Rev. Paolen Haokip (Pastor, KWS Kolkata)

Thumakai
‘Bible sim in tao jing jengin “nakhantou tou ding” hiche la hi tulai mi tamtah in ahet lou maithei ahitai. Ahin achesa kum phabeh sunga mun chom chomkiloikhom (houbung) Sunday School chapang hon ana sah jiu ahi. Chapang hon athu gil le ahilchietna ahet lou maithei u ahi. Ahin hiche “la hinsem pa hin Pathian a konna thilpeh kidangtah a konna ahin semdoh ahi ding ginchat aume. Aman Bible a sim jingleh ataojing jeh’a konna lhagao hinkho nasatah a akhantou jeh ham ahilou leh Bible hi Pathian thu um ahi ti avetsah nom ham khat jeh a ahin
sem ahi. Tunin Christian tia kimin vo nang le kei in Bible simjing le tao jing jehía khantou na um maithei umlou mathei ahi. Khantouna aum leh ‘Hallelujah!!’ Pathian chu thangvah in umhen. Ahin Khantouna aum lou leh Bible thu chu dih lou ham? La hinsem pan amoh sem ham ahilouleh eiho chonset jeh ham hidingin ginchat aum in ahi. Ahin Bible hi Pathian thu ahi monga ahileh khantouna chu tahsa lam hihen lang lhagao lam hijong umding mong ahi. Tunia gelkhom dinga kahin deisah chu ahileh ilhagao hinkhou hi itabang hinam ti phat chom khat velvetna nei u hite.

Lhagao lama khantouna dinga factors ho
1. Hahsatna/Buoina/Gentheina (an opportunity for spiritual growth):
Seipa Mate (M.Th Student, Sermapore College) in ‘Kuki chate hi Gail (hail) ahung kheh ham ahilouleh kol’a  kikitanglhahía thiding ding munna akium tokah sen Pathian akiholpoi’ tin anasei in ahi. Adih e katinom in ahi, ajeh chu tulai Pathian in amanchah nasatah tah lamkai ho hi ivet leh atamjo gentheina/hahsatna lentah tah anato uva hiche ho a konna Pathian hin kimudoh atamjo ahi. Hitabang ho a konna lhagao hinkho nasatahía kiki semphatthei chule khantouna um thei ahi. Hijeh chun ichunga gentheina/ hahsatna ahung lhun teng lunghan sanga kipa joh ding ahi. Christian hinkho hi aphat sehle anidan tina kipana umjing ahipoi (Christianity does not offer problem-free life). Pathian milungset dan hi akidang in ahi. Angailut ho cha cha chunga gentheinale hahsatna ho ahin umsah jin ahi. Hiche ho jouse hi lhagao lama khantouna aumthei nading  ahi. Mihem taona lam chule bible sim nalamía alhah sam behseh teng Pathian in ahat kit nadiuva achunguva hitabang ho hi ahinso sah ji ahi.

2. Pathian thu nit ding (Obeying the Word of God):
Pathian thu nit ding kiti hi point thum tabangin anoija hilchietna kahin pei. (2.1) Pathian thu ngai (listening to the Word of God): Pathian thungai akiti teng, Bible kisim mai mai, ja mai mai tina ahipoi. Pathian thu chu ilungsunga lahlut (absorb) ding, chuleh thu chu tahsan (accept) ding tina ahi. Thungai kitichu mihem thaneina khat (authority)noija kipehlut tina ahi. Abraham in Pathian thu angaiía achapa Isaac maicham a apehlut jeh in Pathianíin phatthei aboh in ahi (Gen. 22:18, 26:5). Pathian in Abraham chu ama keo hilou in achilhah jouse jong Patthei aboh in ahi. Jesun, 'keima neigailut uleh kathupeh ho nanit dingu ahi' (Jn. 14:15). Pathien in ei lungsetna jeh uva athu ingai u ahin, Ama thu noija ichon uva chule ikipehlut (submit) ule phattheina chu ichan dingu ahi. (2.2) Pathian thu hetding (learning the Word of God) Pathian thu hetding akiti teng- Athu chun ipi akou doh em? Ipijehía thu chu kisei ham? Koi chun koi koma ipi aseina ham? Chuleh hichelai a chu ipi jeha ana keisei ham? Chuleh hiche thu hi tulai khanga iti manchah ding ham tiho het angai in ahi.

Thusei kisei chu ahina banga akiledoh louleh thu chu hetkhel bailamtah ahi. Paul in na oisung jeh leh nadammo jeh chun twisih keo jeng donlou in lenpi twi themkhat khat anamang jin' ati (1 Tim. 5: 23). Tulai a damdoi (medicine) aumtan lenpitwi chu ngailou ahitai. Ahin mibang khat chun Paul in jong lenpitwi donding aphalnai atia, adon na khamna a jong aman thei ahi. Hijeh'a chu Pathien thu hi amaho khanglai a ipi kisei naham het angai in chuleh tulai khanga iti manding ham tiho hetthem ding tina ahi. (2.3) Pathien thu juijin (following the word of God) Pathian thu akijan, akingai in chuleh akihetai. Hiche ho jouse hi boldoh/pohdoh ding hi Pathian in adeisah ahi. Ahin Pathien thu jui vang chu bailou ahi. Golhang mihaopa thusim (Matt. 19: 16-30, Mk. 10:17-31, Lk. 18:18-30) a konna kimu doh hetthei khat chu ahileh; Aman danthu kisun jouse ahesoh kei in ahi. Ahin Jesun golhang mihaopa koma, “nanei le nagou dalhan lang kanung hinjui in" ati chun golhangpa chu lungnom lou tah in ache mangtai. Hiche hin ipi avetsah em itileh, Pathian thu het ahahpoi, ahin anungjui abai pon ahi. Hichepa hi koitabang ham itileh, mi damlou khat anatna kiman dohía Doctor pan lou neh dinga pe’a, nelou tabang ahi. Lou chu aneh lou leh damdoh louding tina ahi. Hijehía chu thu ho ijah uva ibol lou ule ilhagao hinkhou khangtou lou ding ahi.

3. Lhahchamna kikihet (Recognizing weakness) Khantou kipatna.
Mi atamjo hin amitmona sanga abol theina joh akihet joh ji ahi. Min eikithopina sanga mi en ikikithopi ho kihejo ahi. Ahin lhagao lama chuti lou ahi. Mit-theina sanga mitmona joh ikihet chule hatna sanga hatmona etc. Ajeh chu Mihem khat chun ima kahipoi ati teng amapa-amanu chun ijakai Pathian angan se ji ahi. Pathian henga apumpi a akipeh doh teng amapa/amanu chu lungnom tah’a um ji ahi. Ijeh inem itileh Pathian in ama chu aumpi jing ahitai. Ahin mihem khat chu ama bol theina ah ahung kison teng
Pathian pan nading mun umji lou ahitai. Hijehía chu Pakai in muolsanga athuhilna a khu ‘lhagao’a vaichate anun nom ahiuve, Ijeh inem itileh vangam chu amahoía ahi
(Matthew 5:3).

4. Thungai leh kigah (self-discipline and self-denial)
Christian tia kimin vo jousen itup/idoi (goal) pen u chu Heavenly Reward (Van-gamía tohphatman, tohphat ga /kipaman sanding) hi ahi. Hiche muna dinga selfdiscipline ngai ahi. Hijeh a chu leiset chunga thil akidei jouse, akibol nom jouse jong kidalha ahi. Ahin lungtup ineilou uleh kigahna hi eidinga punishment (pan nabei a kiki engbawl nabep) hiding ahi. Ei le ei kiki sugenthei bep ding ahi. Kipaman sandinga ikinep lou uleh, tunia Christa minna akibol jouse apanna bei ahi. Ahin kinepna nei puma ibol tenguleh khantouna umding chule akibol jouse imacha ahahsa umlou ahi. Hiche kinepna chun thilse tamtah bolnom na lungthim ho a konna eituh gah jou jiu ahi.

Akhumkhana
Mi tamtah ama le ama kive louía mi hatmo le bolkhelna holía hoilai a chun asuh khelna kamu doh dem ti atam lheh tan ahi. Ahin tunia lhagao khantou nathu a kimu dol tah in eima le eima joh kikikhol henlang hileh khantouna lama kimachal ding ahi. Bible simna hihen lang lasah na hijongleh ngailutna nale tahsana apan louleh akibol jouse pan nabei hiding ahi.