of Bengal akon a meibol hung kitol
ji hokhu Khasi Hills a kitang den uva chuteng gotwi a hung julha ji ahi. Hiche jeh achu hiche khopi hi kum lhung tobanga agam u che/nom (wet) jing jeng ahi.

Mawsynram, India : Mawsynram hi north-east india gamkai Cherrapunji lhumlam akon 9 kilometers
gamlha a um ahin hijeh chun Cherrapunji toh go ajuh dan lhon akibang in ahi. Mawsynram mun ahin kum khat leh alhangpi in 472 inches a hat in go aju jiin ahi. Atamjo in go hi Lhatun leh Ellha kikah in aju jin ahi. Khasi Hills jeh akon a jong Mawsynram muna hi go hajuh a ahi. Khasi Hills in meibol hung kitol ho ana tinden jia hijeh achu ahung umsot teng leh gotwi a hung julha ji ahi.

Aboi natah khat chu Mawsynram muna hin amaho gama gojuh ahatdan melchihna ahilou leh meteorological office aumpon ahi. Hijeh achu hiche khopi hi go hajuh napen ahi akihet lou jeh in Mawsynram sangin Cherrapunji khopi ache jo e tia kiseiji ahi.

Mount Waialeale, Hawaii : Mount Waialeale khopi hi United States gama dinga go hajuh napen ahi. Kum khat leh ni 350 tobang go aju jingin ahi. Alhangpi in kum khat leh ahat dan 467 inches in go aju jing in ahi. India khopi teni, Mawsynram leh Cherrapunji sangin go aju matchet in ahi. Hijeh achu United States a dinga go hajuh namun chuleh vannoiya jong ahi in ahi. Mount Waialeale khopi hi twi-koul gam ahin amun leh agong jeh a gotwi hungju lhaji ahi.

Twipang toh kinai chuleh akoul a um ahijeh in aning jouse a meibol anom (moisture) leh twi-hu in khopi chu phatseh in aumkoul jingin ahi. Hijeh achu hiche khopi hin niseh tobangin go in achap nou jing in ahi. Mount Waialeale khopi hi aken (steep) jeh in jong meibol ho gangtah in akitoul tou jiin chuteng munkhat vellah a go hatah in ajuji e.

Gam dang danga jong goju um jong leh achunga khopi 3 hohi vannoiya dinga go hajuh namun a kihe pen ahi. Gamdang ahilou leh khopi danga go hajuh namun ho chu anioya hohi ahi :
Tutunendo, Columbia 
Hilo, Hawaii Crkvica, Bosnia 
Quibdo, Columbia
Llora, Columbia
Debundscha, Cameroon