New Delhi: CBSE Class X grade dungjuia result kisem masa pen chu Gansemni (Friday) chun phondoh ahitai. Candidates 89.28 per cent in pachanna anei tauvin ahi. Grade system pat ahi toh kilhonin, board noia Class X exam hi kum kit 2011 apat kisubei ding ahitai. Tuchungin jong pasalho sangin numeiho pass percentage asang kit e.

Grading system thah kijui dungjuiin, CBSE in ëninepoint scaleí in candidate/student ho performance ahomkhenin ahi. Hiche dungjuia grade kipeh danho chu ahileh, A1 (91-100 marks), A2 (81- 90), B1 (71-80), B2 (61-70), C1 (51-60), C2 (41-50), D (33-40), E1 (21-32) chuleh E2 (20 marks a lhah anoi
lang) tiho ahi. Hiche grading system noia subject jouse a qualify-ing grades D leh achung lang muho chu qualifying certificate kipe ding ahi. CBSE hin candidate ëfailedí tia ana kiphong ji chu asuhbei ahitai. Achesa tukum March lha a ana kibol CBSE exam a pang students jat chu 9.02,747 ahiuvin, hicheho lah a students 89.28 per cent chun qualifying certificate asan ahitai. Tukum toh vetkah din, ningkum board exam pass percentage chu 88.84 % ana hi. Tuchung exam a numei qualifying certificates mu thei jat chu 90.68 per cent ahin, alangkhata pasal jat chu 88.30 per cent ahi kit e. Region 5 lah a Chennai region in abol hoi penin, chuleh hiche region a student qualifying certificates mu thei dia lolhing jat chu 96.18 per cent ahi. Hiche grading system noia additional subjects pang louva subject dang jousea D grade leh achung lang muho chu Class-XI sim thei ding ahiuvin, alangkhata E1 leh E2 grades muho chu akihabol jep theina diuva chance nga peh
hi diu ahi. Subject 5 a A1 mujou student ho chu board in merit certificates apeh ding ahi.

Region-wise performance dungjuia, Chennai ban tah chu Ajmer ahin, hiche region a students 93.51 per cent in qualifying certificates asan diu ahi. Abanin, Delhi a students 89.04 per cent in pachanna amu uvin ahi. Chennai region in ahopse chu states sagi leh Union Territories thum ahi.

Hiche region a asang pen chu Puducherry (99.50 per cent) ahi. Jawahar Navodaya Vidyalayas, Kendriya Vidyalayas chuleh government school hon school dangho akhokhel jing nalai uvin ahi. NavodayaVidyalaya school hoa lolhing students jat chu 96.87 per cent ahin, alangkhat in KV school hoa students 98.54 per cent in pachanna amu uvin ahi. Chuleh, government school ho pass percentage chu 83.01 ahi kit e. Students 75,000 lhing deh chet chu compartmental category ahi uvin, chuleh students 94,364 in E1 leh E2 grades amu uvin, amaho hi performance improvement ngai ding ahiuve. Grade mudan chungchanga lungkimlouho chun amaho
regional office cheh uva exam result akiphondoh nikho apat ni 21 sunga akivetchen thei diu ahi.