commander pan nasatah a abol genthei ahi. Hiche jeh chun KSO (SH) in human rights jana neilou 23rd AR a post commander pa chunga demna sangtah anei uve tin KSO (SH) president Thangminlen Kipgen in hetsahna ahin neiyin ahi.
Hitobang thilsoh chung changa ahung lhung ding Lhamul 19,2010 masanga kihou chamna aum louva athu hi seilhahna aum louva ahileh KSO(SH) in kiphinna jatchom chom kinei ding ase, aphalou aum a ahileh KSO
(SH) in mo kipo lou ding ahi tin gihna nasatah ahin neiyin ahi.
Hospital a thi mi 2 thisan apat JE natna kimu
Lamka, Lhamul 16: Japanese Encephalitis natna niseh a kisei ahi dungjuiyin kivenbit ding deijal in Churachandpur district muna ginmo um damlou mi 2 Lokjoy kum 12, Tipaimukh a um leh Salam Naocha Singh (13), Loktak Project muna um tenichu district hospital muna athijou nungsang injong thisan kholchil dinga apehdoh nauva JE natna hitchu mudoh in aum e tin Dr. F. Thenkhogin, District Malaria Officer in hetsahna ahin neiyin ahi.
Hiche natna toh kisaiya Dr. F. Thienkhogin in houlim aneina ah mihing leh mihing kila theilou ahin hinla thoukang in Vohcha apejou nunga mihem apekhah leh hiche JE natna chu akilah thei ahi. Chukitleh hiche
thoukang machun JE natna mihemte apehson theina dinga vohcha aga pekit ngai ahi tinjong hilchenna aneiyin
ahi.
Chapang apa that, songkul lut tading
Lamka, Lhamul 16 :Vanghomni nilhah nidan 7:00pm val'a Pu. Kapkhanpau Phiamphu kum 54 P. Lunchinthang chapa Tuibuong Forest Gate ah chengchu achapa tahpen Thangminlian @ Bobon kum
27 in Chemcha in asunin kintah a Hospital mun lhut ahi vang in damjou lou vin ahinkho abei tan ahi.
Pu. Kapkhanpau Phiamphu hi tule tua Forest Dept. noiya Division a Deputy Range Officer Forest (DRO) anahi. Achapa Thangminlian hi Bangalore a Bachelor Of Law (LLB)gajil joulou va innlang hungpot ahi. Thangminlian hin Khamnathei jatchom chom aneh naban in Dendrite jong ahip in hiche kham nathei
ho aneh jeh'a apan apho a thuhil na anei leh apa thuhil na hochu angai nomlou in alung hang in Chemcha a apa dip asut leh alungchang asut khah ah thi ahi tin ainheng hon asei uvin ahi.
Hiche thilsoh Chungchang ahin United Zou Organisation (UZO) hon Thangminlian @Bobon themmo na chungnung pen apeuvin chule Nule Pa thatngam ho adam sung'a Songkul tang din Police ho kom ah thupeh na
aneiu to kilhonna Churachandpur Police hon FIR No:36(7) 10 CCPUR PS U/S 302 IPC noiyin Case
abolkhum tauvin ahi.
Sadar Hills District Council Vice-Chairman lhendoh hita
Sadar Hills, Lhamul 16: Kangpokpi District council hall mun ah Sadar Hills district sunga MDC kivaihopna noiya vaipo Vice- Chairman dingchun Pu. Haokholal Hangshing @ Haopu chu lhendoh in aumtan ahi. Ahung kikhom jousen kitohtah'a alhendoh u ahi.
Gosem News toh kihoulimna aneichun Pu. Haopu'n District Council hi Chairman letpen nanoiya kivaipo ahin hinla sorkar in eigonpeh'u local development le decentralization form of government hohi grassroot level a chethei ahina dinga pan kalah khomsoh keidiu ahi tin aseiyin ahi. Isociety sung u hi ivetleh chutitah in khagtou la ihi pouvin semphat ding atamin hiho chu kahin phut khomdiu ahi ati. Hitobang tohgon masanga kiluilha hohi aphatsih a vetlhah ahiloule sorkar injong nongkai tah'a chalohna aneithei ahi tinjong aseiben ahi.
Council jonghi 1971 Amendment Act noiyachu athahbeh a vetlhah kit ngai ahi, hiho vetup ahi'a thinglhang miho adeh'a Sadar Hills dinga tua Council kilhengdoh chengsen kikhelna kahin sodoh diuhi kakinepna khat ahi atin ahi. Sadar Hills District thua Gosem in thudoh aneina achun aman hiche chungchang hin ima kasei
nompoi ajehchu eimale eima hon iki suhkhel u anahi ti katah san e. ahin phat sotlou hel'a imu diu kinep aum e tin ahin donbut in ahi.
