World Health Organisation noia um International Agency for Research on Cancer (IARC) in mobile phone toh brain cancer kimatna um dem ti chungchang akholchil na hi research len pen ahi nalai in ahi. Ahin,
hiche chung chang hi khol thuh jep angai nalai e tin researcher hon asei uvin ahi. ‘Research result dungjuiin mobile phone akona natna aum thei e tia thulhuhna sem jeng thei vang ahi pon, chuleh alangkhata mobile hi natna toh akiguijopna aum poi tia sei din jong khol thuh jep angai nalai e’, tin IARC director Christopher Wild in asei in ahi.
Hiche research/study result hi mobile phone company ho leh mobile phone akon cancer natna akila thei e tia campaign group dang dang hon ana nga jingu chu ahi. Kum 10 jen research hin mobile phone toh brain cancer akiguijopna akholdoh jou lou ti ding ahi mai e. Christopher Wild in hiche research chungchanga lhahsamna asei danin, research hi 2000 kuma ana kipan ahin, chuleh tulai toh tekah din chu phatlai a mobile angchamiho (users) chu ana lhom lheh e, ati. Chuleh mipi hon mobile phone amanchahu phatsung estimate kibol dan jong mipi hon agel phah thei chanu (memory) dungjuia kipansa(based) ahi jeh in, hitobang method hin adih chet chu apohdoh joulou mai thei ahi, tin jong Christopher Wild in aseiin ahi.
Alangkhata, mobile phone akona tahsa atohkhah danho hetdohna dingin European scientist hon lha masa chun research ana pan tauvin ahi. Hiche kholchilna hi research len pen/hopjao pen hung hi ding ahitai. Research hin kum 30 sunga European gam 5 a mobile choimi (user) 2,50,000 ahopsoh ding ti ahi. IARC study dungjuiin mobile phone mangkhalou helho sangin amang jinghon brain cancer anei theinau (risk) alhomjoín, ahin IARC study ana boipi scientist 21 hon athil kholchildan method chunga lhahsamna aum, ahilouleh thu kidong mipiho akona information dih chet kimulou tiho um thei ahi tin asei kit uvin ahi.
Phone (mobile) call kiha bol jing akonin natna risk sang jep mai thei ahin, ahinla hiche finding hi nganse thei behseh ahi kit poi tin result chomin atahlang e. Effect aum poi tia khumkhanna sem jeng thei jong ahi kit poi. Ajeh chu mobile phone mangchami apungbe jingin, research bol thuh jep ngai nalai ding ahi tin scientist ho chun aseiuvin ahi. Hiche mobile research bol scientist 21 ho hi Interphone International Study Group noia pang ahiuvin, chuleh hiche research a dia sum kithopina neiho lah a mobile phone company ho jong apanguvin ahi. Tua scientist ho kholchilna hi International Journal of Epidemiology a kiso ahi.
1980s laia mobile phone auma pat amangchami nasa tah in apung jingin, tu le tua leiset pumpia mobile phone hi mihem billion 5 velin anei/ amangcha tauvin ahi. Tu dinmun toh vetkah din research in ahop mihem atamjo chu ‘chu tah a mobile phone mang hat mi ( not heavy users) ana hi pouve’ tin researcher ho chun asei un ahi. Alhangpia research a pang hon agoma call time asuhlut jat nidan 100 (100 hours) ahin, alha seh a alhangpia nidan 2 - 2 Ω amanu ti ding ahi. Amaho lah mobile mang hat pen 10% ho chun alhangpi’n nidan 1,640 kum 10 sungin amangchauvin ahi. Ni khat a nidan khat leh kim( half an hour) tobang amanchahu tina ahi.
‘Tulai in mobile phone manchahna akhang cheh cheh in, chuleh khangthah hon mobile phone nikhat a nidan khat ahilouleh chu sanga tam jep amanu chu thil kidang ahi ta poi’ tin researcher hochun atahlang un ahi. Ahin mobile choimi pung jing jeng jongleh, tulai modern mobile ho hi tahsa tongkhathei radiation level anem thei pena kisem ahi. Chuleh tulaiin atamjo text message a kihou leh hands-free (khut a choi ngailou) handset ho aki ha man tah jeh in luchanga kona gamla jep a phone kihouto thei ahitai tin jong scientist ho chun asei uvin ahi.
Hiche research a dia sum kisulut jat chu euro million 19.2 alhingin, chuleh chuche lah a million 5.5 vel chu company ho akona kimu ahi. Hiche research/study kibol dan chu brain cancer “glioma” kiti natna nei mi 2,708 leh brain cancer chi dang khat “meningioma” a dammo mi 2,409 ho, chungchona cancer natna neilou mi 7,500 vel ho thu kidong ahi.
Hiche research a participant ho chu Australia, Canada, Denmark, Finland, France, Germany, Israel,
Italy, Japan, New Zealand, Norway, Sweden chuleh Britain akon ahiuve.
