Bible in thuneite thu thua mijouse nungcheh din gin eihil uve. Pukhang pakhang a pat in tunichan in vannoihi vaipo thunei ana umjing peh ahi. Pakai Jesu leisetna ahung lai jong
chun Rome Sorkar chu thuneitah a vaipo anahi. History ivet leh thunei vaibol hohin gamsung'a mipi dinga thilphachom chule gamsunga chamle lungmon khantou machal umtheina dinghi anaboipi jiu ahi. Hiche nadinga chu dan (law) jatchom chom asemdoh uva hicheho chu mijouse juidinga asem doh u ahi. Hichejeh a chu Bible in thuneite thu thua nun ding aseikhoh ahi. Ajehchu thuneite thu nunglou michun genthei athoh ding ahi.
Kidangtah khat chu govt in gamsung society sung kivaipoh tup nathei dinga mijouse juicheh dinga asem dan ho (code of conduct ho chule rules and regulations ho) aban na danpi (constitution) ho juilou(palkeh) hi eimihon thilse in igeltapouve. Leiset thu hijongleh leiset aipo govt in juidinga pha dan asemho chu Pathen thutoh akikal lou pouleh juicheh ding dol ahi. Ajehchu Bible thuhil toh kitoh ahi. Bible a kimu dung juiyin Pathen thusah louva thunei koima aumpoi ati. Government hi thuneite chu ahitai, dan asemho jong nangle keidinga thilse ahipon hijeh a chu juicheh ding ahi. Pathen ngailu lhehdan na Pathen thu jeng sei seija ahivanga leiset thunei vaibol ho nahsah loutah a neijingchu Pathen dei dan ahipoi. Govt in juidinga asem danho ijuilouchu thuneite nahsah louna ahi. Bible toh kikal ahitai.
Thuneite nahsah louchun thuneite gimbolna jong amuteidng ahi. Gimbolna chu amutah hih jongleh amadinga vangset na soh thei ahi ajehchu thuneiten giltah a gamsung mipi jouse dinga thil phatah dinga asemdoh dan khat juilou chun thilse tampi akiboldoh ding, athilse boldoh chun amachu ajuijing ding nikhat leh abungbua atuntei ding ahi. Eihon gel leuhen India govt hi Pathen helou ngensen lamkaina ahi tia nahsah loutah a inei maithei ahi. Ahivanga Pathen tundoh ahijeh a eiho mudingin Pathen helou tijongleu hen gamsung lentah khat na vaipoa pang ahiuve. Nangle kei Pathen he lheh chule miching lheh danna ikigel vanga khosung khat a vaipo theijong ki umlou ahi.
MLA/MP Election kibolding dan ho phatecha (election of code of conduct) akisemsa um ahin eihon akaleh lambeh a ibol u ahi. Election adihna bangin bol theileu hen tunia ipijeh a election jeh a kinah kibau, kivoh kisat, kitha kimat, kilungdou, kimit thip, kidouna sohdoh ding ham? thildih lou bol kitichu thilsen ajuitei ahi. Eihojong thilsen eijui jingu ahitai.
Education examination ho thengset le dihtah a bol ding ahin aboldingdan jong semtohsa um ahin hijongleh eiho thengloutah a ikichep u ahi. Examination kitihi themvetna ahin athem athemlou hetdoh nadinga kibol ahin akibol dingdanho phatecha semsa um ahin eihon akaleh lambeh a ibol uva athemlou student tampi ahetna athepna umlou hella exam a pachanna aneitoupeh ahi. Hichehi ahiloubeh ding khat hidoh ahijeh a adih lou ahitai, adihlou keu ahipon thilse tampi ahin lhut ahi.
Abanin govt in aphallou ganja/poppy farm ibol uvin innchendoh nan jong koijousen ineikit pouve. Chule Govt in phatseh tobanga eiho khosung vengsung gamsung khantouna dinga scheme jatchom chom ahin semho MLA, officer chule haosapu kithokhomna jalla alhunna ding lom lhunglou tiho chule adang dangho hi govt dan sem suhkehna ahi. Dansukeh chu gimbolna chang dinga lom ihiuvin, govt in apet pet in gimbolna eipe tahih jongleu dansuhkeh man chu aga ineh thou thou diu ahi. Koimacha ongdohlou ding ahi. Ganja/ Kani joh jeh a ainnkal kichoija suhna ding helou mitampi jong aumtai.
Avangpha jep ho nivei thumvei chan kimandoh hih jongleh avel vel ahitengleh akimandoh lou aumjipon chutengleh phatmasa langa anamu jouseu jong aleng mang jitai. Haodoh sanga vaichatna sang tah bailamtah a kikou lutna thei ahi.
Chukeu hilouvin society sunga jong minsetna lentah ahi. Pathen dinga jong michonse ahitai, ajehchu thuneite thu thun mijouse nungcheh hen tia Bible in aseina laitah chu ijuikhel u ahitai. Bible thusei ijuilou keu ahipon, eihodinga jong thilphaloutah ikiboldoh u ahitai. Khonung chanía jong vangsetnan eijui thei ahi nalaije.
Thuneite phal lou thilho bolda thei leuhen, Bible thusei toh kitoh a hinkho ihin neidoh theibep diu ahi. Hiche ibol thei kah seuva ipathen hou ujong mohseh ahikha dem tihi tijat umtah ahi.
