ngailut jeh a phung dang khoto kigop ding hahsa isah theiyu ahi. (4) Igam lhaso ding i-it theiyu ahi.
Khoneo ho gopkhom’a kholen dom’a chenna ding chun noiya hohi kijui le jui baijep inte. (1) Akipat til lam le chun alailung pen ham, amun nompen ham khat’a chu chenkhom’a, kho ho chun amagam cheh chu louva aki galbol diuvin aphai. Ol ol’a ahung nop tengule akigomse se chun agam jouseu chu khokhat gam banga ahingel theinau phat ahung umle hitia chu ahin neikhom diu ahi. Chuche masang sea chu ama gam lui cheh chu akiman diuva koithei ahi. (2) Haosa hochu anopna pen’uva gopkhom ding ahi. (a) Anop bai pen chu khothah ahiloule kholen’a chu haosa lui jouse chu haosa hikhom diu ahi. Haosa Council khat aum’a amaho chu member hicheh diu ahi. (b) Lamchom khat chu ahile agamkaiya phung kinai dom ho haosatna kho ho bou gopkhom’a, alah uva khat ahiloule phung upa penpa chu haosa a pansah thei ahi. Chutile agam jouseu chu mi upa pen khat haosatna noiya kholen khat asemdoh diu ahi. Hichu nomleu kholen semdoh chu bai peníinte. (c) Haosa beiya kholen semding hi aphan, ahinla eimite chondan suhsetna ahitheiye. Thilpha sona ding ahile vang bolmo ahipoi. (3) Khoneo ho gopkhomía kholen semding hi nom cheh tajongleu hen ahahsa ding tahkhat chu inlui ho phetlhah a inthah tamtah sah ding hi ahi. Khatveiya in tamtah chon vang baiponte. Oltah a kum ni sung kum thum sunga tohjou dia gon in phante.
Chule atoh hi achelhah teina dinga chu sum toh dia ahao dom dom ho ham, sum lom ham, Officer ho le Minister ho ham tokhom sah a bol ngaiyinte. Sum nei dom ho apanlou ule hithei ponte. Amaho nopsah masah a tohpat ngai ding ahi.
Kholen dom’a chenkhom hi aphat chomna tam lheh inte. (1) Kholen’a ichenkhom’ule School, Hospittal, Sorkar Office, phadom dom umtheiyinte. (2) Kholen dom domin inko 400 cheng beh cheng khom leu hen anche louhing kichohto, hon le lousoh kichoh to, ahcha vohcha kichoh to umthei jepinte. Kiveina jatchom chom, hotel bol, dukan chom chom bol, ponkhui, press hon, le adang dang umthei jepíinte. Lamlen le khantouna dang jong luthei jep’inte. Vaicha jep ho sumlo a goithei jong umjep'inte. Me johna kailhang jong umthei jep inte. Hitia chu ivet le kholen dom’a chen chu lam jouse a khantou machalna ahitheiye.
6.2.4. Khosung ho Nomtah ahitheina Dia Semding Dan.
Kho jouse letsah a khokhat’a alhompen’a in 200 ahiloule 300 umsah tei ding ahitah jeh in kho tin chu tohgon hoitah tah neiya gontoh ding ahi. Khosunga chu alamlen ho, kailhang mun ding ho gontoh masah cheh ding ahi. Dukan jatchom chom jong Pharmacy jong ama umna mun ding a veng tobang atum'a umsah ding ahi. Lamlen pang dunga thing hoitah a phu ding, invel dunga jong thing kiphu cheh ding ahi. Khosunga hi anop theina dinga thilse bol aumlouna dia thilpha lamia kikhoukhahna ho phatecha gontoh ding ahi. Houthua kipohna ho, Sunday School, khangthah ho kiloikhomna ho kitup tah a bolpeh ding ahi. Chapang ho phatecha khoukhahna ding semtoh ding ahi. Khosung chu phat jouse a moh um, moh houlim aumlouna dia amichang cheh natoh neijing thei dia pan ding got ding ahi. Natoh aumjing ding to kilhon a mitin chu natoh kitettho tho jeng ahina diuva khoukhah got cheh ding ahi. School kaiho jong chu phat ong beihel tobanga le khasim akitet tho theina diuva akhoukhahje them cheh ding got ding ahi. Khosung anop theina dinga chu amitin’in ama ama natoh cheh akikhohsah cheh theina diuva khosung chu semhoi ding ahi. Khosunga chu aveng venga in ho chu kingat to ding tom langa melei neocha nei theina dia inmun kihom cheh ding ahi. Khosung hinkho semhoi chu nam semhoina khat ahi. Hijeh chun khosung hinkho hi lam jouse a semhoi loi got ding ahi.
6.2.5. Chaohat Pailhah ding.
Sorkaría natong ho dia natohna mun kichon jeh tilouva thildang jeh a moh chao le le hi bol tahlou ding ahi. Chao hat hi vaichat lona ajeh khat ahito kilhonin, cha-ohat pailhah hi sum le pai thua dindoh domna lampi neokhat jong ahi.
Chaohat hi milungdet loute a ahi. Ichaohat chan’uva lungdetlou na inei jing diu ahi. Hijeh chun chaohat hi pailhah loi ding ahi. Sapte thuchih khat in ìA rolling stone gathers no moss’, ati. Hichu song Kitang le le chunga twipan akai jipoiî, tina ahi. Hichu milung detlou, umthim louva lhaile le chun hetna, haona ima aneipoi,’ tina ahi. Hichu michaohat chu imacha ahidoh theipoi tina jong ahitheiye. Chaohat mi chu nei le gou imajong akholdohji poi tina jong ahitheiye. Hijeh chun chaohat hi pailhah loi angaiye.
6.3. Kholhang Hinkhoa Kikhelna Umsah ding Dan.
Kholhang hinkho a kikhelna aumthei na dinga toh ding bol ding hiding dan umthei ahi. Kikhelna kiti hi acham chamin jong asoh jing theiyin ahi. Langkhat’a mihem hon khel ding semphat ding lahdoh ding, gopbe ding ngaijong umtheiyinte. Khantouna neijingte chu kikhel khel jeng jeh a amachal chal jengu seina ahi. Kikhelna beiyin koima akhangtou theipoi. Kholhang hinkhoa akhang akhanga chedan loikhat hi apha aum theiye. Loikhat vang chu akichepi sot chan’a khantouna, kikhelna daltan’a pang thei ahi. Kholhang hinkho kikhelna le khantouna aum theina dia aumlouva pha phabep ve masau hite.
(1) Gotchepna: Gotchep kitihi sappaovin oppression a kona kiledoh ahi. Hichehi mikhat, namkhat ahiloule thahat khat nin midang khat, namdang khat ahilou le mihina chom neikhat chatmo hela alha seina ahi. Tekah in India a hin jat len jatneo semdoh a caste system aum jeh in Dalit ho leh thinglhang miho hi Brahmin le jatlen dang ho gotchepna noiya aum’un ahi. Caste system um hin Dalit ho le thinglhang miho hi gotchep a aumsah uva, ahina ding banga hitheilouva, songkulía kikoi tobang thimía aumsah u ahi.
(2) Chotphana : Chotphana hi chunga to hin akibahna chan aum’in ahi. Chotphana hi sappaova ‘down troddenness’ kiti a kona kiledoh a ahi. Chotpha a um ho chu caste system ham thildang ham’in chotpha den’a namnem, minoinung hiden ho ahi. Hiche tobang dinmun’a um ho chu dingdoh theilou, kikhelna umdoh theilou, machalna aumtheilou nadia kikoi ho ahiuve.
(3) Nehkangna : Chunga ho bang hin nehkang na kiti hi kholhang hinkhomna thil dihlou ho to kithoa minoinung ho gam, nei le gou, thahat, thepna le hanta lahpeh a adihlouva heikon le manchah seina ahitheiye. Hiche jong hi gotchep a umho le chotpha a umho to dinmun kithakhat ahiuve.
(4) Adihlouva kibolna : Adihlouva kibolna hi in-justice a kona kile dan’a kigel’a ahi. Adih louva kibolna munía jong miho ahiding bangin aum thei poi. Hitobang umna munía jong minoinung ho dinmun semphatna, kikhel sahna khantou machal sahna aum jipoi.
(5) Langkaina : Langkaina (partiality) umna mi lah a chun notthap a umho (the discriminated) ho chu dalhah in aumden jiuve.
Kholhang hinkhoa kikhelna, machalna/khantouna aum theina din hiche thil phalou ho, gotchepna, chotphana, nehkangna, adihlouva kibolna, langkaina, alam louva thunun valna, le adang ho hi suhchimit angaiyin ahi. Hiche ho jouse hi akisuhbeiya anoiya ho hi aum theile kikhelna le machal/khantouna aum theiye.
1. Jalenna : Jalenna nei mi chu aselam’a ache lounah le kikhelna, machalna ahiloule khantouna anei theiye. jalenna bei mi chun kikhelna anei thei poi. Jalenna bei mi chun kikhelna anei theipoi. Jalenna hi gotchepna chotphana, nehkangna, alam louva thunun valna mun ho a aum theipoi. Jalenna umna mun’a chun min athepna amangcha theiyin ahidoh theina ding gun ho (potentialities) chu asang penin akikhansah theiye. Kigahchah val umlouna, jalenna mun’a bou chun min athepna le aboltheina ho chu aphachom lam le midang din amangcha theiyin ahi.
Jalenna mun’a bou chun mimal hinkho kikhel na aum theiye. Gahchah valna mun’a chun mimal ho chu akigotchep jeh un mimal kikhelna aum thei poi. Jalenna mun’a chu mimal hon vannoi khantou le machalna ho akihetmatpi theiyuve. Hijeh chun jalenna mun’a bou leiset’a khantouna pha thei dia kikhelna, machalna le khantouna aum theiye. Lamkhatía seidin jalenna mun’a chu mimal hon vannoi chihna khantouna ho amu, atokhah theiyuva kikhelna le machalna umtheiya ahi.
